Yeeya eezi: Lweendo ulikuuma bbola abeenzinyina mpawo bbola lyawuma windo lyamoota yabasimayakilane babo.

Kaansinga nduwe Lweendo, walikunoochita biyeni?

ULAKONZYA KUSALA NZILA ZITATU:

1. Kuchija.

2. Kutamikizya bamwi.

3. Kubuzya simayakilane zyachitika akuti ulakonzya kubbadala.

Ulakonzya kusala A. Pesi kuzumina mulandu kuli kabotu nikuba kuti wajaya windo naakuti wachita chimwi chintu. Kuyeeya chibi nchwakachita chiindi, kuli mbuuli kulanga aagilazi lyamoota litondeezya zintu zilikuchitika musule kumwi kulikweenzya moota.

1. Kulikabotu kuzumina mulandu.

   Bbayibbele lyaamba kuti: “Tuyanda kuti tululame, tubule akampenda.”—BaHebrayo 13:18.

2. Bantu biingi balabalekelela bantu bazumina mulandu.

   Bbayibbele lyaamba kuti: “Uusisa milandu yakwe [takoozwidilila, NW] pe, pele oyo uulyaambawida akuleka ulafwidwa luzyalo.”—Tusimpi 28:13.

3. Kwiinda zyoonse, kupa kuti Leza abotelwe.

   Bbayibbele lyaamba kuti: ‘Muntu uupilingene ulasesemya Jehova, baluleme mbibeenzinyina baLeza.’—Tusimpi 3:32.

Musimbi utegwa Alumbwe wakali kweezya kusisila wisi tikiti lyakweenzya moota munzila iitali kabotu. Pesi zyakazoozwa antanganana. Alumbwe wakaamba kuti “Nikwakiinda munyaka ndeende wakalibona tikiti eelyo kalilembedwe zina lyangu. Eezi zyakandinjizya mumapenzi.”

Twiiyaanzi? Alumbwe wakati: “Kusisa mulandu kupa kuti zintu zyiindilile kubija. Nkaambo kuti kwayinda chiindi zizooboneka.”

Bbayibbele lyaamba kuti: ‘Toonse tulabisya ziindi zyiingi.’ (Jakobo 3:2) Twabona kuti kuzumina mulandu kutondeezya kuti ulalibombya akuti wakomena alubo weelede kuchita oobo chakufwambaana.

Chimwi chikonzya kukugwasya nkwiiya kuzwa kukubisya kwako. Musimbi utegwa Luumuno wakaamba kuti: “Ndileezya kwiiya kuzwa kukubisya kwangu alubo zilandigwasya kuti ndibe muntu uulikabotu akuti nditazooyindululi nzindakachita.” Atubone mbukonzya kuzichita eezi.

Kujana wachita biyeni kuti wakumbila nchinga yandeendaako mpawo yadunsuka ncheni?

• Ulawumuna akuyeeya kuti ndeendaako takoobona zyachitika.

• Ulabuzya ndeendaako zyachitika.

• Ulabuzya ndeendaako zyachitika mpawo utamikizye umwi muntu.

Kujana wachita biyeni kuti wafeela kuchikolo akaambo kakutabala?

• Ulaamba kuti zyakali ziyumu.

• Ulazumina kuti teewakabala.

• Ulatamikizya muyiisi kuti nguwe wakapa kuti ufeele.

 Atuteedi nduwe wali muyiisi naakuti ndeendaako walikunoochita biyeni muchiimo chili boobo? Muyiisi andeendaako balikunoomvwa biyeni kuti wazumina mulandu wako? Balikunoomvwa biyeni kuti watamikizya bamwi?

Lino yeeya chimwi chintu nchwakabisya mumunyaka wayinda mpawo usandule mibuzyo iitobela.

Wakabisizyeenzi? Wakachita biyeni?

• Ndakawumuna.

• Ndakatamikizya bamwi.

• Ndakazumina chakufwambaana.

Kuti teewakazumina mulandu wakazoomvwa biyeni?

• Ndakabotelwa nkaambo taakwe wakaziba.

• Ndakalisola kuti kaansinga ndakaamba choonzyo.

Wakeelede kuchita biyeni?

Wakayiyaanzi kuzwa kukubisya kwako?

Nkamboonzi bamwi bantu nibatazumini kuti babisya?

Ubonaanga bantu balakubona biyeni kuti kukaka mulandu wako naakuti wazumina?—Luka 16:10.