Мону вәзийәтни тәсәввур қилиң: Тимур достлири билән биллә доп ойнап, хошнисиниң машинисиниң әйнигини сундуруп қоюду.

Әгәр Тимурниң орнида болсиңиз, немә қилаттиңиз?

СИЗ ҮЧИНИҢ БИРИНИ ТАЛЛАВАЛСИҢИЗ БОЛИДУ.

1. Қечип кетиш.

2. Башқисини әйипләш.

3. Хошниңизға немә болғанлиғини ейтип, әйнәкниң һәққини төләп беридиғанлиғиңизни ейтиш.

Сиз биринчисини таллашни халайдиғансиз. Лекин әйнәкни сундурамсиз яки башқа бир нәрсә қилип қоямсиз, хаталиқлириңизни бойниңизға алғанлиғиңиз яхши.

1. Бундақ қилиш тоғра.

   Муқәддәс китапта: «һәммә нәрсидә өзүмизни диянәт тутимиз»,— дәп йезилған (Ибранийларға 13:18).

2. Хаталиқлирини бойниға алидиған адәмни кәчүрүш асанирақ.

   Муқәддәс китапта: «Өз гуналирини йошурған киши ронақ тапмас, бирақ уларни тонуп иқрар қилип, товва қилған киши рәһим-шәпқәткә еришәр»,— дәп йезилған (Пәнд-нәсиһәтләр 28:13).

3. Әң муһими — бу Худайимизға яқиду.

   Муқәддәс китапта: «Чүнки қиңғир йолларни маңидиғанлар Пәрвәрдигарниң нәзәридә жиркиничликтур, лекин Пәрвәрдигарниң сири вә нәсиһити дурус яшаватқан адәмгә тәәллуқтур»,— дәп йезилған (Пәнд-нәсиһәтләр 3:32).

20 яшлиқ Карина машинини қаттиқ һайдиғанлиғи үчүн штраф қәғизини алғанлиғини дадисидин йошурған. «Бир жилдин кейин дадам мениң исмимға йезилған байиқи штраф қәғизини тепивалди. Шу чағда қаттиқ аччиғи кәлгән»,— деди Карина.

Карина немигә үгәнди? У мундақ дәйду: «Хаталиқлириңизни йошурсиңиз, әһвал техиму начарлишиду. Кейин бәри бир шуниң үчүн җавап беришиңизгә тоғра келиду».

Муқәддәс китапта: «Биз һәммимиз пат-пат хаталишимиз»,— дәп йезилған (Яқуп 3:2). Хаталиқларни бойнимизға елиш — кичик пеиллиқ вә йетилгәнликниң бәлгүси.

Келәрки қәдәм — хаталиқлардин савақ елиш. Вера исимлиқ қиз мундақ деди: «Мән һәрбир хаталиғимдин савақ алимән. Келәрки қетим шундақ вәзийәткә учриғанда, дурус һәрикәт қилип, яхши тәрәпкә өзгиришкә тиришимән». Сизму шундақ қилалайсиз. Келиң, буни қандақ қилалайдиғанлиғиңизни қараштурайли.

Сиз дадиңизниң велосипедини елип, уни сундуруп қойдиңиз дәйли. Бу вәзийәттә немә қилисиз?

• Дадам байқимай қалиду дәп үнчиқмай қоюсиз.

• Дадиңизға немә болғанлиғи һәққидә һәммисини ейтип берисиз.

• Болған ишниң һәммисини ейтисиз, лекин башқа бирсини әйипләйсиз.

Тәйярланмай барғанлиқтин емтиһандин өтәлмәй қалдиңиз. Бу вәзийәттә немә қилисиз?

• Емтиһан интайин қийин болди дәйсиз.

• Буниңға өзүңиз әйиплик екәнлигиңизни бойниңизға алисиз.

• Муәллим мени яқтурмайду дәп, баһанә издәйсиз.

 Алдинқи бәттә кәлтүрүлгән вәзийәтләргә қайтип, өзүңизни 1) дадиңизниң вә 2) муәллимиңизниң орниға қоюп көрүң. Әгәр хаталиқлириңизни тәйярлиқ билән бойниңизға алсиңиз, дадиңиз билән муәллимиңиз сиз һәққидә қандақ ойда болиду? Хаталиқлириңизни йошурушқа тиришсиңизчу, улар немә дәп ойлайду?

Әнди болса, өткән жили қилған бирәр хаталиғиңизни әскә елип, төвәндики соалларға җавап бериң:

У қандақ хаталиқ болди? Шу вәзийәттә немә қилдиңиз?

• Мән уни йошурдум.

• Башқа бирсини әйиплидим.

• Хаталиқни дәрру бойнумға алдим.

Хаталиғиңизни бойниңизға алмиған болсиңиз, униңдин кейин өзүңизни қандақ һис қилдиңиз?

• Қутулуп қалғинимға хошал болдум!

• Өзүмни әйиплик һис қилдим, растини ейтишим керәк еди.

Шу чағда немә қилғиниңиз дурус болатти?

Хаталиғиңиздин немигә үгәндиңиз?

Немишкә бәзи адәмләр хаталиқлирини бойниға алғуси кәлмәйду?

Хаталиқлириңизни дайим йошурсиңиз, адәмләр сиз һәққидә немә ойлайду? Әгәр хаталиқлириңизни бойниңизға алсиңизчу? (Луқа 16:10).