Yelenganya vino vikucitika: E Tim akuteya boola nawawuye, nomba ukwasowa ukwenecela wapanta e boola nu kufwanta iwindo lya wina mupalamano.

Uzye nga walinji we Tim, ungacita wuli?

UNGASOLAPO UKUCITA CONGA PE VYO-O VITATU:

1. Ungasamala.

2. Ungawipizya winji.

3. Unganena umweneco cino cicitisile nu kulanda ukuti ulilipila vino uyononile.

Ungalola ngati ukucita cino cili Pa A akuno kwapepuka. Lelo kwawa imilandu yino cacindamila ukuzumilila vino uluvinye—kuwe akufwanta iwindo nanti icili consinye cino ungacita.

1. Cazipa ukuzumila iviluwo.

   E Baibolo yikati: “Tukalonda [ukuwa ni cisinka mwe vyonsinye.” NWT—Waheberi 13:18.

2. Cikapepuka ukutetela wino akazumila iviluwo.

   E Baibolo yikati: “Ndi ukafisa uluwembu lwako utanga ufungule nanti ukuzana icizima cimwi. Cazipila ukuzumila nu kuntontolokwa ukuwifya kwako; apano Leza alikwivwila inkumbu.”—Imilumbe 28:13.

3. Ni cicindame nkani acakuti e Leza akatemwa.

   E Baibolo yikati “E [Yehova NWT] wapata wakacita waluwembu, ukuwa akakukutizya awalungamane.”—Imilumbe 3:32.

E Karina uwa myaka 20 atanenile umukwasi wakwe ukuti wapanzile umulandu pa musewo. Lelo vino wacisile vizile avisokoloka. E Karina walanda ukuti, “papisile vye umwaka wonga e tata wizile azana ivipepala vino wampelezilepo umulandu wakusamazya nkani e motoka. Ala nkuti ivintu vyawifile!”

Uzye acani cino e Karina wasambilizileko? Walanda ukuti, “Ukufisa iviluwo kukalenga ivintu ukuwipilako. Amuno umulandu nanti ungazimba wulinye, wusiwola!”

E Baibolo yikati: “Penye swensinye tukawifya.” (Jemusi 3:2) Nga vino tuweni ukuzumila iviluwo paponye pano waluvyanya, kukalanjizya ukuti umuntu waicefya swinya we songo mu mano.

Cinji cino cakonkapo, uwasambililako kwe vino ukaluvyanya. E Vera watili: “Ukwelenganya pa viluwo vino nkaluvyanya nu kusambililako ku ciluwo conga na conga, kukalenga nacita ivizima swinya kukanjavwa ukukana nyocezyapo iciluwo.” Leka tulole vino ungasambililako ku viluwo vyako.

Waya wonona injinga yino tewazima ku mukwasi wako. Uzye ungacita wuli?

• Kusi ukulanda cimwi, pakuti ciloleke ngati umukwasi wako atamanyile icili consinye cino cicitisile.

• Akunena umukwasi vyonsinye vino vicitisile.

• Akunena umukwasi vino vicitisile lelo uwipizye winji ukuti awino te walenga.

Wapoona e tesiti pa mulandu wakuti utawazyanga. Uzye ungacita wuli?

• Ungati, e tesiti yawomile.

• Akuzumila vye ukuti cino wapoonela amuno utawazyanga.

• Akupa umusambilizya umulandu wakuti wakupata.

 Nomba nyocela katici kunsizi nu kwelenganya ukuti awemuno we (1) mukwasi (2) musambilizya. Uzye nga wazumila vino ucisile, umukwasi wako nu musambilizya wangakulola wuli?Nga ngacakuti wafisa vino uluvinye wangakulola wuli?

Nomba pano utani uyasuke iviwuzyo vino vyakonkapo yelenganya vino waluvinye umwaka uno wasizile.

Uzye acani cino waluvinye? Wacisile wuli?

• Nafisile iciluwo.

• Nawipizizye winji ukuti awino walenzile.

• Nazumizile iciluwo.

Nga cakuti utazumizile iciluwo, wizile uyivwa wuli?

• Icete nye—amuno napususile!

• Uwa mulandu—Nange ndande vye icisinka.

Uzye ukwelenganya ukuti avyani vino wanga ucite?

Avyani vino wasambilizileko?

Acani cino awantu wamwi wakakanila ukuzumila vino wakaluvyanya?

Uzye ukwelenganya ukuti awantu waliwakulola wuli nga cakuti lyonsinye ukafisa iviluwo vyako, nga nga cakuti ukazumila vino ukaluvyanya, waliwakulola wuli?—Luka 16:10