Alakanyeni pali cici: Tim alukwangala ne babyakwe, apoosa bola eli yatoba pe windo lya ng’anda ya bene.

Nga nimwe mwali Tim, mungacita shani?

SALULULAPO PALI FIFI FITATU:

1. Kubutuka.

2. Kutamina umbi.

3. Kubabuula abene be windo ifyacitika, ne kubabuula ati mukaliwamya.

Mungafwaya ukusalululapo A. Pano ciweme impindi shonse kani mwebo mulukusumina ifyakubifya fyenu—nangaba kutobe’windo neli ifili fyonse ifi mungabifya.

1. Ecilungeme ici mwelelwe ukucita.

   Baibolo ilalabila ati: ‘Tulafwayo’kulukwikele aba bucine mu fintu fyonse.’—AbaEbeya 13:18.

2. Abantu balatemwa ukufitulukila abo abasumina ifyakubifya fyabo.

   Baibolo ilalabila ati: “Uyo ufimba-po pa kupulaisha kwakwe tekuti ashuke; sombi abantu bonse ukufisulula ne kukuleka eukapoka inkumbu.”—Ifisimpi 28:13.

3. Icicindamiishe, ukucite’fyo kulasangalasha baLesa.

   Baibolo ilalabila ati: “BaYawe balukubakanamina aba kulengulula, sombi ica mfiso cabo cili ku bashikimene mu mitima.”—Ifisimpi 3:32.

Karina, uuli ne myaka 20, aalibafishile bawishi umulandu apangile uwa kubutusha motoka pa musebo. Pano mukuya kwa mpindi, baalishibile. Karina kaalabila ati “Panuma ya mwaka umo, batata baalibwene akapepala balembele bakapokola aka kubutusha motoka mwi shina lyanji. Nalilibikile mu bukatasho!”

Findo asambilileko kuli fyefyo? Karina alabila ati: “Ukubula ukufisulula ifya kubifya kulalengesha ifintu ukubipilako. Ifyakufumamo filaba ifibipile!”

Baibolo ilalabila ati: “Fwense tulalitutula ku fintu ifingi.” (Jakobo 3:2) Kanshi twabona ati, ukusumina ifyakubifya fyesu kulalangisha ati tulilicefeshe kabili ati tuli ne kalango—kabili tulyelelwe ukucite’fyo penka apo fyacitika.

Inshila yakonkapo, kusambililako ku fyakubifya mwacitile. Moye uwe shina lya Vera alabila ati: “Ku fyakubifya fyonse ificitika ndasambililako isambililo ilingangafwako ukuba umuntu umuweme ne kwishiba ifyakucita kani ifyakube’fyo fyacitika nakabili.” Nga tubone ifi mungacita fyopele’fyo.

Mwaashima incinga ya bawishinwe kabili yaonaika. Findo mungacita?

• Kwikala celele ne kufwaisha ati bekeshibapo.

• Kubabuula penka apo ifi caciba.

• Kubabuula ifi caciba ne kutamina umbi ati ewacilengesha.

Mwafeluka ku sukuulu pakuti tamwalyanshikilepo bwino. Mungacita shani?

• Kutamina ifi mwalemba ati fyalikosele.

• Kusumina lukoso ati mwafeluka.

• Kulabila ati abasambishi ebalengesha pakuti balimpatile.

 Pano anukeni ifi twalabilapo eli mwalakanye ati e mwebo (1) bawishi na (2) abasambishi. Findo abafyashi benu ne basambishi benu bangalanguluka pali mwebo kani mwalisumiine ifyakubifya fyenu?Findo bangalanguluka kani mwalifishile ifyakubifya fyenu?

Pano alakanyeni pa fyakubifya ifi mwacitile umwaka wafumineko ne kwasuka ifyakwipusha fyakonkapo.

Findo mwabifishe? Mwalicitile shani pali kuko ukubifya?

• Nalifishile.

• Nalitamiine umbi.

• Nalifisulwile ne kusumina ukubifya kwanji.

Kani mwalifishile ukubifya kwenu, mwalyumfwile shani panuma ya kucite’fyo?

• Bwino—nalifilubileko ne kufilubako!

• Uwa mulandu—nalyelelwe ukulabila bucine.

Mwalyelelwe ukucita shani pa kushilisha ubo ubukatasho?

Findo mwasambilileko ku fyakubifya fyenu?

Nindo abantu bambi tabafwailapo ukufisulula ifyakubifya fyabo?

Findo abantu bangalanguluka pali mwebo kani lyonse mulukufisa ifyakubifya fyenu, kabili findo bangalanguluka kani mulukufisulula ifyakubifya fyenu?—Luku 16:10.