Ñaʼtancu iliyi: Thomas mach yom majlel ti escuela ti ili qʼuin yicʼot ijcʼʌl. Maʼañix baqui ora yom majlel. Añix uxpʼejl uw i cajel come jiñi i piʼʌlob tsiʼ yʌlʌyob lot tac tiʼ tojlel. Tsaʼ caji i yotsʌbeñob i yʌlas cʼabaʼ. An tajol juntiquil i piʼʌl ti escuela yʌlol jach miʼ ñumel i choc yicʼot miʼ chocben i libro, i mach yʌlolic i chaʼan miʼ poj mel. Ti yambʌ ora, juntiquil i piʼʌl ti escuela tsaʼ tili i choc tiʼ pat i cheʼ bʌ tsiʼ sutqʼui i bʌ maʼañic chuqui tsiʼ meleyob yilal. Acʼbi tsaʼ ñumen tsʌtsʼa jiñi wocol: Thomas tsaʼ subenti yaʼ ti Internet chaʼan an chuqui mi caj i tumbentel...

Cheʼ jatetic, ¿chuqui maʼ mel?

¿Chuqui miʼ mejlel a mel? Miʼ mejlel a coltan a bʌ cheʼ mach yicʼotic jatsʼ. ¿Bajcheʼ?

•   MACH A JACʼBEÑOB I TʼAN. Jiñi Biblia miʼ yʌl: «Jini tonto bʌ miʼ yʌcʼ ti tsictiyel pejtelel i michʼajel. Jini wen bʌ i pusicʼal cheʼ jach ñʌchʼʌl miʼ cʌytʌl» (Proverbios 29:11). Mi tsaʼ pʌsʌ chaʼan maʼañic a bʌqʼuen, tajol mi caj i cʌyetob.

• MACH A QʼUEXTAN. Jiñi Biblia miʼ yʌl: «Mach mi laʼ qʼuextan jontolil» (Romanos 12:17). Mi tsaʼ qʼuexta mi caj i ñumen tsʌtsʼan jiñi wocol.

• PUTSʼTAN JIÑI WOCOL. Jiñi Biblia miʼ yʌl: «Jini cʌntesʌbil bʌ miʼ wʌn ñaʼtan chuqui bʌbʌqʼuen miʼ yujtel. Miʼ chajpan i bʌ» (Proverbios 22:3). Mi mucʼʌch a mejlel, putsʼtan jiñi muʼ bʌ i techob wocol yicʼot yaʼ baqui bʌbʌqʼuen.

• ACʼΛYOB TI TOJ SAJTEL I PUSICʼAL. Jiñi Biblia miʼ yʌl: «Jini uts bʌ tʼan miʼ lajmesʌben i michʼajel winic» (Proverbios 15:1). Wen jach bajcheʼ yom maʼ jacʼbeñob. Jumpʼejl ejemplo, mi an majqui miʼ subeñet chaʼan jujpʼemet, jacʼben cheʼi: «Isujmʌch, yomʌch mic tsʼitaʼ juʼsan chaʼpʼejl uxpʼejl kilo yilal».

• PUTSʼEN. Nora, am bʌ 19 i jabilel, miʼ yʌl: «Cheʼ bʌ maʼ putsʼel i maʼañic chuqui maʼ wʌl, choncol a pʌs a ñaʼtʌbal, a pʼʌtʌlel yicʼot chaʼan miʼ mejlel a ticʼ a bʌ, ili maʼañic i chaʼan jiñi jontoloʼ bʌ» (2 Timoteo 2:24).

• MACH A ÑAʼTAN CHAʼAN MAʼAÑIC A CʼΛJÑIBAL. Jiñi xticʼlayajob miʼ cʌñob majqui an i bʌqʼuen yicʼot maʼañic bʌ miʼ mejlel i coltan i bʌ. Pero an maʼañic bʌ mi caj i ticʼlañetob mi tsiʼ qʼueleyob chaʼan maʼañic maʼ wʌcʼ a bʌ.

• AN MAJQUI YOM MAʼ SUBEN. Juntiquil maestra bʌ ti wajali miʼ yʌl: «Jiñi ticʼojel muʼ bʌ cʌcʼ jiñʌch cheʼ miʼ sujbel i mul jiñi xticʼlayajob. Ili jiñʌch junchajp muʼ bʌ i mejlel ti melol chaʼan maʼañix majqui miʼ chʌn ticʼlʌntel».