Ghee igiemwi na ghee: Thomas ma hoo nọ yo esuku vbe ẹrẹna ra akhuẹ. Ọ ma ghi zẹdẹ hoo nọ yo hiehie. Uki eha ẹre ọ wa ye na, ne ọ ke wẹẹ irẹn i ghi yo rhunmwuda ohoghe ne ihua re ba re vbe esuku. Erriọ iran vbe ya mu ovan nibun nẹ. Ugbẹnso ọmwa ba wa gheghe do gban ebe nọ rre Thomas obọ fua, ọmwa ọvbehe wa vbe ke uwu ẹbu rre do sua re, sokpan ọ gha gbaro ghee iyeke, ẹi ghi bẹghe ọmwa nọ ruẹre. Nọ sunu nodẹ ẹre ọ ghi wa khọ sẹ, rhunmwuda wẹẹ, uhunmwu ne iran gie giẹ vbe intanẹt rhiema wẹẹ arrọọ ọghẹe wa rre ikpadede . . .

Adeghẹ uwẹ ọre Thomas, de emwi ne u gha te ru?

Ẹtin ruẹ ma he wa fo fẹfẹfẹ! Vbene ẹmwata, u gha sẹtin gbe ọmwa nọ zẹ ọmwa gbe vbene u i na fi ẹre ekpa. De vbene u khian ya ru ọna hẹ?

•   GHẸ GIE OHU MU RUẸ. E Baibol khare wẹẹ: “Te avbe akpa wa rhie ohu iran ma ne agbọn hia miẹn, sokpan avbe umẹwaẹn ghi fẹko ziengbe, iran ghi gbe ibiẹ rrie.” (Itan 29:11) Adeghẹ u na fẹko gbe ibiẹ rrie—ra te u wa dọlọ aro yi kẹkan, agharhemiẹn wẹẹ ohu mu ruẹ vbuwe egbe—egbe sẹtin wọọ emwa ni zẹ ruẹ gbe.

• GHẸ RRIAIKHI. E Baibol khare wẹẹ: “Ọmwa gha ruẹ khọ, ghẹ vbe ye ọkhọ haẹ re nẹ.” (Rom 12:17) Te ọ khian khọ sayọ deghẹ u na gha hoo ne u rriaikhi ne egbuẹ.

• GHẸ WA YA OWẸ RUẸ EVEVA KHIAN GHA RRIE EHE NE ẸMWẸ YE. E Baibol khare wẹẹ: “Emwa ni wan gha miẹn wẹẹ orueghe dee, iran ghi rhie uhunmwu iran lẹre.” (Itan 22:3) Hia vbe odẹ ke odẹ ne u ya lẹẹ ne emwa ni ru ẹmwẹ kevbe eke ne emwa gha na zẹ ruẹ gbe.

• WANNIẸ IRAN VBE ODẸ NE IRAN MA TE YARO YI. E Baibol khare wẹẹ: “Ewanniẹ ne khuẹrhẹ ẹre ọ dọ ohu yọ.” (Itan 15:1) U sẹtin wa giẹ ye ẹmwẹ ne iran ta. Vbe igiemwi, adeghẹ ọmwa nọ zẹ ruẹ gbe na tie ruẹ agidigbi, u sẹtin wa kha wẹẹ, “Mẹ nọ wa siamẹ fo nẹ na!”

• KPA VBA RRE. Nora nọ rre ukpo 19 khare wẹẹ, “adeghẹ u na hunwan, ọni rhiema wẹẹ u mwẹ ẹwaẹn kevbe u wegbe sẹ ọmwa nọ zẹ ruẹ gbe. Ọ vbe rhiema wẹẹ u sẹtin dia egbuẹ—emwi ne emwa ni zẹ ruẹ gbe i sẹtin ru.”—2 Timoti 2:24.

• HIA NE U GHA MWẸ UDINMWẸ. Emwa ni zẹ ọmwa gbe keghi gualọ ọmwa nẹi ghee egbe ẹre sẹ ọmwa kevbe nẹi khian rriaikhi. Sokpan, iran na ghee ruẹ zẹvbe ọmwa nai sẹtin de yan, iran ghi gha lẹẹ nuẹ.

• TAMA ỌMWA ỌVBEHE. Orhunmwu ọkpa nọ ka gha re ọmamwaemwi keghi kha wẹẹ: “Ibude ne I khian rhie ne ọmwaikọmwa na zẹ gbe ọre nọ guan ladian. Emwi nọ khẹke nọ rhunmwuda, ọni ẹre ọ khian ru iyobọ nẹ, ne iran ghẹ ghi zọẹ gbe vbe ẹdẹ ọvbehe.”