Par ane wachni: Sama Tim tugo mpira gi osiepene, owito mpira kae to mpirano toyo kio mar diris jirandgi.

Ka dine bed ni in Tim, ditimo nang’o?

INYALO YIERO TIMO ACHIEL KUOM WECHE ADEKGI:

1. Inyalo ringo.

2. Inyalo keto kethono kuom ng’at machielo.

3. Inyalo nyiso jirani gima otimore kae to ichul kio motoreno.

Samoro inyalo neno ni duoko mar A e ma ber. Kata kamano en gima ber ahinya yie ni itimo makosa, bed ni itoyo kio mar dirisa kata ka itimo gimoro machielo.

1. Yie ni ikoso en gima owinjore.

   Muma wacho kama: “Wadwaro bedo joratiro e gik moko duto ma watimo.”—Jo-Hibrania 13:18.

2. Yot ng’wono ne ng’at moyie ni otimo makosa.

   Muma wacho kama: “Ng’a maumo richone ok noyud hawi; to ng’a mahulogi, mi oweyogi, nokeche.”—Ngeche 28:13.

3. Moloyo duto, Nyasaye mor ahinya sama iyie ni ikoso.

   Muma wacho niya: ‘Ng’a ma wiye tek chuny Jehova osin-go, to omako osiep kod jo matir.’—Ngeche 3:32.

Nyako moro ma jahigni 20 miluongo ni Karina, kinde moro ne riembo mtoka matek ahinya ma ogoye fain. Kar nyiso wuon mare gima ne otimoreno, en noling’ aling’a. Kata kamano, ne ok onyal pando wachno nyaka chieng’. Karina wacho niya: “Bang’ higa achiel kama, wuonwa noneno risit mar fain, kendo mano norwaka e chandruok maduong’ miwuoro!”

Be noyudo puonj moro? Karina wacho kama: “Pando gimoro marach mitimo ok kony. Mano biro mana rwaki e chandruok ka wachno ong’ere bang’e!”

Muma wacho niya: “Waduto wachwanyore nyading’eny.” (Jakobo 3:2) Mana kaka waseneno, ng’at mobolore kendo ma pache otegno en ng’at ma yiega gi makosa motimo.

Okang’ machielo en yudo puonj kuom makosa mitimo. Nyako moro miluongo ni Vera wacho kama: “Sama gimoro obothna, atemoga mondo mano opuonja bedo ng’at maberie moloyo kendo mondo kik anwo makosano kendo.” Wane ane kaka in bende inyalo timo kamano.

Ikwayo wuonu ndiga kae to ndigano okethoreni. Ibiro timo nang’o?

• Ibiro ling’ aling’a thi ka iparo ni wuonu ok bi fwenyo.

• Ibiro nyiso wuonu gimomiyo ndiga ne okethore.

• Ibiro nyiso wuonu gima ne otimore kae to iketo ketho kuom ng’at machielo.

Ok ikalo penj nikech ne ok isomo matek. Ibiro timo nang’o?

• Ibiro wacho ni penj ne tek ta.

• Ibiro yie ni in e ma ne ok isomo matek.

• Ibiro wacho ni japuonj e ma ok dwari omiyo en e ma omiyo ok ikalo penj.

 Koro ng’iane ranyisi ma wawuoyego kendo kae to itemie paro ni in e (1) wuonu kata (2) japuonj. Iparo ni ka iyie mapiyo ni in e ma nikoso, wuonu kod japuonj nyalo neni kaka ng’at machal nade? To ginyalo neni nade ka iumo makosa mitimo?

Koro par ane makosa ma ne itimo higa mokalo kae to idwok penjo maluwogi.

En makosa mane ma nitimo? To ang’o ma ne itimo bang’e?

• Ibiro ling’ aling’a thi ka iparo ni wuonu ok bi fwenyo.

• Ibiro nyiso wuonu gimomiyo ndiga ne okethore.

• Ibiro nyiso wuonu gima ne otimore kae to iketo ketho kuom ng’at machielo.

Ne iwinjo nade e chunyi sama ne itamori yie gi makosani?

• Ne amor ni onge ng’at ma ne ofwenyo!

• Ne awinjo marach e chunya ni kara ne dawacho adier.

Ne owinjore itim ang’o?

En puonj mane miyudo kaluwore gi makosa ma ne itimo?

Ang’o momiyo jomoko tamorega yie ni gikoso?

Ji nyalo neni nade ka kinde duto in isiko mana ka iumo makosa ma itimo? To ginyalo neni nade ka ijayiega sama ikoso?—Luka 16:10.