Sokolola ulandu u kuãimo ndoco: Umalẽhe umue o tukuiwa hati Gabriel, o kasi oku tasula ombunje kumue lakamba vaye. Noke, wa imba ombola longusu, kuenje, ya tetula ovindalasa vionjanela yonjo yomunu wa tungila ocipepi lonjo yavo.

Nda ove wa kalele Gabriel, nye nda wa linga?

O KUETE OVISIMĨLO VITATU O PONDOLA OKU NÕLA NDECI:

1. Oku tila.

2. O popia okuti, ekamba liove olio lia tetula ovindalasa vionjanela.

3. Oku sapuila komunu wa tungila ocipepi lonjo yene okuti, ove wa tetula ovindalasa vionjanela yaye, kuenda oku feta olombongo vioku yi semulũla.

Citava okuti, ove o seteka oku nõla ocisimĩlo A, ci lekisa okuti, o sukila oku tila! Pole, ca sunguluka okuti, o lombolola ovina wa nyõla ndaño via nyõleha calua.

1. Eci oco ocina ca sunguluka ndi sukila oku linga.

   Embimbiliya li popia hati: “[Tu] likolisilako oku kala vakuacili kovina viosi.”—Va Heveru 13:18.

2. Ca leluka oku ecela omunu umue o litavela ovina vĩvi a linga.

   Embimbiliya li popia hati: “U o limbika akandu aye ka . . . sumũlũha, puãi u o litavela kuenje o tindukako eye o sanga ohenda.”—Olosapo 28:13.

3. Oku sanjuisa Yehova oco ocina ci kuete esilivilo lia velapo.

   Embimbiliya li popia hati: “Yehova o nyale ocimbinde, puãi o kolela ava va sunguluka.”—Olosapo 3:32.

Ufeko umue o tukuiwa hati Karina, o kuete 20 kanyamo, omo okuti poku endisa ekãlu wa lupuka calua, wa kuatiwa lolosipayu. Kuenje, vio kisika oku feta olombongo kombonge, omo lioku tomba olonumbi vioku endisa ekãlu. Ndaño okuti wa limbika ocitangi caco ku isiaye, pole, vokuenda kuotembo weya oku ci kũlĩha. Eye wa popia hati: “Ka pa pitile unyamo umosi, kuenje isiange weya oku sanga opapelo yuvangi mua sonehiwa olombongo nda sukilile oku feta kombonge omo lioku endisa lãvi ekãlu. Kuenje, nda sumuile calua omo liocitangi caco!”

Ulandu owu u tu longisa nye? Karina wa popia hati: “Ka ca sungulukile oku seteka oku limbika ovina vĩvi wa linga. Momo ci pondola oku ku nenela ovitangi vialua!”

Embimbiliya li popia hati: “Vosi yetu tuakuakulueya olonjanja vialua.” (Tiago 3:2) Nda wa linga ocina cimue ka ca sungulukile, kuenje o litavela lonjanga, ci kuete esilivilo lia velapo. Nda wa litavela kovina vĩvi wa linga, ci lekisa okuti, o kuete umbombe, kuenda olondunge.

O sukila oku lilongisila kakulueya ove. Ufeko umue o tukuiwa hati Vera, wa popia hati: “Nda nda linga ocina cimue ka ca sungulukile, ci ndi longisa ovina vialua. Kuenje, ci ndi kuatisa oku kala omunu umue uwa okuti, eci ndi linga vali ocina cimue ka ca sungulukile, ndi kuama onjila yikuavo.” Omo liaco, tu kũlĩhĩsi ndomo o pondola oku ci linga.

Sokolola ndeci okuti, wa nyõla osikaleta ya isiove. Nye o sukila oku linga?

• Si lombolola ocitangi caco ku isiange, kuenda ndi yongola okuti, ka ci limbuka!

• Ndi sapuila ku isiange ocitangi nda pita laco.

• Ndi lundila omunu ukuavo.

Sokolola ndeci okuti, kua lilongisile oco o linge oloseteko vio kosikola, kuenje, kua vi lingile ciwa. Nye o sukila oku linga?

• Ndi sukila oku popia okuti, ka ca lelukile oku linga oloseteko viaco.

• Ndi tava okuti, sia lilongisile oco ndi linge oloseteko.

• Ndi popia okuti, ulongisi ka ndi sole.

 Lekuatiso liulandu wa lomboluiwa ndeti, sokolola lutate ovolandu avali a tukuiwa ndeti, kuenje kala ndu okuti ove (1) u isia, kuenda (2) ove ulongisi. Nda wa litavela ocina cĩvi wa linga, nye va pondola oku sima catiamẽla kocituwa wa lekisa? Nye va pondola oku sima nda wa limbika ocina cĩvi wa linga? Nye va pondola oku sima catiamẽla kokuove?

Seteka oku sokolola ovina vĩvi wa linga vokuenda kunyamo wa pita, kuenda tambulula apulilo a kuãimo ndeci:

Ocituwa cipi wa lekisa omo liocina cĩvi wa linga?

• Nda limbika ovina vĩvi nda linga.

• Nda lundila omunu umue.

• Eci nda linga ovina ka via sungulukile, nda litavela vepuluvi liaco.

Nye wa yeva vutima omo lioku likala oku litavela?

• Nda kuata esanju! Momo, sia yonguile oku kangisiwa!

• Nda livetela evelo. Momo, nda sukilile oku vangula ocili.

Nye wa sukilile oku linga oco o tetulule ocitangi caco?

Ovina vĩvi wa linga via ku longisa nye?

Momo lie omanu vamue va limbikila ovina vĩvi va siata oku linga?

Nye omanu va pondola oku sima catiamẽla kokuove, nda wa limbika ovina vĩvi wa siata oku linga? Nye omanu va pondola oku sima catiamẽla kokuove, nda wa litavela ovina vĩvi wa siata oku linga?—Luka 16:10.