Rangarirai ciitiko ici: Paainga ecitamba bhora no shamwari jake, Thomo warithaura rophwanya vhidhru yo karu yocigarisano.

Kudari nowainga Thomo, waizoitenyi?

UNO MUKANA MUTATU:

1. Kutiza.

2. Kupumbha umwenivo hake.

3. Kubvunja vhizinyu zvaitika, perapo wozvipira kuti upagari zvaphwanyikaro.

Kangaije ungaejwa kuti ushandise mukana 1. Asi nguva jese zvakanaka maningi kutendera zvawashaisha—dengani kuphwanya jhanera kana cimwenivo haco.

1. Ndicona ciro caushoni caunodikana kuti uite.

   Bhaibheri rinoti: ‘Tinoda kuva vakagondeka mu zviro zvese.’—Vaheberi 13:18, Shanduro yeNyika Itsva.

2. Amwe mazwi akangwara o Cindau anoti: Watenda ndava aaurawi.

   Bhaibheri rinoti: “Ndiani ano viga bzokuposa bzake, aazogarisiki; ndiani anobzidekeca no kubzisia, anozoitihwa unyaxa.”—Mazwi Akangwara 28:13.

3. Cinosisira maningi, kudakajisa Mwari.

   Bhaibheri rinoti: ‘Ngokuti Jehovha Mwari anonyangajihwa ngo wakaxata mwoyo, anoda ngo mwoyo wese varurami.’—Mazwi Akangwara 3:32.

Karina, ano makore 20, ari kueja kuvigira babake phepha ro muruta ngo ndava yo kugogomesa maningi karu. Asi azviitiki kuramba wakariviga mbhera narini. “Pootokwana gore rese,” Karina onanga kuti: “Papaa vonanyi phepha ro muruta rino zina rangu. Ndakanghwina mu zvineso maningi!”

Ngocapi cijijo? Karina anonanga kuti: “Kuramba ndakaviga kushaisha kwakaviisa zvineso zvizinji. Unozondova no muvio basi kumbejiyo!”

Bhaibheri rinoti: “Tese tinoxaixa ruzinji.” (Jakobo 3:2) Inga zvatavona, citatijo co kuzvidodokesa no kukura i kutendera kuposa kwako—woita zvakanaka ciripo-ripoco.

Mudanyu unotevera i kujijira ngo kuposa kwako. Musikane umweni anozwi Vhera wakati: “Ndinoeja kuvona zvandinoshaisha zvese inga zviitiko zvokundijijisa zve kuzviregera kuti cive cijijo cinozondibesera kuva mundhu ari nane no kuzohwisana no shwiroyo mu njira imweni pa vhaza inotevera.” Ngatimbovona maitire aungazviita ndiwona.

Washonga bhasikoro ra babako asi warigujura. Tevere unozoitenyi?

• Kunyarara wecivetera kuti babako avazozvivoni.

• Kubvunja baba zvese zvaitika.

• Kubvunja baba zvaitika asi wopumbha mundhu umweni.

Ngatiti washumbari pa porovha kucikora ngo kuti auzivi kujijira. Unozoitenyi tevere?

• Kupumbha porovheyo.

• Kutendera mutoro wako wo kuwana mavharori mashoma.

• Kucema weciti porosori ari kundizonda.

 Waro wecisotazve pa ciitiko cokutanga zve eja kurangarira kuti iwewe (1) ndiwe baba (2) ndiwe porosori wako. Baba no mujijisi wako vaizorangarirenyi ngo pamusoro pako kudari no waizotendera zvawakaposa? Vaizorangarirenyi ngo pamusoro pako kudari wakaviga zvowakaposa?

Wari wecirangarira ngo pamusoro po kuposa kwawakaita mukati mo gore rakapera perapo davira mubvunjo jinotevera.

Wakashaishenyi? Wakakutongesa kudini kushaisheko?

• Ndakakuviga.

• Ndakapumbha mundhu umweni.

• Ciripo-ripoco ndakadavira kuposeko.

Kudari ucizivi kutendera kuposeko, wakazwa kudini pakupera kufisa?

• Ndakadakara—ndakwanisa kumbzenga!

• Kuremehwa—ndaidikana kunanga cokwadi.

Waizoitisa kudini ngo njira iri nane?

Wakajijenyi ngo kuposa kwako?

Ngenyi vandhu vamweni vanoramba kutendera kushaisha kwavo?

Vandhu vanozorangarirenyi ngo pamusoro pako kudari nguva jese unoeja kuviga zvaunoshaisha, asi vanozorangarirenyi ngo pamusoro pako kudari ukatendera kushaisha kwako?—Luka 16:10.