Aganicisye ayi: Tujile kuti Tim akuputa mpila ni acimjakwe. Mwangosi, mpilawo ukuja kasa ligalasi lya nyumba ja ŵakuŵandikana nawo.

Yikaŵe kuti wawojo ali Tim, ana akatesile yatuli?

PANA YINDU YITATU YAKATESILE:

1. Kutila.

2. Kumlambucisya jwine.

3. Kwasalila asyene nyumbajo yayitendekwe, soni kuti calipile.

Mwine mwacitema mpaka asagule kutenda yayili pa A. Nambo kwiticisya cilicose cawulemwisye kwana ni umbone wakwe.

1. Kwiticisyako kuli kwakuŵajilwa.

   Baibulo jikusati: “Tusimicisye kutenda yosope mwacilungamo.”—Ahebeli 13:18.

2. Ŵandu akusamkululucila mwangasawusya mundu jwajiticisye yalemwisye.

   Baibulo jikusati, ‘Mundu jwakusisa ulemwa wakwe ngasapata upile, nambo mundu jwakwiticisya ulemwa ni kuwuleka, tacimtendela canasa.’—Miyambo 28:13.

3. Cakupunda payosopeyi, Mlungu akusasangalala naga tukwiticisya yatulemwisye.

   Baibulo jikusati, “Yehofa akusaŵengana ni mundu jwakusakala, nambo akusamnonyela mnope mundu jwagoloka.”—Miyambo 3:32.

Msikana jwine jwa yaka 20 jwa ku United States, lina lyakwe Karina, paŵajendesyaga galimoto, ŵapolisi ŵamkamwile ligongo lyakuwutusya mnope. Pambesi pakwe, ŵampele cikalata camagambo. Pajwayice kunyumba nganiŵasalila yeleyi babagwe. Nambo nganiji ngamkanijisisika mpaka kalakala. Karina ŵatite, “Pacamasile caka cimo, baba ŵaciweni cikalata cila. Nambo yindu yasawisye mnope!”

Ana Karina ŵalijiganyisye cici pelepa? Jwalakwe ŵatite: “Kusisa yawulemwisye kwangakamucisya ata panandi. Yikusakusimanape!”

Baibulo jikusati, “Wosope tukusalemwa mu yindu yejinji.” (Yakobo 3:2) Soni mpela mwatuyiwonele kala, kwiticisya yakulemwa mwacitema cili cimanyilo cakuti mli mundu jwakulinandiya soni jwamkomangale nganisyo.

Cindu cine cakusosekwa cili kulijiganya kutyocela pa yakulemwa yetu. Msikana jwine lina lyakwe Vera ŵatite: “Ngusalijiganya cine cakwe kutyocela pa yandemwisye. Ngusayiwona kuti mpaka yikungamucisya kuti mbe mundu jwambone soni kumanyilila yangusosekwa kutenda kuti ndaŵi jine ngalemwekasyasoni.” Sano kwende tulole yampaka atende kuti wawojosoni alijiganyeje pa yalemwisye.

Tujile kuti ajasime njinga ja baba ŵawo, ni ajonasile. Ana mpaka atende cici?

• Ngasala cilicose pakuganisya kuti baba ŵawo ngamanyilila kuti jijonasice.

• Kwasalila baba ŵawo yayitendekwe.

• Kwasalila baba ŵawo yayitendekwe nambo kumlambucisya mjawo.

Tujile kuti alepele mayeso ligongo lyakuti nganakosecela cenene. Ana mpaka atende cici?

• Kujila kuti mayesogo galiji gakusawusya.

• Kwiticisya kuti alepele ligongo lyakuti nganakosecela.

• Kwalambucisya aticala kuti akusiŵaŵenga.

 Sano aliwanicisye wawojo kuti ali (1) baba soni (2) aticala. Ana akapikene wuli? Pakuŵa apikanicisye, ana akuganisya kuti baba ŵawo ni aticala ŵawo akaganisisye kuti wawojo ali mundu jwatuli akajiticisye yaŵalemwisye? Ana akaganisisye kuti wawojo ali mundu jwatuli akasise yaŵalemwisye?

Sano aganicisye yiŵalemwisye mwaceso kaneko ajanje yiwusyo yakuyicisyayi.

Ana ŵalemwisye cici? Nambi ŵatesile wuli ni cakulemwaco?

• Nasisile.

• Namlambucisye mundu jwine.

• Najiticisye mwacitema.

Naga ŵasisile yaŵalemwisyeyo, ana ŵapikene wuli panyuma pakwe?

• Nasangalele kwabasi ligongo pangali juŵamanyilile!

• Nalijimbile magambo. Bola ngasale yisyesyene yakwe yikaliji cenene.

Ana akuganisya kuti akaŵajilwe kutenda cici?

Ana ŵalijiganyisye cici pa yaŵalemwisyeyo?

Ligongo cici ŵandu ŵane ŵangajiticisya yalemwisye?

Ana ŵandu mpaka ŵawoneje kuti ali mundu jwatuli naga akusagamba kusisa yalemwisye? Nambi wuli naga akusajiticisya yalemwisye?—Luka 16:10.