KOSAN 5

?Sɛ be kle min yalɛ suklu lɔ’n, ngue yɛ ń yó ɔ?

LIKE NGA TI YƐ Ɔ TI CINNJIN’N

Like nga á yó’n, i bo’n kwla gua kpa annzɛ ɔ kwla gua tɛ.

?NGUE YƐ Á YÓ Ɔ?

Sa kun yɛ: Cɛn kun nglɛmun’n, suklu kɔlɛ w’a yoman Toma i fɛ. I kpa bɔbɔ’n, i waan ɔ kɔman suklu kun. Afin anglo nsan nga be sinnin lɛ’n nun’n, i wiengu’m be kɛnnin i wun ndɛ tɛtɛ suklu lɔ. Be tɔnnin i dunman bɔbɔ. Cɛn wie’n, i wiengu kun fin i fluwa’m be su naan be gua ase. Kpɛkun, ɔ yo kɛ nɛ́n i ɲinfu yɛ ɔ yoli sɔ sa. Wie liɛ kusu’n, sran’n fin i sin lɔ w’a fin i like. Kɛ ɔ́ kpɛ́ i ɲin ɔn, ɔ wunman sran trele ng’ɔ yoli i sa’n. Cɛn kun liɛ’n, Toma i wiengu kun klɛli i fluwa ɛntɛnɛti su. Kɛ ɔ kanngannin nun’n, srɛ kunnin i dan.

?Sɛ ɔ ti wɔ’n, ngue yɛ á yó ɔ?

BU NDƐ NGA I AKUNNDAN!

Nán kɛ a kwlá yoman like fi mlɔnmlɔn ɔn! Kusu’n, nán ngondin yɛ ɔ fata kɛ a nin be tu naan b’a yaci wɔ yalɛ klelɛ ɔ. ?Yɛ ngue yɛ a kwla yo ɔ?

NÁN TƐ SU. Biblu’n se kɛ: “Sɛ sinnglinfuɛ fa ya-a, ɔ yi i nglo. Sanngɛ ngwlɛlɛfuɛ’n i liɛ’n, be wun-mɛn i.” (Nyanndra Mun 29:11) Sɛ be kle wɔ yalɛ naan be wunman kɛ a fa ya’n, be kwla yaci ɔ diin.
NÁN YO BE WIE. Biblu’n se kɛ: “Sɛ sran yo amun tɛ’n, nán an yo i wie.” (Rɔmfuɛ Mun 12:17) Sɛ a kunndɛ kɛ á yó be wie’n, i bo’n kwla gua tɛ.
SASA Ɔ WUN. Biblu’n se kɛ: “Sran ng’ɔ ti ngwlɛlɛfuɛ’n, kɛ ɔ wun kɛ ndɛ tɛ wie su ba’n, kpɛkuun w’a cuɛn i wun w’a yi i ja.” (Nyanndra Mun 22:3) Nán fa ɔ wun mantan be nga be klo ndɛnngan’n. Sɛ a wun kɛ be kunndɛ kɛ bé klé wɔ yalɛ’n, jaso lɛ kɔ.
YO LIKE NG’Ɔ KWLA BUBU BE SA SIN’N. Biblu’n se kɛ: “Sɛ sran fa ya kan ndɛ tɛ kle wɔ naan a tɛ i su amanniɛn su’n, i ya’n ɔ jɔ.” (Nyanndra Mun 15:1) A kwla tɛ be su aɲinsuɛ su. Wienun ɔn, be se wɔ kɛ a ti dan ngboko. I lɛ’n nun’n, a kwla ongo ɔ wati’n. Kpɛkun se kɛ: “N si sɔ. Sanngɛ, ń wá yó naan ń yó kaan.”
JASO BE WUN LƐ. Nora le afuɛ 19. Ɔ seli kɛ: ‘Kɛ sran kun kle wɔ yalɛ mɔ a tɛman su’n, a kle i kɛ a si ngwlɛlɛ trɛ i naan a sromɛn i. Naan a si ɔ awlɛn tra.’—2 Timote 2:24.
NÁN SRO BE. Titi’n, sran nga i wiengu’m be sie i nzɔliɛ kɛ ɔ ti srɛfuɛ’n, yɛ be kle i yalɛ ɔ. Sɛ ɔ wiengu’m be kle wɔ yalɛ naan be wun kɛ a sroman be’n, bé yáci wɔ diin.
NÁN FIA SU. Suklu klefuɛ kun seli kɛ: “Ń kán klé sran kwlaa nga i wiengu’m be kle i yalɛ’n kɛ nán maan ɔ fia su. Ɔ fata kɛ ɔ kan. I liɛ’n, be su kleman sran uflɛ i yalɛ ekun.”

Sɛ sran kun kle wɔ yalɛ naan ɔ wun kɛ a sromɛn i’n, i bɔbɔ yɛ ɔ sró wɔ ɔ

?A SI SƆ?

Be kwla yo sran’n i like yaya. Sanngɛ like nga be kwla yo i ekun’n i wie yɛ:

Be kɛn i ndɛ tɛtɛ. Selinin m’ɔ le afuɛ 20 seli kɛ: “Dunman nga be fa tɔnnin min’n, ɔ nin min wun ndɛ nga be kannin’n, min wla kwlá fiman su le. Be yoli maan min wla boli min wun. M buli i kɛ n timan like fi. Sɛ ɔ ti kɛ be finnin min ɲinma’n su yɛ ɔ jrannin mmoja bɔbɔ’n, nn ɔ flunman.”
Be faman be wun be mɛntɛnmɛn i. Alɛn m’ɔ le afuɛ 18 seli kɛ: “Suklu lɔ’n, min wiengu’m be wanndi min. Kɛ e kɔ like diwlɛ lɔ’n, wafa nga be trantran ti’n, n kwlá tranman be wun lɛ. Ɔ maan, min kunngba yɛ n tran ɔn. Afuɛ wunmuan kun nun’n, min kunngba yɛ n tran n dili like ɔ. Yɛ n sunnin.”
Be kɛn i wun ndɛ tɛ ɛntɛnɛti su. Daniɛli m’ɔ le afuɛ 14 seli kɛ: “Sɛ a kunndɛ kɛ á sín ɛntɛnɛti su sáci sran kun i dunman’n, ɔ timan kekle. Nán ndɛ blɔlɛ ɔ. Afin be kwla yo sɔ.”

**?Á TƐ́ SU SƐ?**
SAKPA, ANNZƐ ATO	I SU TƐLƐ’N
1 Sran’m be boli be wiengu i yalɛ klelɛ bo w’a cɛ kpa.	1 Sakpa. Biblu’n kan lalafuɛ nun sran jajraajra’m be ndɛ. Sran sɔ’m be “yi be wiengu’m be ase.”—Bo Bolɛ 6:4.
2 Kɛ be kle sran kun i yalɛ’n, be nin i be di aɔwi ngbɛn. Yɛ i sɔ’n timan tɛ.	2 Ato. Yalɛ mɔ gbanflɛn nin talua wie’m be wiengu’m be kle be’n ti’n, be kun be wun.
3 Sɛ be kle sran kun i yalɛ’n, ɔ fata kɛ ɔ nin be tu ngondin naan be yaci i diin.	3 Ato. Blɛ sunman’n, be nga be kle be wiengu’m be yalɛ’n be le wunmiɛn. Ɔ maan, nán se kɛ á yó be wie.
4 Sɛ be su kle sran kun i yalɛ ɔ ɲrun lɛ naan a tɛman su’n, ɔ ti kpa.	4 Ato. Ɔ timan kpa. Sɛ a kanman ndɛ’n, i sɔ’n klé kɛ a jin sran m’ɔ kle i wiengu yalɛ’n i sin.
5 Wie liɛ’n, be nga be kle be wiengu’m be yalɛ’n, be di be nuan ngbɛn. Be lafiman be wun su.	5 Sakpa. Be nun wie’m be kwla ɲan wunmiɛn. Sanngɛ, be nun sunman be yo sɔ naan be wiengu’m be sro be.
6 Be nga be kle be wiengu’m be yalɛ’n, be kwla yaci i sɔ yolɛ.	6 Sakpa. Sɛ be tu be fɔ’n, be kwla wla be ayeliɛ sɔ’n i ase.

Ninnge wie mɔ be kwla yo ɔ fɛ ekun'n

KOSAN NGA GBANFLƐN NIN TALUA’M BE USA BE’N

?Sɛ min wiengu suklu ba’m be kle min yalɛ’n, ngue yɛ n kwla yo-ɔ?

Ba nga be wiengu suklu ba’m be kle be yalɛ’n be nun sunman be bu i kɛ sa ng’ɔ o be su’n, ɔ timan sran’m be cinnjin. Ndɛ nga nun’n, be kle be like nga be kwla yo naan b’a wun be wun fɛ kan’n.

KOSAN 10 MƆ GBANFLƐN NIN TALUA’M BE USA’N BE SU TƐLƐ