DHƐƐˈˈ 5

˗Wa ˈˈwɩ mɛɛnˈˈ n ˗bha ꞊klaŋdhiʋ̈, ˗mën ˈa ˗dho ˗a kë?

-A "WƖ -DHƐ

˗MËN ˈÖ ˗KË DHƐƐˈˈ BHË, ˈÖ˗ ˗WƆN ˈDHÖ ˈˈGBƖƖ˗?

Pë ˈü ˗dho ˗a kë ˗yö ꞊mɔɔn˗ ˗bha kö ˗ya ˈwɔn baaˈˈ ɛɛnˈˈ kö ˗ya shiʋ̈ˈˈ.

˗MËN ˈÜ ˗DHO ˗A KË?

˗Bhö ü ˗zota ˈwɔn yö ˗a ˈgü: Toma ˈyaa˗ ˈˈpiʋ̈ kö ˈö ˈdho ꞊klaŋ ˈkɔɔdhö ˈzü. ꞊Ya ꞊mɔɔn ˈˈsu ˗yaaga ˗bha ꞊dɛɛ, ˗a ˈˈtɔŋdë ˗nu ˗wo ꞊sua ˗ya ˗ni ˈgü ˗a ˗bha, ˗wa ˈtɔ ˈkpɔ ˗ni ˈgü. ꞊Ya kë ˗nuwo, ˗a ˈˈtɛɛbɔ ˈbha ˗nu ˗wo ˗bɔ ˗a ꞊zlöö ˈwo wo ˗kɔ ˗man ˗a ˗bha ˈsëëdhɛ ˗nu ˗bha, ˈyö ˈwo˗ ˗kë ꞊dhɛ ˈpë ˈwii˗ kë wo ˗de ˈˈɲaan ˗a ˈdhö. ˗A ˈbha ˗ya kë ˈzü, ˗wa kë wo ˈkwëë˗ ꞊va, ˈyö mɛn ˈbha bɔ ˗a ꞊zlöö ˈyö˗ ˗blü. ˗Ya ˗dhɛga ö ꞊zlöö, ˈyö mɛn ˈö˗ ˗blü bhë, ˈwaa˗ ˗zɔn. Ɲaandhiʋ̈ ˗wo nɔɔn˗ ˗bɔ ˗a ˗dhɛ ɛntɛnɛtö ˗ta, ˈwo˗ pö ˗a ˗dhɛ ꞊dhɛ wo ˗dho pë ˈˈdhiʋ̈ kë ˗a ˈka.

Ü ˗kë Toma ꞊duɛ ˈgü ˗be, ˗mën ˈü ˗dho ˗a kë?

ˈDUANNU, ˈÜ Ü ˗ZOTA!

꞊Faan ˗yö ü ˗gɔ, ˈˈkɛɛ ü ꞊mɔɔn˗ ˗bha ˈü ü ꞊kwaa ˗kɔ kpö ˗zü ˈö ˈü to ˗a ˈˈgbɩɩ˗ ˈka ˈˈwɩmɛɛnmɛn ˗nu ˗ta. ˗Kɔ ˗kë ꞊dhɛ?

ˈBHA ˈDHO DHIAŊ ˈBHA ZË. Biblö ˗ya ˗pö : “ˈˈWlaamɛn ˗yö ˗to ˈˈshia˗ ˈö ˈwɔn ˗yɔ bɔ, ˈˈkɛɛ mɛn ˈö ˈkpaakpa ˗ya ˗kun ö ˗bha.” (Proverbes 29:11) ꞊Ya kë ꞊dhɛ ˈbhii dhiaŋ ˈbha zë, mɛn ˗nu ˈwo ˈˈwɩ mɛɛnˈˈ ˗ni ˈgü ü ˗bha bhë, ˗wo ꞊mɔɔn˗ ˗bha ˈwo wo ꞊kwaa ü ˗zü.
ˈBHA ˈDHO ˗A ˈˈPƆ BHO. Biblö ˗ya ˗pö: “ˈKa ˈdho ˈwɔn yaa ˈˈyɔɔ bho mɛ ˈbha ˗gɔ ˈwɔn yaa ˈka.” (Wlɔmö 12:17) ˈWɔn yaa ˈˈpɔ ˗bho ˈwɔn yaa ˈka ˗sü ˈyaa ˈwɔn ˗nu ˈˈɲan bhɔ.
ˈBHA ˈDHO Ü ˗DE ˗DA ˈWƆN ˈGÜ. Biblö ˗ya ˗pö: “ˈWɔndɔmɛn ˗yö ˈwɔn ˈˈgbɩɩ˗ ˗yö mü ꞊gblɛɛn, ˈyö ˈkpɔ ˗a ˈka.” (Proverbes 22:3) ꞊Ya kë ꞊dhɛ ü ꞊mɔɔn ˗zawo ˗a ˗bha, ˗bhö ˈˈkan mɛn ˗nu ˈwo ˈˈwɩ mɛɛnˈˈ ˗ni ˈgü ü ˗bha, ɛɛnˈˈ pë ˗nu ˈwo ˗dho ü ˗da ˈwɔn ˈgü, ˗an ˗bha.
˗BHÖ ˗A ˗YƆ ˈˈNƐƐNNƐN BƆ. Biblö ˗ya ˗pö: “ˈWɔn ˗yɔ ˈˈnɛɛnnɛn, ˗yö ˗naandhe ˗bho mɛn zuʋ̈ˈˈ ˗bha.” (Proverbes 15:1) Ü ꞊mɔɔn˗ ˗bha ˈü˗ ˗yɔ bɔ ˈwɔn ˈö ˗dho ˈˈyɩɩ ˗da ˗an ˈka, ˗a ˈka. ˗A ˈwɔnzuan ꞊nɛn: ꞊Ya kë ꞊dhɛ mɛn ˈbha ꞊yaa pö ü ˗dhɛ ꞊dhɛ ü ꞊faansü ˈgbɛ, ü mɔɔn˗ ˗bha kö ˈü˗ pö ˗a ˗dhɛ ꞊dhɛ: “Kö n dua ˗mü kö ˈa kwɛɛˈˈ ˈnën ˈbha wo ˈsa!”
˗BHÖ Ü ˗BHA ˈDHO WO. Nadia ˈö˗ ˗kwɛ ˈdhö 19 ˗ya ˗pö: “ˈBha ˈto ü ˈˈdhi ˈˈtun, kö ü˗ ˗zɔn ꞊dhɛ ˈbha ˗kian, ˈgo mü ˈzü kö ü˗ ˗zɔn ꞊dhɛ ü ˈgü ˈˈgbɩɩ˗ ˈö ˗ʒiö ˗a ˈka mɛn ˗nu ˈwo ˗shiëë mɛɛnˈˈ ˗ni ˈgü ü ˗bha bhë, ˗an ˗ta. ꞊Ya ˗zɔn ꞊dhɛ ü ꞊mɔɔn ü ˗de ꞊sɔŋ ˗bha ˈö ˗ʒiö ˗a ˈka ü ˈˈwɩmɛɛnmɛn ˗nu ˗ta.”—2 Timote 2:24.
˗BHÖ Ü ˗ZO YÖ Ü ˗DE ˗DHƐ. ˈˈWɩmɛɛnmɛn ˗nu ˗wo ˈˈsuʋ̈mɛn ˗nu ˗dɔ. ˈˈKɛɛ ꞊waa yö ꞊dhɛ ü ˈgü ˗yö ˈˈgbɩɩ˗ ˈö ˗ʒiö ˗a ˈka wo ˗ta, ˈwi ˈdho ˈˈwɩ ˗mɛɛn ü ˗bha ˈzü.
˗BHÖ ˗A ˗WƆN BLƐƐˈˈ MƐN ˈBHA ˗DHƐ. ꞊Klaŋgɔmɛn zii do ˈbha ˗ya ˗pö: “Mɛn ˈˈpɛpɛ ˈwo ˈˈwɩ mɛɛnˈˈ ˗ni ˈgü ˗an ˗bha bhë, a ˗an ꞊faan ˗mën kö ˗wa ˗wɔn blɛɛˈˈ mɛn ˈbha ˗dhɛ. Pë ˈö ˗an dua ˈdhö ˗mü kö ˗wa kë ˈnën bhë. ꞊Waa kë ˈˈdhʋ̈, ˗yö ˗dho mɛn ˗nu ˈwo to ˗an ˗takun ˈpö.”

˗Zoyö ü ˗de ˗dhɛ ˗sü ˗dho ü ˈgü kë ˈˈgbɩɩ˗ ˈö ˗ʒiö ˗a ˈka mɛn ˗nu ˈwo ˗shiëë mɛɛnˈˈ ˗ni ˈgü ü ˗bha bhë, ˗an ˗ta.

Ü˗ ˈWƆN ˗DƆ ˗EE?

˗Ya ˈgo ˗mɛn ˗man ˗sü ˈgü, ˈˈwɩ ˗mɛɛn mɛn ˗bha ˗sü ˈbha ˈnën ˗tɔ:

ˈˈDhiwo yaa ˗pö mɛn ˗dhɛ ˗sü. “N ˗zo ˈyi ˈdho bhɔ ˗toŋtoŋdhö n ˈtɔ ˗nu ˈwo˗ kpɔ waa pë ˗nu ˈwo˗ pö n ˗dhɛ bhë, ˗an ˈka. ˗Wo ꞊bhlëë ˗bho n ˗bha, ˈö ˈa ˗kë n ˗de ˈgü yaa ꞊dedewo. N ˗zë ˗kɔ kpö ˈka ˗sü fiëë ˗yö ˗dhö ˗be ˗a ˗bha.”—Sedhinö, 20.
˗Kan ü ˗bha ˗sü. “N ˈˈtɔŋdë ˗nu ˗wo ˗ya ˈˈkan ˗sü ˗bha n ˗bha. ꞊Ya kë ˈwo˗ pö n ˗dhɛ ꞊dhɛ ˗yadhɛ ˈbha ˈyaa ˗bhöpë ˗bhö ˗dhɛ ˈgü ˈzü, kë ˈˈdhʋ̈ kö ˈman ˈdho ˗ya ˗an ˈˈsuee. A ˈˈgbʋ ˗bɔ, ˈa pë ˗bhö n do ˈka ˗kwɛ do ꞊dede ˈˈpiʋ̈.”—Vadhɛ, 18.
Mɛn ˈtɔ ˗shiö ɛntɛnɛtö ˗ta ˗sü. “Pë ˈdɛdɛ ˈbha ˈü˗ pö ɛntɛnɛtö ˗ta ꞊mɔɔn˗ ˗bha kö ˗yö mɛn ˈtɔ ɛɛnˈˈ mɛn ˗bha ˗tosɛta ꞊gban shiʋ̈ˈˈ. ꞊Sua ˈyaa ˗mü.”—Daniɛ, 14.

**DHƐƐˈˈ ˗NU ˈWO ˗GBAN ˈˈWƖ ˗MƐƐN MƐN ˗BHA ˗SÜ ˗BHA**
GAGADE ƐƐNˈˈ ꞊SUA	˗A ˗YƆ ˗NU
1 ˈˈWɩ ˗mɛɛn mɛn ˗bha ˗sü zü ˗yö ˗dɔ ˗a ˗kwɛ ˗ya ˗mɔɔn ꞊dɛɛ ˗kwɛ ˈˈgblü ꞊va ˗bha.	1 Gagade. ˗A ˈwɔnzuan ꞊nɛn: Biblö ˗yö mɛn ꞊gbɛɛn ꞊gbɛɛn ˈgügbeezë ˈbhaa ˗nu ˗wɔn ꞊blɛɛ. ˗An ˈtɔ ˗gɛn ˈnën ˈtɔ˗ “Mɛnpömɛn ˗nu.”—ˈWunzüdɔdhɛ 6:4.
2 ˈˈWɩ ˗mɛɛn mɛn ˗bha ˗sü ˗yö trʋʋˈˈ ˈˈkpaan ˈka. ˈYaa ˈwɔn yaa ˈka.	2 ꞊Sua. ˈˈWɩ ˗mɛɛn mɛn ˗bha ˗sü ˗yö ˈya˗. Wlüünën ꞊vadhɛ ˗wa wo ˗de zë ˗a ˗wɔn ˈgü.
3 ˗Gban ˈˈwɩmɛɛnmɛn ˗nu ˗gɔ ˗kɔ ˗së ˈö ˗dhö, ˈnën ˈtɔ˗ ˈko ˗zë ˗an ˈˈpiʋ̈ ˗sü.	3 ꞊Sua. ˈˈWɩmɛɛnmɛn ˗nu ꞊faan ˗yö ˈˈgbɩɩ˗ ˈö ˗ʒiö ˗a ˈka mɛn ˗nu
4 ˈBha ˗kpan mɛn ˈbha ˗bha kö ˗wo ˈˈwɩ mɛɛnˈˈ ˗ni ˈgü ˗a ˗bha, ˗yö ˗së kö ˈü ˈkpɔ ˗an ˈka, ˈü ü ˗bha ʒiöwo.	4 ꞊Sua. ˈBha ˗kpan mɛn ˈbha ˗bha kö ˗wo ˈˈwɩ ˗mɛɛn ˗ni ˈgü ˗a ˗bha, ˈbha ˈkpɔ ˗an ˈka ˈbha ü ˗bha ʒiöwo, kö ˈbhii ˗a ˈwɔn baaˈˈ. Kö ü ˗kɔ ˗ya ˗da ˗a ˈwɔn ˈgü ˗ʒiaan.
5 ˈˈWɩmɛɛnmɛn ˗nu ˈˈdhi ˗yö ˈˈgbɩɩ˗, ˈˈkɛɛ ˗wo ˗suö.	5 Gagade. ˈKö ˗kë ꞊dhɛ ˈˈwɩmɛɛnmɛn ˈbha ˗nu ˗wo wo ˗de ˗sü ꞊va, ˗an ꞊vadhɛ ˗suö. ˗Wo ˈˈwɩ ˗mɛɛn wo ˈˈtɛɛbɔ ˗nu ˗bha kö ˗wo kë wo ˗de ˈgü ˈˈgian.
6 ˈˈWɩmɛɛnmɛn ˗nu ˗wo ꞊mɔɔn˗ ˗bha kö ˗wo ˈgo wo ˈˈgblʋʋ yaa ˗ta.	6 Gagade. Kö ˗wo ˈˈwɩmɛɛnmɛn ˗nu ˗takun, ˗wo ꞊mɔɔn˗ ˗bha kö ˗wo wo ˗zota ˗kɔ waa wo këwɔn ˗nu bho ˈˈgblʋʋ.

DHƐƐˈˈ 10 ˈÖ WLÜÜNËN ˗NU ˗WA KPƆ WO ˗DE ˗GƆ, ˗AN ˗YƆ ˗NU