Feruri na i teie tupuraa: A hauti ai e to ˈna mau hoa, taue aˈera Timi i te hoê popo a parari atu ai te hiˈo pereoo o te hoê taata tapiri.

O oe aˈe o Timi, eaha ta oe e rave?

E TORU RAVEA TA OE:

1. Horo.

2. Pari i te tahi atu.

3. Faaite i te taata tapiri i tei tupu a parau atu ai e e aufau oe i te hiˈo parari.

E hinaaro paha oe e maiti i te Ravea 1. Mea maitai râ ia farii i ta oe mau hape, no te hoê hiˈo parari aore ra te tahi atu mea.

1. Tera te mea maitai e rave.

   Te parau ra te Bibilia: “Ei haapao maitai ta matou i te mau mea atoa nei.”—Hebera 13:18.

2. E pinepine te taata i te faaore i te hapa o te feia e farii e ua hape ratou.

   Te parau ra te Bibilia: “O tei tapoˈi i ta ˈna hara, e ore ïa e maitai; o tei faˈi râ e ua faarue, e arohahia ïa.”—Maseli 28:13.

3. Te mea faufaa aˈe, e oaoa te Atua.

   Te parau ra te Bibilia: “Mea faufau hoi na Iehova te feia mârô ra [aore ra piˈo], tei te feia parau-tia ra ta ˈna parau moe.”—Maseli 3:32.

Ua tamata Karina, e 20 matahiti, i te tahuna i to ˈna papa te parau faautuaraa no te faahoro-vitiviti-raa i te pereoo. Eita râ ta ˈna e nehenehe e na reira noa. Te na ô ra Karina: “Fatata hoê matahiti i muri iho, ua ite to ˈu papa i te hoê parau faautuaraa i to ˈu iˈoa. Ua fifihia vau!”

Te haapiiraa? Te parau ra Karina: “E rahi atu â te fifi ia huna oe i te tahi hape. E amo iho â oe i te hopoia!”

Te na ô ra te Bibilia: “Te hapa nei hoi tatou atoa i te mau mea atoa e rave rahi.” (Iakobo 3:2) A farii i ta oe mau hape, e a na reira oioi. E tapao faaite te reira o to oe haehaa e to oe paari.

E tia atoa ia haapii mai i ta oe mau hape. Te na ô ra te tahi tamahine o Vera te iˈoa: “E faaitoito vau i te huti mai i te haapiiraa i te hape taitahi ta ˈu e rave nei. E tauturu mai te reira ia riro ei taata maitai aˈe e ia ore e rave i te hoê â hape.” E hiˈo anaˈe e nafea oe e na reira atoa ˈi.

E rave oe i te pereoo tataahi o papa a ino atu ai te reira. Eaha ta oe e rave?

• Eita oe e faaite atu a tiaturi atu ai e eita papa e ite.

• E faataa ia papa eaha tei tupu.

• E faataa ia papa eaha tei tupu a pari atu ai i te tahi atu.

Aita oe i manuïa i te tahi hiˈopoaraa no te mea aita oe i hiˈo faahou i tei haapiihia. Eaha ta oe e rave?

• E faahape i te hiˈopoaraa.

• E farii e na oe te hape.

• E parau e aita te orometua i au ia oe.

 I teie nei, e rave anaˈe i teie na aamu a tamata atu ai i te feruri e o oe (1) o papa e (2) ta oe orometua. Eaha te manaˈo o papa e o ta oe orometua ia farii oioi oe i ta oe mau hape? Eaha ta raua e manaˈo ia huna oe i ta oe mau hape?

A feruri na i teie nei i te hoê hape ta oe i rave i te matahiti i mairi e a pahono i teie mau uiraa.

Eaha te hape? Ua nafea oe?

• Ua huna vau i te reira.

• Ua faahape au i te tahi atu.

• Ua farii oioi au i te reira.

Mai te peu e aita oe i farii i ta oe hape, eaha to oe huru i muri iho?

• Maitai—Aita vau i fifihia!

• Faahapahapa—Ahani au i faaite i te parau mau.

Nafea oe e arai maitai aˈe ai i tera fifi?

Eaha te haapiiraa ta oe i huti mai i tera fifi?

No te aha vetahi e ore ai e farii i ta ratou mau hape?

Eaha to vetahi ê manaˈo ia tamata noa oe i te huna i ta oe mau hape? Eaha râ ia farii oe i ta oe mau hape?—Luka 16:10.