Bayangkon ma sarita on: Lang ra be si Thomas hu sikkolah halani tolu bulan na salpu, ihata-hatai do ia. Ibahen use gelar-gelarni. Sipata dong na mandabuhkon bukuni anjaha dong na manjulakkon ia, tapi sanggah ididah hupudi lang dong na mangaku. Dob ai adong homa na mangancam ia marhitei internet . . .

Anggo ho si Thomas, aha na laho bahenonmu?

Sasintongni boi do ho manlawan sidea tapi lang mamakei kekerasan. Sonaha carani?

•   TOTAP TONANG. Bibel mangkatahon, “Halak na oto ipapuas do ganup ringisni, tapi anggo halak na maruhur itahan do ai.” (Podah 29:11) Anggo totap tonang, sidea pe lang ra be mangganggui ho.

• ULANG MAMBALAS. Bibel mangkatahon, “Ulang ma balaskon nasiam na jahat balas ni na jahat.” (Rom 12:17) Anggo ho mambalas, lambin parah do holi situasini.

• ULANG DOHORI SIDEA. Bibel mangkatahon, “Halak na pantas mangidah parmaraan, jadi marponop ma ia.” (Podah 22:3) Padaoh ma dirimu humbani sipangganggu, anjaha ulang roh hu ianan ni sidea.

• LAMLAM MA BALOSI. Bibel mangkatahon, “Balos na lamlam pahombun ringis.” (Podah 15:1) Ho pe boi marguro-guro. Sontohni, anggo adong na mangejek ho halani momburmu, balosi ma, “Eeh . . . domma moru on.”

• SIP MA. Nini si Nora na marumur 19 tahun, “Anggo sip hita sanggah iganggui, artini dewasa do hita anjaha gogohan humbani sidea. Ai patuduhkon anggo hita boi manrajai diri.”​—2 Timoteus 2:24.

• PERCAYA DIRI MA. Gati do sidea marosuh mangganggui hita halani ididah sidea parbiar do hita. Tapi anggo percaya diri do hita, seng pag sidea mangganggu.

• PATUGAH BANI NA LEGAN. Sahalak guru mangkatahon, “Huojur do sidea na iganggu ase ipatugah bani halak na legan. Ai do dalan na sintong ase ulang iganggui be sidea.”