4-КҮ АЙТЫРЫГ
Бодунуң частырыгларын канчаар эдерил?
КАНЧААР СЕН?
Мындыг байдалды сагыштаалап көр даан: Дима эштери-биле ойнап турар. Ол бөмбүк-биле ойнап тургаш, душ бооп, кожазының машиназының соңгазын бузуп алган.
Диманың орнунга турган болзуңза, чүнү канчаар сен?
БОДАНЫП КӨР!
СЕНДЕ ҮШ ВАРИАНТ БАР:
-
А. Дезиптер.
-
Б. Өске кижини буруудадыр.
-
В. Кожазынга чүү болганын тайылбырлааш, чедирген когаралды эгидип бээрин чугаалаар.
Дезиптер деп күткүлге тыптып кээп болур. Ынчалзажок, соңга-даа бузуп калзыңза, азы өске бир чүвеге-даа буруудай берзиңзе, частырыгларыңны кезээде ажыы-биле чугаалап чоруур болзуңза эки. Аңаа хамаарыштыр каш чылдагаан бар.
ЧАСТЫРЫГЛАРНЫ МИННИРИНИҢ ҮШ ЧЫЛДАГААНЫ
-
Ынчаар кылыры шын.
Библияда: «Бүгү чүүлдерге бодувусту шын ап чоруурунче чүткүлдүг... бис» — деп бижээн (Еврейлерге 13:18).
-
Частырыгларын миннир кижилерни улус күзелдии-биле өршээр.
Библияда: «Бачыттыг үүлгедииңни чажырар болзуңза, эки чүве көрбес сен, а ону ажыы-биле миннип, ойталаар болзуңза, өршээл алыр сен» — дээн (Чугаалар 28:13).
-
Эң-не кол чүүл — шак ынчаар Бурганны өөртүп турар боор сен.
Библияда: «Кара сагыштыг кижи Дээрги-Чаяакчыга бужар бооп көстүр, а чөптүг-шынныг улус Ооң сеткилинге кирер» — дээн (Чугаалар 3:32).
20 харлыг Карина орук шимчээшкининиң дүрүмнерин үрээни дээш, торгааттырганын ачазындан чажырыптар бодаан. Ынчалза-даа ол ону үр чажырып шыдавас турган. «Бир чыл эрткенде мээң адымда торгаал квитанциязын ачам көрүп каан. Ынчан чаа кончуттурган мен» — деп, Карина сактып турар.
Кандыг түңнел кылып болурул? «Частырыгларны чажырарга, оон-даа дора болур. Сөөлүнде дөмей-ле олар дээш харыылаар апаар сен!» — деп, Карина чугаалап турар.
ЧАСТЫРЫГЛАРГА КАНЧААР ӨӨРЕНИП АП БОЛУР?
Библияда: «Бис шупту хөй бачытты үүлгедип чоруур бис» — деп бижээн (Иаков 3:2). Частырыгларны дораан миннири чугула деп көрдүвүс. Ол дээрге биче сеткилдиг, чедишкен кижиниң демдээ-дир.
Дараазында базым — бодунуң частырыгларынга өөренири. «Частырыгларымдан өөренип, дараазында ындыг таварылгаларда шын алдынар кылдыр, ажыктыг кичээл шиңгээдип алырын кызар чордум» — деп, Вера үлежип турар. Сен база ол ышкаш канчаар алдынып болуруңну көрээлем.
Ачаңның чадаг-тергезин ачылап алгаш, үреп алган сен. Чүнү канчаар сен?
-
Ачаң эскербейн баар деп идегээш, ооң дугайында чугаалавас сен.
-
Ачаңга шуптузун шыны-биле чугаалап бээр сен.
-
Ачаңга чугаалааш, буруузун өске кижиже чууй кааптар сен.
Белеткенмээн болгаш, шылгалданы дужаап чадап каан сен. Чүнү канчаар сен?
-
«Шылгалда хөлүн эрттир берге болган» дээр сен.
-
Частырыыңны миннир сен.
-
«Башкы меңээ хөңнү чок болгаш, багай демдек салган» дээр сен.
Ам кырында бердинген байдалдарны катап көргеш, бодуңну 1) ачаңның болгаш 2) башкыңның орнунга салып көрем. Ажыы-биле бурууңну миннир болзуңза, ачаң болгаш башкың сээң дугайыңда чүнү бодаарыл? А бир эвес бурууңну миннивес болзуңза, олар чүнү бодаарыл?
Ам сөөлгү чыл дургузунда кылган частырыыңны сактып келгеш, дараазында айтырыгларга харыылап көр.
Кандыг частырыгыл? Канчаар алдынган сен?
-
Ону чажырыпкан сен.
-
Бурууңну өске кижиже чууй каапкан сен.
-
Ону дораан ажыы-биле чугаалаан сен.
Частырыыңны чугаалаваан болзуңза, соонда чүнү миннип турган сен?
-
Кеземче чок арткаш, сагыжың чиигей берген.
-
Арын-нүүрүң аарып турган. Чугаалаар болза эки турган.
Чүнү канчаар турган болзуңза эки?
Частырыыңдан чүнү өөренип алган сен?
СЭЭҢИИ-БИЛЕ АЛЫРГА...
Чүге чамдык улус частырыгларын миннир хөңнү чок?
Кезээде частырыгларыңны чажырарын кызып чоруур болзуңза, улус сээң дугайыңда чүнү бодаар? А бир эвес бурууңну миннир болзуңза, олар сээң дугайыңда чүнү бодаар? (Лука 16:10).