Handurawa kini: Si Thomas dili na ganahang moeskuyla. Nagsugod kini tulo ka bulan nang milabay dihang gidaot sa iyang mga eskolmet ang iyang reputasyon ug nabaniog kini. Dayon ila siyang gianggaan ug dili maayo. May panahon nga dunay mobangga kang Thomas nga kunohay wala tuyoa aron mangahulog ang iyang mga libro, o dunay usa diha sa iyang luyo nga motuklod niya, ug paglingi niya, dili siya makatag-an kon kinsay nagtuklod niya. Gahapon, misamot pa gyod ang pagdaogdaog kaniya dihang gihadlok siya diha sa Internet . . .

Kon ikaw si Thomas, unsay imong himoon?

Duna kay mahimo. Sa tinuod lang, makasukol ka sa daogdaogan nga dili na kinahanglang makig-away. Sa unsang paagi?

•   AYAWG KASUKO. Ang Bibliya nag-ingon: “Ang buangbuang dili makapugong sa iyang kasuko apan ang tawong but-an mapailobon ug makapugong niini.” (Panultihon [Proverbio] 29:11, Maayong Balita Biblia) Kon magpabilin kang kalmado bisag naglagot, kadtong nagdaogdaog nimo basin dili na manghilabot.

• AYAWG BALOS. Ang Bibliya nag-ingon: “Ayaw balosi si bisan kinsa ug daotan tungod sa daotan.” (Roma 12:17) Ang pagpanimalos makapasamot lang sa situwasyon.

• AYAWG SULOD SA KAGUBOT. Ang Bibliya nag-ingon: “Maalamon ang tawo nga nakakita sa katalagman ug nagtago sa iyang kaugalingon.” (Proverbio 22:3) Kon mahimo, likayi ang mga tawo nga nangita rag samok ug ang mga situwasyon diin puwede kang daogdaogon.

• SULAYI ANG REAKSIYON NGA WALA NILA DAMHA. Ang Bibliya nag-ingon: “Ang tubag, kon malumo, makapahilayo sa kaaligutgot.” (Proverbio 15:1) Puwede kang mangomedya. Pananglitan, kon sultihan ka nga tambok ka, tubaga sila, “Lagi, maayo segurong magpaniwang ko!”

• LAKAW NA LANG. “Kon dili ka motubag, nagpakita kana nga hamtong ka ug may kompiyansa sa kaugalingon kay sa nangdaogdaog nimo,” miingon ang 19 anyos nga si Nora. “Nagpakita kini nga mapailobon ka—kinaiya nga wala sa daogdaogan.”—2 Timoteo 2:24.

• PALIG-ONA ANG IMONG PAGSALIG SA KAUGALINGON. Ang mga daogdaogan makamatikod niadtong tingali dili mosukol kay walay pagsalig sa kaugalingon. Pero daghang daogdaogan moatras kon makita nila nga dili ka madaogdaog.

• ITUG-AN KANA. Usa ka kanhing titser miingon: “Kon ginadaogdaog ka, itug-an kana. Mao kanay husto, ug makatabang kana aron ang uban dili na mabiktima.”