Koezyeezya bukkale oobu: Ciindi Tim nasobana abeenzinyina, wawaala bbola mpoonya wapwaya windo kuŋanda yabantu.

Ikuti kolinduwe Tim, ino inga wacita buti?

KULI ZINTU ZYOTATWE NZYOKONZYA KUSALA KUCITA:

1. Kutija.

2. Kutamikizya mweenzyoko.

3. Kuyoolyaambilila kuli balaaŋanda, alimwi akubaambila kuti uyanda kubbadela mulandu.

Ulakonzya kuba amuzeezo wakutobela Nzila ya A. Pele lyoonse, cilagwasya kapati kuzumina ikuti naa walubizya—kunyina makani naa kulubizya ooko kujatikizya kupwaya windo naa cintu cimwi buyo.

1. Nceciluzi kucita.

   Bbaibbele lyaamba kuti: “Tuyanda kuti katusyomeka muzintu zyoonse.”—Bahebrayo 13:18.

2. Kanji-kanji bantu balekelela baabo ibazumina kuti naa balubizya.

   Bbaibbele lyaamba kuti: “Ooyo uusisa zinyonyoono zyakwe takoozwidilila pe, pele kufwumbwa uulyaambilila akuzileka ulafwidwa luse.”—Tusimpi 28:13.

3. Kwiinda zyoonse, cilamukkomanisya Leza.

   Bbaibbele lyaamba kuti: “Nkaambo muntu mumpelenge ncisesemyo kuli Jehova, pele balulami mbabajisi cilongwe ciyumu anguwe.”—Tusimpi 3:32.

Karina, uujisi myaka yakuzyalwa iili 20, wakasoleka kusisa kapepa kamulandu wakulundusya mootokala kuli bausyi. Pele tiicakali kukonzyeka kuti inga wazumanana kukasisa lyoonse. Karina wakaamba kuti: “Nokwakainda mwaka omwe, bataata bakakabona kapepa kamulandu wakulundusya mootokala ikakalembedwe zina lyangu. Bakandinyemena kapati!”

Twiiya nzi? Karina wakaamba kuti: “Kusisa ikuti naa walubizya kupa buyo kuti zintu ziindile kubija. Nolilampa buti uyakusubulwa!”

Bbaibbele lyaamba kuti: “Toonse tulalubizya ziindi zinji.” (Jakobo 3:2) Alimwi kweelana ambotwabona, citondezya kulicesya alimwi akusima kuti kofwambaana kuzumina ikuti naa walubizya.

Citobela nkwiiya kuzintu nzyolubizya. Musimbi wazina lyakuti Vera wakaamba kuti: “Ndilasoleka kubona ncondiiya kukulubizya kumwi akumwi ambokundigwasya, kuba muntu uuli kabotu alimwi akuti nditakaciinduluki kabili cintu eeco.” Atubone mbokonzya kucita oobo.

Walomba ncinga yabauso kumane waijaya. Ino ulacita buti?

• Kutaamba cili coonse akupailila kuti bausyo batazyibi.

• Kubaambila bauso zyoonse izyacitika.

• Kubaambila bauso izyacitika mpoonya akutamikizya muntu umbi.

Wafeela musunko kucikolo nkaambo tonookali kubala. Ino ulacita buti?

• Ulatongooka kuti musunko tiiwali kabotu.

• Ulazumina kuti wafeela akaambo kakutabala.

• Ulaamba kuti baiyi bakufeezya nkaambo tabakuyandi.

 Lino kolanga twaambo itwabandikwa atala aawa alimwi akuyeeyela kuti nduwe (1) bauso (2) bayi bako. Ino bauso alimwi abayi bako inga bakubona buti kuti wafwambaana kuzumina kuti ulilubizyide?Ino inga bakubona buti ikuti wakaka kuti ulilubizyide?

Lino koyeeya ncookalubizya mwaka wamana mpoonya wiingule mibuzya iitobela.

Ncinzi ncookalubizya? Ino wakacita buti?

• Ndakasisa.

• Ndakatamikizya muntu uumbi.

• Ndakazumina cakufwambaana.

Kuti tonookazumina kuti wakalubizya, ino waalimvwa buti nokwakainda ciindi?

• Yaa cabota—Ndabacenga!

• Kulimvwa bubi—Nindaamba buyo masimpe.

Ino ninzila nzi mbotu njookali kukonzya kubelesya mubukkale oobu?

Ino ncinzi ncookayiya kukulubizya ooku?

Ino nkaambo nzi bantu bamwi ncobatazumini kuti balubizya?

Ino bantu banookubona buti ikuti lyoonse kosola kusisa noolubizya, pele ino banookubona buti kuti kozumina noolubizya?—Luka 16:10.