Vakasamataka mada na ituvaki qo: Sa sega ni via vuli o Thomas. Na vuna? Era dau vakasagai koya na nona icaba mai koronivuli. Era tukuna eso na ka lasu me baleti koya, kacivi koya ena so na yaca, biliraki koya, era vakauta tale ga e dua na imeli mera vakarerei koya kina . . .

Na cava o na cakava ke o sotava na ituvaki ya?

Kua ni yalolailai ke o vakasagai! Sega ni tukuni mo vala kei ira na nomu icaba mera kua kina ni vakasagai iko. Raica mada eso tale na vakatutu yaga qo.

•   LEWAI IKO VINAKA. E kaya na iVolatabu: “Na tamata yalowai e talaucaka kece na lomana, ia o koya e vuku e galu qai lewa vinaka.” (Vosa Vakaibalebale 29:11) Ke o lewai iko vinaka qai yalodei, era na rairai sega ni via vakasagai iko eso tale.

• KUA NI SAUMA LESU. E tukuna na iVolatabu: “Kua ni sauma na ca e caka vei kemuni.” (Roma 12:17) Ena vakalevutaka ga na leqa na nomu via sauma na ka ca e caka vei iko.

• YAWAKA NA LEQA. E kaya na iVolatabu: “O koya e yalomatua e raica na ca qai vunitaki koya.” (Vosa Vakaibalebale 22:3) Saga mo yawaki ira era dau vakavu ca, yawaka tale ga na ituvaki o rawa ni vakasagai kina.

• DUA TALE NA IWALEWALE O RAWA NI TOVOLEA. E tukuna na iVolatabu: “Na vosa vakayalovinaka e vakaseavutaka na cudru.” (Vosa Vakaibalebale 15:1) De dua ena yaga ena so na gauna na veiwali. Kena ivakaraitaki, ke vakasagai iko e dua ni tukuna ni o levulevu, kua ni taura vakabibi. O rawa ni veiwalitaka lesu vua: “Io, de dua e vinakati dina meu vakalutu yago!”

• KUA NI KAUAITAKA. E kaya o Nora e dua na goneyalewa yabaki 19: “Nomu galu tu ga ni o vakasagai e ivakaraitaki ni yalomatua, yalodei, kei na lewa vinaka. Na itovo va qori e sega ni laurai vei ira na dauveivakasagai.”—2 Timoci 2:24.

• KUA NI BECI IKO. O cei era taketetaka vakalevu na dauveivakasagai? Era dau vakayaco lomadra na dauveivakasagai vei ira era beci ira se ra malumalumu. Ia era na rairai sega ni via vakasagai iko ke ra kila ni o na sega ni vakamalumalumu vei ira.

• TUKUTUKU VUA E DUA. E kaya e dua a qasenivuli tu e liu: “Au kerei ira kece na dau vakasagai mera tukuna na veika e caka vei ira. E vinaka me kilai me tinia kina na ka e cakava o koya e veivakasagai tiko.”