4 EL KER
Ngmekera Kusmechokl a Cheleuid el Kriruul?
KE MO MEKERANG?
Ka molatk er tiang: A Tim a milil el obengterir a resechelil, e metechii a btuu el mengii a glass er a mlil a tonari er ngii.
Omko e ke mle Tim, e ke mo mekerang?
KA MOMDASU!
NGAR ER NGII A 3 EL TEKOI EL SEBECHEM EL REMUUL:
-
Ke chemiis.
-
Ke otelecheklii a ta er a chad.
-
Ke ouchais er a tonari er kau er a tekoi el dilubech, e kongei el mo harau er a chad el mo rullii.
Nglocha mo soam el rullii sel 1. Engdi ngblechoel el mo uchul a klungiaol sel mouchais er a cheleuid el omerellem alta ke milengii a glass me a lechub e ngkuk ta er a tekoi.
EDEI EL UCHUL ME KE KONGEI EL OUCHAIS A CHELEUID EL MRIRUUL
-
Ngmelemalt el tekoi.
A Biblia a kmo: “Ngsomam el melemalt loureor el kirel a ngiidil tekoi.”—Hebru 13:18, BT.
-
A rechad a blechoel el ousubes er tirke el chad el kongei el kmo te mlo cheleuid.
A Biblia a kmo: “Ngikel omart a kngtil a diak bo lungilbesul a klengar er ngii, e ngdi ngikel ocholt a kngtil e choridii er ngii, a mo nguu a klechubechub er a Dios.”—Osisechakl 28:13.
-
Sel klou a ultutelel a doruul a soal a Dios.
A Biblia a kmo: A “RUBAK a ouketui er a re chad el meruul a mekngit, e bai kmeed er a re melemalt.”—Osisechakl 3:32.
A Karina el 20 a rekil a dimlak el losubed er a demal el kirel a ticket el lengiluu. Engdi ngdimlak el sebechel el melemolem el omart er ngii el diak a ulebengelel. Me a Karina a dilu el kmo, “A uriul er a ta el rak, e a demak a miltik er a ticket el llechukl a ngklek er ngii. Me ak kmal mlo chebuul!”
Me ngera ngsilubii? A Karina a dmu el kmo: “Ngdi mo uchul a klou el mondai a lsekum e ngdiak mouchais er a tekoi el mrirellii. Kedi mo chelebangel a telemellel er a uriul!”
A ROLEL E KEDE NGMAI A KLUBELED ER A CHELEUID EL DURRUUL
A Biblia a kmo: “Kede rokui el blechoel el mo e mecheuid a omerelled.” (Jakobus 3:2) Me kede medengei el kmo, ngolechotel a klengariourreng sel dekengei el kmo kede mlo cheleuid a omerelled, e di mereched el meklemeltid.
A ta er a rolel a omoruul er ngii a mo ngmai a klubelem er a cheleuid el mriruul. A redil el ngklel a Vera a dmu el kmo: “Ak melasem el melai a klubelek er a cheleuid el krirellii me ngosukak el lmuut el mo ungil chad, e mo meduch el mesmechokl er ngii sel luut el mo duubech.” Me bo desa el kmo ngmekerang a omoruul er tiang.
Ke longir a rrat er a obekum e tomellii. Me ke mo mekerang?
-
Ngdiak mouchais e omdasu el kmo ngdiak bo lodengei.
-
Subedii er a tekoi el dilubech.
-
Subedii e otelecheklii a ta er a chad.
Ke mle fail er a test e le kau el dimlak mosuub. Me ke mo mekerang?
-
Ke oltelechakl er a test.
-
Ke kongei el kmo ngtelemellem a uchul me ke mle fail.
-
Ke oltelechakl er a sensei er kau el kmo ngar er ngii a chetil er kau.
Chelechang e momes aike el tekoi el dilubech, e molatk el kmo oleko ke (1) obekum me a lechub (2) e ke sensei. Ngmo uangera uldesuel a obekum me a sensei er kau a lsekum e ke ouchais a klemerang? Ngmo uangera uldesuir a lsekum e ke omart a cheleuid el omerellem?
Molatk er a ta er a cheleuid el omeruul el mrirellii er tia el mlo merek el rak e monger aika el ker el beldukl er iou.
Ngera sel mle cheleuid el mrirellii? Ke milekerang e sumecheklii?
-
Ngdimlak kuuchais.
-
Ak ultelecheklii a ta er a chad.
-
Ak uluuchais.
A lsekum e ngdimlak mouchais er a cheleuid el mrirellii, e ngmlo uangera uldesuem er uriul?
-
Ngkmal lungil—Ngmlo sebechek el mengubet er ngii!
-
Ngchuarm a uldesuek—Ngbai mle kirek el ouchais a klemerang.
Ngmekera e sebechem el rullii a tekoi el mo ungil?
Ngera ke siluubii er a cheleuid el omerellem?
NGERA ULDESUEM?
Ngera me a rebebil a omart a cheleuid el omerellir?
Ngmo uangera uldesuir a rechad a lsekum e ke blechoel el omart a cheleuid el omerellem, e kuk mo uangera uldesuir a lsekum ke ouchais a cheleuid el omerellem?—Lukas 16:10.