Caipi yuyai: Toni shutica pelotahuanmi paipaj amigocunahuan pugllacun ñapish panda jaitashpami vecinopaj carropaj vidriota pꞌaquin.

¿Can Toni cashpaca imatataj ruranguiman?

¿MAIJANTATAJ AGLLANGUIMAN?

1. Miticushpa rina.

2. Shujtajcunata juchachina.

3. Vidriotaca ñucami pꞌaquircani pagashallami nishpa vecinoman huillana.

Miticushpa rinatachari yuyangui. Shinapish imapi pandarishpaca ima cajpipish huillanami cangui.

1. Alli cashcamanta.

   Bibliapica: Tucui imapish alli llujshichunca honrado cashunchij ninmi (Hebreos 13:18, Traducción del Nuevo Mundo).

2. Huillajpica pandarishcacunata perdonangachari.

   Bibliapica: “Juchacunata pacaj runaca, mana alli causai tucungachu. Ashtahuanpish tucuita huillashpa, chai juchacunata saquijca, Taita Dios llaquishcami o perdonashcami canga.” ninmi (Proverbios 28:13, QC, 1989).

3. Jehová Diostami cushichingui.

   Bibliapica:“Mandaj Diosca millaita rurajtaca, manataj ricunachinchu. Ashtahuanpish cashcata rurajcunahuanca, tandallami causan” ninmi (Proverbios 3:32).

Karinaca 20 huatacunatami charin. Paitaca yallitaj utca manejashpa ricushcamantami multarcacuna. Multashcataca paipaj yayamanca mana huillarcachu. Pacasha nijpipish shuj huata qꞌuipaca chai multata charishcatami yayaca yachaj chayarca. Chaimantami Karinaca: “¡Imamantataj mana huillarcani!” nirca.

¿Chaimantaca imatataj yachai tucungui? Karinaca: “Pandarishcata pacashpaca ima horapish llaquicunataca charinguitajmi” ninmi.

Bibliapica: “Tucuicunami achca cutin pandarinchij” ninmi (Santiago 3:2). Pandarishcacunata huillashpaca mana jatun tucushca cashcata, allita ruraj cashcatapishmi ricuchingui.

Catij yuyaipica pandarishcacunamanta yachai tucushcatami ricuchin. Marta shuti solteraca: Pandarishpaca ña mana chaillatataj cutin ruranichu ninmi. Imapi pandarishpapish shujtaj rato ama chashnallataj rurangapajmi ayudan: “Shujtaj punlla imata ruragrishpaca alli yuyashpami rurasha” ninmi. ¿Catij yuyaicunamantaca maijantataj agllanguiman?

Cambaj huauqui, bicicletata mañachijpi dañashpaca ¿imatataj ruranguiman?

• Mana ricungachu nishpachu upalla saquiringuiman.

• Imamanta dañashcatachu tucuita huillanguiman.

• Shujtajtachu juchachinguiman.

Shuj examenta cushpa mana estudiashcamanta mana alli notata llujchishpaca ¿imatataj ninguiman?

• Examenca sinchimi carca ninguimanchu.

• Mana estudiashcamantami mana alli notata llujchircani ninguimanchu.

• Profesormi ñucataca mana ricunayachin ninguimanchu.

 Cunaca caita rurai: puntapica can yaya cashcapi yuyai, qꞌuipaca can profesor cashcapi yuyai. Ñuca mana estudiashcamantami mana alli notata llujchircani nishpa huillajpica ¿imatashi paicunaca yuyangacuna? ¿Llullashpa huillajpica paicunaca imatashi yuyangacuna?

¿Cai huataca imapi pandarishcanguichu? Chaicunata yuyarishpa cai tapuicunata cutichi:

¿Imapitaj pandarircangui? ¿Imatataj rurarcangui?

• Mana huillarcanichu.

• Shujtajcunatami juchachircani.

• Chai ratomi huillarcani.

¿Pandarishcata mana huillashpaca ima shinataj sintirircangui?

• Mana yachaj chayashcamantami alli sintirircani.

• “Huillanami carcani” nishpami mana alli sintirircani.

¿Imata ruranataj ashtahuan alli canman carca?

¿Chashna pandarishcamantaca imatataj yachashcangui?

¿Huaquinpica imamantataj pandarishcacunata mana huillasha ningui?

¿Pandarishcacunata pacashpa mana huillajpica imatashi gentecunaca canmanta yuyangacuna? ¿Pandarishpapish huillajpica imatataj gentecuna canmanta yuyangacuna? (Lucas 16:10).