Imajina toʼok situasaun neʼe: Bainhira Timóteo halimar bola ho ninia kolega sira, nia tebe sala no halo rahun ema nia karreta nia vidru.

Se ó mak iha Timóteo nia situasaun, saida mak ó sei halo?

Ó BELE HILI IDA HUSI OPSAUN TOLU TUIRMAI NEʼE:

1. Halai kedas.

2. Duun fali ema seluk.

3. Esplika ba karreta nia naʼin kona-ba buat neʼebé akontese, no dehan ba nia katak ó prontu atu fó osan hodi hadiʼa fali vidru neʼe.

Karik ó hakarak hili Opsaun A. Maibé diʼak atu sempre rekoñese sala naran deʼit neʼebé ó halo ona, maski neʼe mak estraga vidru ka buat seluk.

1. Tanba neʼe mak hahalok neʼebé loos.

   Bíblia dehan: “Ami hakarak atu hatudu laran-moos iha buat hotu.”—Ebreu 13:18.

2. Tanba se ó rekoñese ó-nia sala, neʼe halo fasil ba ema seluk atu fó perdua ba ó.

   Bíblia dehan: “Ema neʼebé subar ninia sala sei la hetan susesu, maibé ema neʼebé fó sai no husik tiha ninia sala sei hetan laran-sadiʼa.”—Provérbios (Amsal) 28:13.

3. Importante liu mak, tanba neʼe halo Maromak kontente.

   Bíblia dehan: “Jeová hakribi ema neʼebé laran-makerek, maibé nia sai belun neʼebé besik ho ema laran-loos.”—Provérbios (Amsal) 3:32.

Feto joven ida ho tinan 20 iha Estadus Unidus, naran Karina. Nia lori karreta no halai makaʼas, ikusmai polísia kaer nia no fó surat atu selu multa. Maibé Karina subar deʼit surat neʼe iha uma laran. Nia dehan: “Liutiha tinan ida, haʼu-nia apá haree surat neʼe, no nia fó dixiplina makaʼas mai haʼu!”

Saida mak Karina aprende? Nia dehan: “Subar ita-nia sala, neʼe sei halo situasaun sai aat liután, ikusmai ita sei simu konsekuénsia!”

Bíblia dehan: “Ita hotu halo sala dala barak.” (Tiago 3:2) Hodi rekoñese kedas ita-nia sala, neʼe hatudu katak ita mak ema neʼebé haraik-an, no ema neʼebé bele tau fiar.

Tuirmai mak aprende husi ita-nia sala. Feto joven ida naran Veronica hatete: “Bainhira haʼu halo sala ruma, haʼu koko atu aprende buat ruma husi ida-neʼe. Neʼe ajuda haʼu atu hadiʼa haʼu-nia an no hatene oinsá atu hasoru situasaun hanesan neʼe iha tempu seluk.” Oinsá mak ita bele halo nuneʼe?

Ó empresta ó-nia apá nia motór, maibé tanba ó la kuidadu, ikusmai motór neʼe monu no hetan fitar. Ó sei halo saida?

• Nonook deʼit, karik apá sei la nota fitar neʼe.

• Fó-hatene no esplika ho loloos ba apá.

• Fó-hatene ba apá maibé duun fali ema seluk.

Tanba ó la estuda, ó hetan valór kiʼik bainhira ezame, ikusmai ó la pasa. Saida mak ó sei halo?

• Hatete katak ezame neʼe susar demais.

• Rekoñese katak neʼe mak ó-nia sala.

• Hatete katak mestre sira la gosta ó.

 Agora, imajina toʼok katak iha situasaun rua neʼe, ó mak (1) ó-nia apá no (2) ó-nia mestre. Se ó rekoñese kedas ó-nia sala, ó-nia apá no ó-nia mestre sei hanoin saida kona-ba ó? Se ó la rekoñese ó-nia sala, sira sei sente oinsá?

Tuirmai, hanoin toʼok kona-ba sala neʼebé ó halo ona durante tinan ida liubá. Hatán ba pergunta tuirmai neʼe:

Sala saida mak ó halo ona? Tuirmai, ó halo saida?

• Haʼu subar tiha haʼu-nia sala.

• Haʼu duun fali ema seluk.

• Haʼu rekoñese kedas haʼu-nia sala.

Bainhira ó la rekoñese kedas ó-nia sala, saida mak ó sente?

• Kontente—Tanba ema ida la hatene haʼu-nia sala!

• Sente la diʼak—Tanba diʼak liu haʼu fó sai kedas haʼu-nia sala.

Tuir loloos, saida mak ó tenke halo iha situasaun neʼe?

Saida mak ó aprende husi sala neʼe?

Tanbasá mak ema balu dada an atu rekoñese sira-nia sala?

Se ó subar beibeik sala neʼebé ó halo ona, ema seluk sei hanoin saida kona-ba ó? Se ó rekoñese kedas ó-nia sala, ema sei hanoin saida kona-ba ó?—Lucas 16:10.