Se neskayotl: Tim mauiltia iuan iyolikniuan uan ika pelota kitlapana iteska se carro.

Tla mitspanoskia ken Tim, ¿tlen tikchiuaskia?

UELIS TIKCHIUAS EYI TLAMANTLI:

1. Ticholos.

2. Tikijtos amo te otikchi.

3. Tikijtos tlen opanok uan tiktlaxtlauas tlen otiktlapanki.

Uelis tiknekiskia tikchiuas tlamantli 1. Pero okachi kuali xikijto tlen otikchi, maski san tlen otikchi.

1. Non tlen okachi kuali.

   Biblia kijtoa: “Tiknekih tikchiwaskeh nochi tlan kuali” (Hebreos 13:18).

2. Tla tikijtos tlen otikchi, uelis mitstlapojpoluiskej.

   Biblia kijtoa: “Akin kitlatia itlajtlakoluan amo kuali kisas, uan akin moyolkuitia uan kikaua itlajtlakol, kiknomatiskej” (Proverbios 28:13).

3. Uan nin okachi ipati: tikyolpaktis toTajtsin Jehová.

   Biblia kijtoa: “Jehová kikokolia akin kitlatia iyelis, pero Ye kuali mouika iuan akinmej yolmelauakej” (Proverbios 3:32).

Karina, tlen kipia 20 xiuitl, amo okinekiaya kinmiluis itatajuan okimakakej se multa pampa totoka okiuikaya carro, pero amo ueli okitlati nochipa. “Kanaj se xiuitl satepan —kijtoa Karina—, notajtsin okajsik se multa pampa totoka onikuikaya carro. ¡Onikpixki se ueyi ouijkayotl!”.

¿Tlen mitsmachtia? Karina kijtoa: “Tla tiktlatiskej tlen otikchijkej non san kiueyitilis ouijkayotl. Pero satepan moneki tikixnamikis non ouijkayotl”.

Biblia kijtoa: ‘Tinochteh kualchiwa titlajtolpanoah, iwa [...] timotlapololtiah’ (Santiago 3:2). Uan ken yotikitakej, tla san niman tikijtoskej tlen otikchijkej, tikteititiskej tiyolyamankej uan kuali timokuayejyekoaj.

Tla itlaj amo kuali tikchiua: ayakmo ijkon xikchiua. Se ichpochtli tlen itoka Vera, kijtoa: “Ijkuak nimotlapololtia, nimochijchikaua ayakmo ijkon nikchiuas. Uan nikita ken itlaj tlen nechpaleuia pampa nikitas tlen tlamantli moneki nikyektlalis. Ijkon tla oksepa niyetos itech se ouijkayotl ken non nikmatis tlen uelis nikchiuas”. Tlen tikchiuaskia tla tikpiaskia ouijkayotl ken:

Motajtsin mitstlanetia ibicicleta uan tikijtlakoa. ¿Tlen tikchiuaskia?

• Amo itlaj nikiluiskia, uelis amo kitas kox oijtlakauik.

• Nikiluiskia tlen melauak opanok.

• Nikiluiskia tlen opanok, pero ikaj niktlajtlakoltiskia.

Tikchiua se examen pero amo kuali tikchiua pampa amo otimomachti. ¿Tlen tikchiuaskia?

• Nikijtoskia examen sapanoa oui.

• Nikijtoskia notlajtlakol pampa amo onimomachti.

• Nikijtoskia akin tlamachtia ijkon onechchiuili pampa amo iuan nimouika.

 Xikojpaui nin ome tlamantli, uan ximokuayejyeko te 1) titeta uan 2) akin titlamachtia. ¿Tlen mokuayejyekoskiaj tla tikijtos san niman tlen otikchi? ¿Tlen mokuayejyekoskiaj tla amo tikijtos tlen melauak?

Axkan ximokuayejyeko itech itlaj tlen amo kuali otikchi yisexiuitl uan xikinnankili ninmej tlajtlanilmej:

¿Itech tlen otimotlapololti? ¿Tlen otikchi?

• Oniknekiaya niktlatis.

• Okse oniktlajtlakolti.

• San niman onikilui tlen opanok.

Tla amo otikijto tlen otikchi, ¿ken otimomachili satepan?

• ¡Kuali! Amo itlaj opanok.

• Amo kuali onimomachili. Omonekiaya nikijtos tlen melauak.

¿Tlen omonekiaya nikchiuas?

Pampa otimotlapololti, ¿tlen mitsmachtia?

¿Tleka ualeua oui tikijtos otimotlapololti?

¿Tlen mokuayejyekoskej oksekimej tla timotlapololtia uan amo tikijtoa? Pero ¿tlen mokuayejyekoskej tla maski timotlapololtia amo tiktlatia? (Lucas 16:10).