Asewucabange nganasi simo: Sandile wafelwa lifasitelo lamakhelwane ngesikhatsi adlala ibhola nebangani bakhe.

Yini lobewungayenta kube bewunguSandile?

UNGAKHETSA KWENTA KUNYE KULOKU LOKUTSATFU:

1. Kubaleka.

2. Kusola lomunye.

3. Kuchazela makhelwane loko lokwentekile futsi utimisele kwemukela sijeziso.

Kungenteka ukhetse indlela A. Kodvwa ngaso sonkhe sikhatsi, kukahle kuvuma emaphutsa ngisho nobe afaka ekhatsi kubulala lifasitelo nobe kwenta lokunye.

1. Kuyintfo lenhle lokufanele siyente.

   LiBhayibheli litsi: “Sifisa kutiphatsa ngekwetsembeka kuto tonkhe tintfo.”—Hebheru 13:18.

2. Imvamisa bantfu bayamcolela umuntfu lowavumako emaphutsa akhe.

   LiBhayibheli litsi: “Umuntfu lofihla tono takhe angeke aphumelele; kodvwa lotivumako atishiye uyawutfola umusa”—Taga 28:13.

3. Lokubaluleke kakhulu kutsi kuyamjabulisa naNkulunkulu.

   LiBhayibheli litsi: “Ngobe umuntfu losidlova usinengiso kuSimakadze, kodvwa labalungile balitsemba lakhe.”—Taga 3:32.

Karina loneminyaka lengu-20 wetama kufihlela babe wakhe lithikithi lekugijimisa kakhulu imoto. Kodvwa akazange alifihle unomphela. Karina utsi: “Ngemuva kwemnyaka babe walitfola lelithikithi libhalwe ligama lami. Ngangena kulenkhulu inkinga!”

Ngusiphi sifundvo lasitfola? Karina utsi: “Kufihla emaphutsa kwenta simo sibe sibi kakhulu. Nangemuva kwesikhatsi, uyayitfola imiphumela yawo!”

LiBhayibheli litsi: “Sonkhe siyona tikhatsi letinyenti.” (Jakobe 3:2) Njengoba sesibonile, kusheshe siwavume emaphutsa kukhombisa kuvutfwa nekutfobeka.

Ngemuva kwekuwavuma kufanele bese uyafundza emaphutseni akho. Intfombatane ligama layo lekunguVera itsi: “Emaphutsa ami ngetama kuwatsatsa njengesifundvo lesingisita kutsi ngibe ngumuntfu loncono futsi ngikhone kwenta tintfo ngendlela leyehlukile esikhatsini lesitako.” Asesibone kutsi loko ungakwenta njani.

Asesitsi uboleka libhayisikili lababe wakho bese liyakulimalela. Yini-ke lesekufanele uyente?

• Ungabindza yini ungasho lutfo wetsembe kutsi babe wakho angeke alibone?

• Ungamtjela lonkhe liciniso yini?

• Ungamtjela konkhe lokwentekile yini kodvwa bese ubeka lomunye licala?

Mhlawumbe wehlulwe sivivinyo esikolweni ngoba bewungakadadishi kahle. Yini longayenta?

• Ungasola lesivivinyo?

• Ungavuma kutsi nguwe loneliphutsa ngekwehluleka?

• Ungasola thishela wakho ngekutsi akakutsandzi?

 Asewubuyele kuletimo lesesicoce ngato uticabange (1) ungubabe wakho (2) unguthishela wakho. Ucabanga kutsi babe wakho nathishela wakho bangacabangani ngawe nangabe uwavuma emaphutsa akho? Bangatsini nje ngawe nangabe uwafihla emaphutsa akho?

Nyalo-ke asewucabange ngeliphutsa lolente emnyakeni lowengcile bese uphendvula lemibuto lelandzelako.

Nguliphi liphutsa lowalenta? Wenta njani ngalo?

• Ngalifihla.

• Ngasola lomunye umuntfu ngalo.

• Ngalivuma ngenhlitiyo yonkhe.

Nangabe wehluleka kuvuma leliphutsa lakho, wativa njani ngemuva kwaloko?

• Ngajabula—Ngendlula kulo!

• Ngatisola—Kube mane ngakhuluma liciniso.

Nguyiphi indlela lencono lebewungenta ngayo kulesimo?

Ufundzeni kuleliphutsa lakho?

Yini leyenta labanye bantfu bangatsandzi kuvuma emaphutsa abo?

Bantfu batawucabangani ngawe nangabe ngaso sonkhe sikhatsi wena uyawafihla emaphutsa akho, futsi batawutsini ngawe nangabe uwavuma?—Lukha 16:10.