L̦õmn̦ak m̦õk kõn waanjoñak in: Ke Tim ej iukkure ippãn ajri ro m̦õttan, ear jirilo̦k im kade kilaaj in wa eo waan juon armej.

El̦aññe en kar kwe Tim, ta eo kwõnãj kar kõm̦m̦ane?

EWÕR JILU MEN KO KWÕMAROÑ KÕM̦M̦ANI:

1. Ko.

2. N̦aruon bar juon.

3. Kwal̦o̦k ñan armej eo waan wa eo men eo ear wal̦o̦k, im ba bwe kwõm̦õn̦õn̦õ in kõm̦m̦an jabdewõt ñan kõl̦l̦ãik men eo ejorrããn.

Bõlen kwõnãj kõn̦aan kõm̦m̦ane Nõm̦ba 1. Bõtab ewõr un ko rem̦m̦an unin am̦ aikuj kwal̦o̦k men eo kwaar kõm̦m̦ane. Jekdo̦o̦n ñe emaroñ kwe eo kwaar kade kilaaj in wa eo ak ko̦kkure bar juon men, eaorõk bwe kwõn kwal̦o̦k m̦ool iien otemjej.

1. Ej juon men ejim̦we ñan am̦ kõm̦m̦ane.

   Baibõl̦ ej ba: “Kõm kõn̦aan kõm̦m̦ani men ko rejim̦we iien otemjej.”​—Hibru 13:18, UBS.

2. Epidodol̦o̦k an armej ro jol̦o̦k bõd ko an ro me rej kwal̦o̦k bõd ko aer.

   Baibõl̦ ej ba: “El̦aññe kwõj n̦ooj jerawiwi [ak bõd] ko am̦ kwõjãmin jeraam̦m̦an. El̦aññe kwõj kwal̦o̦ki im oktak jãni, innem Anij enaaj tũriam̦okake eok.”​—Jabõn Kõnnaan 28:13, UBS.

3. El̦aptata, men in ej kabuñbũruon Anij.

   Baibõl̦ ej ba: “Bwe eo ri bõt [ejjab kwal̦o̦k m̦ool, NW] ej menin jõjõik ñan Jeova, a Ej jerãik eo ruwãnõk.”​—Jabõn Kõnnaan 3:32.

Karina, eo me 20 an iiõ, ear n̦ooje jãn jemãn bwe rar tũkõte kõn an iim̦ an kar kattõr. Bõtab, ear jab maroñ n̦ooje wõt men in ñan indeeo. Karina ej ba, “Enañin juon iiõ tokãlik, jema ear loe bwe em̦õj aer kar tũkõte ña im bwe enana eta kõn an kar iim̦ aõ kattõr. Jema ear lukkuun illu ippa!”

Ta eo Karina ear katak jãn men in? Ej ba: “Ad n̦ooje bõd ko ad enaaj kõm̦m̦an bwe en l̦apl̦o̦k wõt jorrããn eo. Kwõnãj baj lo wõt leen kõm̦m̦an ko am̦ tokãlik!”

Baibõl̦ ej ba: “Kõj otemjej emmakijkij [ak eokkutkut] ad bõd.” (Jemes 3:2, UBS) Jaar katak bwe ñe juon ej kwal̦o̦k bõd ko an, men in ej kaalikkar an ettã bũruon im rũtto l̦õmn̦ak eo an, el̦aptata ñe ej kwal̦o̦k bõd ko an ilo iien eo wõt.

Men eo kein karuo, ej katak jãn bõd ko am̦. Juon leddik etan Vera ej ba: “Kajjojo iien ij kõm̦m̦an bõd, ij kate eõ bwe in jab bar kõm̦m̦ane. Im ij watõke ãinwõt juon mennin ekkatak me emaroñ jipañ eõ ñan kakõm̦anm̦anl̦o̦k ña make im bwe in jel̦ã ta eo in kõm̦m̦ane ñe ebar wal̦o̦k tokãlik.” Jen lale ewi wãween am̦ maroñ kõm̦m̦ane men in.

Kwaar kõjerbal baajkõl̦ eo waan jem̦am̦ im jujen jorrããn baajkõl̦ eo. Ta eo kwõnãj kõm̦m̦ane kiiõ?

• Jab ba jabdewõt ñane im tõmak bwe eban kile ke ejorrããn.

• Ba ñan jem̦am̦ ta eo ear lukkuun wal̦o̦k.

• Ba ñan jem̦am̦ ta eo ear wal̦o̦k ak kwõj n̦aruon bar juon.

Kwaar test im enana grade eo am̦ kõnke kwaar jab katak. Ta eo kwõnãj kõm̦m̦ane kiiõ?

• N̦aruon test eo kõn an pen.

• Ba bwe ej am̦ make bõd bwe enana grade eo am̦.

• Ba bwe rũkaki eo am̦ edike eok.

 Kiiõ bar l̦õmn̦ak kõn waanjoñak ko ruo, im pijaik eok make ãinwõt ñe (1) kwe jem̦am̦ im (2) kwe rũkaki eo. Ta nãj kar l̦õmn̦ak eo an jem̦am̦ im rũkaki eo am̦ kõn kwe el̦aññe kwõj m̦õkaj im kwal̦o̦k bõd ko am̦? Elemen aer nãj kar l̦õmn̦ak kõn kwe el̦aññe kwõj n̦ooj bõd ko am̦?

Kiiõ l̦õmn̦ak kõn juon bõd kwaar kõm̦m̦ane iiõ eo l̦o̦k im uwaake kajjitõk kein.

Ta bõd eo kwaar kõm̦m̦ane? Elemen am̦ kar jol̦o̦ke?

• Iar n̦ooje.

• Iar n̦aruon bar juon kake.

• Iar m̦õkaj im kwal̦o̦ke.

Ke kwaar jab kwal̦o̦ke bõd eo am̦, kar ta eñjake eo am̦ tokãlik?

• Elukkuun kar em̦m̦an kõnke ejjel̦o̦k ejel̦ã kake!

• Ekar nana kõnke iar jab kwal̦o̦k m̦ool.

Ta wãween eo em̦m̦anl̦o̦k kwõn kar kõm̦m̦ane ñan kõm̦adm̦õd men in?

Ta eo kwaar katak jãn bõd eo am̦?

Etke epen an jet armej kwal̦o̦k bõd ko aer?

Ta nãj l̦õmn̦ak eo an armej ro kõn kwe el̦aññe aolep iien kwõj kajjioñ n̦ooje bõd ko am̦? Ak ñe kwõnãj kwal̦o̦k bõd ko am̦, enãj ta l̦õmn̦ak eo aer kõn kwe?​—Luk 16:10, UBS.