Ximoiljui ni: Tim mauiltijtoya ininuaya iuampoyouaj, uan kema chikauak kimajkajki se pelota, kitlapanki nopa teskatl tlen se carro katli eltoya ikalnechka.

Tlaj ta mitspanoskia kej Tim, ¿tlake tijchiuaskia?

UELIS TIJCHIUAS SE TLEN NI EYI TLAMANTLI:

1. Timotlalos.

2. Tijkauilis seyok.

3. Tikiljuis mokalnechka tlake panok uan tijtlaxtlauiskia.

Maske uelis tijnekiskia tijchiuas tlen kiijtoua nopa achtoui tlamantli, tlauel kuali tlaj tikijtos tlen tijchijki, uelis kema tijtlapanas se ventana o kema tijchiuas seyok tlamantli.

1. Kinamiki tikijtos.

   Biblia kiijtoua: “Tinemij xitlauak iixpa [toTeotsij] uan keja nopa tijnekiskiaj tijchiuasej nochipa” (Heb. 13:18).

2. Tlaj tikijtos kena timokuapolok, uelis sekinok amo ouij mitstlapojpoljuisej.

   Biblia kiijtoua: “Aki kitlatia itlajtlakoljuaj axkualkisas, pero aki [kiijtoua] nochi itlajtlakoljuaj uan kikaua, [...] kitlapojpoljuis[ej]” (Prov. 28:13).

3. Tijyolpakiltis toTeotsij, uan ni nelia tlauel ipati.

   Biblia kiijtoua: “ToTeko kikualankaita nopa tlakatl tlen uijkoltik iojui, pero kiniknelia tlen itstokej xitlauakej iixpa” (Prov. 3:32).

Se tonali, Karina kiiljuijkej ma tlaxtlaua pampa tlauel chikauak kiuikayaya se carro. Kema kipanok nopa, amo kinejki kiiljuis itata. Teipa itata kimatki tlen kipanotoya. Karina kiijtoua: “Kema nechka panotoya se xiuitl, notata kiitak nopa amatl kampa nesiyaya nechinantoyaj pampa chikauak nijnemiltik icarro. ¡Nelia tlauel kualanki!”.

¿Tlake techmachtia tlen kipanok Karina? Ya kiijtoua: “Kema tijnekij tijtlatisej tlen tijchijtokej, kichiua teipa ma tijpiakaj kuesoli, pampa se tonali kimatisej tlen tijchijkej”.

Biblia kiijtoua: “Nochi [miakpa] timokuapolouaj” (Sant. 3:2). Kej tikitakej, tlaj tikijtos kena timokuapolok, tijnextis ya titlalnamiktok uan amo timoueyimati.

Nojkia moneki tijchiuas seyok tlamantli: ayokmo sampa timokuapolos. Se ichpokatl tlen itoka Vera kiijtoua: “Kema nimokuapoloua, nikita tlake nojua nechpoloua nijchiuas. Kiampa, kema sampa nechpanos, nijmatis tlake uelis nijchiuas uan ayokmo sampa nimokuapolos”. Ma tikitakaj tlake tijchiuaskia kema mitspanos se keski tlamantli.

Tlaj tikiljuiskia motata ma mitstlanejti ibicicleta, uan tijsosoloua kema mitstlanejtia, ¿tlake tijchiuaskia?

• Amo tleno nikiljuiskia pampa uelis amo kiitas tlaj nijsojsolok.

• Xitlauak nikiljuiskia kenke sosolijki.

• Maske nikiljuiskia, nijkauiliskia seyok kisojsolok.

Tlaj tijchiuaskia se examen uan amo kuali kisa pampa amo timomachtik, ¿tlake tijchiuaskia?

• Nikijtoskia amo kuali kiski pampa tlauel ouij.

• Nikijtoskia amo kuali kiski pampa amo nimomachtik.

• Nikijtoskia nopa tlamachtijketl nechkualankaita.

 Nama kuali ximoiljui ipan nopa ome tlamantli tlen ueliskia mitspanos, uan ximoiljui ta tieli 1) motata uan 2) motlamachtijka. ¿Tlake moiljuiskiaj inijuantij tlaj nima tikijtoskia kenke timokuapolok o kenke amo kuali kiski tlen tijchijki? ¿Tlake moiljuiskiaj tlaj amo tleno tikiniljuiskia?

Nama ximoiljui ipan se tlamantli tlen amo kuali tijchijki ipan ni xiuitl uan xijnankili ni tlajtlanili.

¿Kenke timokuapolok? ¿Tlake tijchijki teipa?

• Amo tleno nikijtok.

• Nikijtok seyok kichijki.

• Nima nikijtok tlen nijchijki.

Tlaj amo tikijtok kena timokuapolok, ¿kenijkatsa tijyolmatki teipa?

• ¡Tlauel kuali! Amo tleno nechpanok.

• Nimoyolkokok. Nimoiljuia tlauel kuali tlaj nikijtojtoskia.

¿Tlake seyok tlamantli ueltoskia tijchiuas?

¿Tlake tikitak nojua mitspoloua tijchiuas?

¿Kenke kemantika ouij tikijtosej kena timokuapolojkej?

¿Tlake moiljuiskiaj sekinok tlaj amo tleno tikijtoua kema timokuapoloua? (Luc. 16:10).