Kěnang pẹ̌pikirẹ̌ ini: Su tempong něnalang dingangu hapị e, i Tim němaling balẹ̌, kụ nahino su kaca oto lampunge.

Mạeng i kau nakoạ i Tim, apa sarung koatengu?

PIẠ TATĚLU BOTONGE KOATENGU:

1. Tumal᷊ang.

2. Maul᷊ị taumata wal᷊inẹ nẹ̌sal᷊a.

3. Maul᷊ị su lampung apa seng nariadi, kụ maul᷊ị hědo gantiang.

Ěndịu i kau mapulu měmile bageang A. Katewe, piạ alasang mapia mạeng i kau mengaku pẹ̌sasal᷊anu—měnsang ene i kau nakaběka kaca arau někoạ barang nẹ̌sal᷊a wal᷊inẹ.

1. Ene kakanoạ mapaelẹ̌.

   Alkitapẹ̌ naul᷊ị, ”I kami e sidutu mang měkoạ ene . . . tuhụ ewe katul᷊ide.”—Ibrani 13:18.

2. Taumata mapulu měgělị ampung si saing apang mengaku barang nẹ̌sal᷊a nikoạ e.

   Alkitapẹ̌ naul᷊ị, ”I sai měmẹ̌muning dosane sarung tawe mẹ̌barạuntu. I sai mạngakung dosane ringangu maněntangu ene, sarung kěndageng u Mawu.”—Baweran Salomo 28:13.

3. Něngělembong penting, ene makal᷊uasẹ̌ naung u Mawu.

   Alkitapẹ̌ naul᷊ị, ”Mawu mẹ̌bẹ̌binsị u taumata mẹ̌kẹ̌koạ dal᷊akisẹ̌ kaiso i Sie kawe hapị mapia su taumata kụ pẹ̌bawiahe matul᷊idẹ̌.”—Baweran Salomo 3:32.

I Karina, 20 su taunge, němuni surat tilang bọu i papạ e. Katewe, i sie nikasingkateng karạ i papạ e. ”Pira taung bọu ene,” Karina naul᷊ị, ”papạku nakasilo surat tilang ene. I papạ pědu-pědu si siạ!”

Apa těntirone? Karina naul᷊ị, ”Mạeng i kau marěmasẹ̌, tawe maul᷊ị barang nẹ̌sal᷊a seng nikoạ u, masalah ene makoạ gěguwạ. Pěngěnsuenge i kau harusẹ̌ bertanggung jawab!”

Alkitapẹ̌ naul᷊ị, ”I kitẹ kěbị masau . . . ’mẹ̌bal᷊insuhu’, arau měkoạ pẹ̌sasal᷊a.” (Yakobus 3:2) Mạeng i kitẹ mengaku, ene něnodẹ i kitẹ taumata matělang dingangu naung masanạ.

Bọu ene, měngěndung bọu pẹ̌sasal᷊a nikoạu. Sěngkatau anạ wawine arenge i Vera, naul᷊ị, ”Iạ němanda pẹ̌sasal᷊aku ini nakoạ sěmbaụ tatěntiro tadeạu tawe saụ měkoạ ene, kụ ene lai makatul᷊ung si siạ makoạ taumata mapia. Mạeng mahi piạ situasi mẹ̌sul᷊ung, caraku tumatěngo situasi ene seng nẹ̌tatěntang bọu humotong.” Mahi i kitẹ měmanda kere apa i kau botonge měkoạ ene.

I kau něngědang sepeda si papạ u, kụ i kau nakarusa ene. Apa sarung koatengu?

• Tawe maul᷊ị si papạ u, kụ měharapẹ̌ i sie tawe makasingkạ.

• Maul᷊ị apa sebenarẹ̌e nariadi.

• Mẹ̌běke si papạ, katewe maul᷊ị taumata wal᷊inẹ nẹ̌sal᷊a.

Nilai ujian u masanạ ual᷊ingu i kau tawe něngěndung. Apa sarung koatengu?

• Maul᷊ị ujian ene tawe gampang.

• Mẹ̌tanggung jawab ual᷊ingu i kau nakaěbạ nilai masanạ.

• Maul᷊ị guru mawěnsing si kau.

 Kěnang saụ pěmanda situasi ene, kụ pikirẹ̌ mạeng i kau makoạ (1) papạ u dingangu (2) gurunu. Apa sarung pẹ̌pikirang i papạ u dingangu gurunu mạeng i kau mengaku někoạ barang nẹ̌sal᷊a? Apa pẹ̌pikirang i sire mạeng i kau měmuni barang nẹ̌sal᷊a ene?

Kěnang pẹ̌pikirẹ̌ barang nẹ̌sal᷊a seng nikoạu su sěntaung nal᷊iu, kụ simbahe kakiwal᷊o ini.

Barang nẹ̌sal᷊a apa seng takụ nikoạ, kụ kerea iạ tumatěngo hal᷊ẹ̌ ene?

• Měmuni ene.

• Maul᷊ị taumata wal᷊inẹ nẹ̌sal᷊a.

• Iạ mengaku barang nẹ̌sal᷊a nikoạku.

Mạeng i kau tawe mengaku barang nẹ̌sal᷊a nikoạu, kerea pěndangu?

• Mal᷊uasẹ̌—Tawẹ apa taumata masingkạ apa seng takụ nikoạ!

• Nẹ̌sasěsilẹ̌—Ěngkedung iạ naul᷊ị apa sebenarẹ̌e nariadi.

Kere apa i kau botonge tumatěngo hal᷊ẹ̌ ene pakapia?

I kau něngěndung apa bọu barang nẹ̌sal᷊a nikoạu?

Kawe nụe pirang katau mạdiri mengaku barang nẹ̌sal᷊a seng nikoạ i sire?

Apa pẹ̌pikirang taumata wal᷊inẹ mạeng i kau masau měmuni barang nẹ̌sal᷊a nikoạu, katewe, mạeng i kau mengaku barang nẹ̌sal᷊a seng nikoạu, apa pẹ̌pikirang i sire?—Lukas 16:10.