Yindula e diambu edi: Ekolo kesakananga ye akundi andi, André ofididi somba kuna nzo angani yo fwasa zianela.

Kele vo ngeye i André, adieyi wadi vanga?

MAMBU TATU OLENDA VANGA:

1. Tina.

2. Vunina muntu ankaka e mambu.

3. Zayisa kwa muntu dina divangamene, yo futa e lekwa kiangani ofwasidi.

Nanga olenda sola nzengo za 1: Tina. Kansi, diambote mu tambulwila e mbi ovangidi, kiakala vo zianela angani ofwasidi yovo lekwa kiankaka.

1. I diambu diambote mu vanga.

   Nkand’a Nzambi uvovanga vo: “Tuzolele kala akwa ziku muna mambu mawonso.”—Ayibere 13:18.

2. Wantu bezolanga loloka ndiona otambulwilanga e mbi kavangidi.

   Nkand’a Nzambi uvovanga vo: “On’ofukidi masumu mandi, kevwatumuka ko: On’otambulwila yo yambula mo, ofwilwa nkenda.”—Ngana 28:13.

3. Edi disundidi o mfunu, i dia sia vo: Nzambi diyangidikanga.

   Nkand’a Nzambi uvovanga vo: “O mbendomoki wangemi kwa Yave: O nsongi ozolakananga kwa yandi.”—Ngana 3:32.

Karina una ye mvu 20, waswekela se diandi mbumba. Kansi, kalenda yo sweka mu mvu miayingi ko. Karina wavova vo: “Vioka mvu mosi, e mbumba yazayakana kwa se diame. Ediadi diantwasila mpasi zayingi.”

Adieyi kalongoka? Karina wavova: “O sweka e mbi ovangidi mambu kaka diwokesanga. Kuna kulanda, mfwilu dikutwasila.”

Nkand’a Nzambi uvovanga vo: “Yeto awonso nkumbu miayingi tuvanganga vilwa.” (Yakobo 3:2, sinsu vana yand’a lukaya) Diambote mu tambulwila e mbi vana vau. Avo otambulwidi e mbi ovangidi, osonga vo u nkwa lulembamu ye ngangu.

E diambu diazole ofwete vanga i longoka diambu muna mbi ovangidi. Dumbelele kimosi una ye nkumbu Vera wavova vo: “Isianga ngolo za longoka diambu muna konso mbi ivanganga. Ediadi dikunsadisanga mu tomesa kiwuntu kiame yo lembi vutukila diaka vilwa wau lumbu kiankaka.” Yambula twazaya una olenda wo vangila.

Yindula vo otolwele sengwa kia mvelo a se diaku. Adieyi ovanga?

• Sweka e mbumba kimana se diaku kalembi wo zaya.

• Zayisa kwa se diaku dina diavangamene.

• Vunina muntu ankaka e mambu.

Kubakidi ko muna kizame kadi kwalongokele ko. Adieyi ovanga?

• Vuna vo kizame kiampasi kiakedi.

• Tambulwila vo kwalongokele ko.

• Vova vo nlongi eno kekuzolanga ko.

 Yindula diaka nona yole tuyikidi yo kuyisia vana fulu kia (1) se diaku yovo kia (2) nlongi aku. Aweyi se diaku yo nlongi aku bekubadikila avo otambulwidi e mbi aku? Aweyi bekubadikila avo oswekele e mbi ovangidi?

Owau, yindula diambu diambi wavanga mu mvu waviokele yo vana e mvutu za yuvu ilende:

Adieyi wavanga?

• Mbumba yalunda

• Muntu ankaka yavunina mambu.

• Yatambulwila vana vau e mbi yavanga.

Avo kwatambulwila ko e mbi wavanga, aweyi wamona?

• Kiese, wau vo ke diazayakana ko

• Nkenda, wau vo kiavova ludi ko.

Nkia diambu diambote wadi vanga?

Adieyi walongoka muna mbi wavanga?

Ekuma wantu ayingi ke bezolanga tambulwila ko e mbi bavangidi?

Aweyi wantu bekubadikila avo fu kia sweka e mbi una kiau? Aweyi bekubadikila avo otambulwidi e mbi ovangidi?—Luka 16:10.