Замислин туке акаја ситуација: Џикоте кхелела пе амаленцар, о Роберти фрдела и топка хем пхагела о џами таро е комшијаскоро врда.

Те ове сине е Робертеске ко тхан, со ка кере сине ту?

ИСИ ТУТ ТРИН ОПЦИЕ:

1. А. Те наше.

2. Б. Те чхиве упро јавересте и беља.

3. В. Те вакере со уло хем те пхене кај мангеа те платине и штета.

Шај ка ове ко искушение те бирине и опција А. Ама, секогаш тано шукар те пхене тле грешке, бизи разлика дали пхагљан џами или керѓан несави јавер беља.

1. Адава тано исправно те керел пе.

   Ки Библија пишинела: „Мангаја ко са о буќа те постапина чесно“ (Евреите 13:18).

2. О јавера ка овен поспремна те простинен туке.

   Ки Библија пишинела: „Кој гаравела пле лошна постапке, нане те овел ле успех, а окова со признајнела лен хем на керела лен понадари, ка сикавел пе леске милост“ (Изреки 28:13).

3. Сар најважно, адава радујнела е Јехова.

   Ки Библија пишинела: „Е Јеховаске тане одвратна о нечесна мануша, а паше тано околенцар сој тане праведна“ (Изреки 3:32).

И Карина (20) мангља те гаравел пле дадестар и казна со добинѓа ла адалеске со бут сигате возинѓа. Ама, адава нашти сине те гаравел ле вечно. И Карина вакерела: „Пало јекх берш, мло дад аракхља мли казна. Адалеа, керѓум манге панда побаре проблемија“.

Со сикљоваја таро акава? И Карина вакерела: „Кеда гаравеа тле грешке кереа туке побаре проблемија. Кога-тогаш ка овел тут последице таро адава“.

И Библија вакерела: „Сарине амен бут пути грешинаја“ (Јаков 3:2). Ама сар со дикхлем, ако одма признајнаја амаре грешке, сикаваја кај сием зрела хем понизна мануша.

Бут тано важно те сикљове таро тле грешке. Јекх чхај која со викинела пе Вера вакерела: „Трудинава ман тари секоја мли грешка те сикљовав сар те овав пошукар личност хем сар те постапинав ако палем овава ки слично ситуација“. Сар шај те сикљове таро тле грешке? Те дикха.

Лељан те дадескоро точако ама руминѓан ле. Со ка кере?

• Ка чутине, мислиндор кај тло дад нане те осетинел ништо.

• Ка вакере леске точно со уло.

• Ка вакере леске со уло, ама тли грешка ка префрлинела јавереске.

Добинеа единица ко тести адалеске со на астарѓан лил ко вас. Со ка кере?

• Ка пхене кај о тести сине пхаро.

• Ка признаине кај коркори сиан туке криво баши тли оценка.

• Ка пхене: „О професори леља ман ко накх“.

 Акана, палем иран тут ко акала ситуацие хем замислин туке кај ки прво ситуација ту сиан о дад, а ки дујто сиан о професори. Со ка мислинен баши туте тло дад хем о професори ако спремно признаинеа тле грешке? Со ка мислинен баши туте ако гаравеа о грешке?

Акана сетин тут ки несави грешка со керѓан ла окова берш, хем одговорин ко акала пучиба.

Сави грешка керѓан? Со керѓан пало адава?

• На пхенѓан никаске.

• Чхивѓан и беља упри јавересте.

• Одма признајнѓан.

Ако на пхенѓан и грешка, сар осетинѓан тут?

• Чутин, спасинѓум ман!

• Мучинела ман сине мли совест, на сиум сине искрено.

Со шај сине те кере пошукар ки акаја ситуација?

Со сиклиљан тари тли грешка?

Соске несаве манушенге тано пхаро те признајнен пле грешке?

Со ка мислинен о јавера баши туте ако секогаш гаравеа тле грешке? А со ка мислинен о јавера ако признајнеа лен? (Лука 16:10).