Feemɔ shihilɛ nɛɛ he mfoniri okwɛ: Thomas efee ejwɛŋmɔ akɛ eyaaa skul ŋmɛnɛ, eyaaa wɔ hu; no ji ekpa skul lɛ kwraa. Nɔ ni kɛ enɛ ba ji, aaafee nyɔji etɛ nɛ lɛ, eskulbii komɛi fo sane ko ni bɛ mli amɛfɔ̃ enɔ, ni amɛgbɛ sane lɛ amɛshwã. No sɛɛ lɛ, amɛbɔi lɛ gbɛ́i srɔtoi tsɛmɔ. Bei komɛi lɛ, mɔ ko jeɔ gbɛ etswaa Thomas wolo yɛ edɛŋ egbeɔ shi, kɛkɛ lɛ mɔ lɛ ekwa efee tamɔ ejeee gbɛ ni efee. Bei komɛi hu lɛ, kɛ́ skulbii lɛ nyiɛ esɛɛ lɛ, amɛteŋ mɔ ko tsiɔ eyisɛɛ, kɛkɛ lɛ be ni Thomas baakɛɛ efoɔ ehe lɛ, enaaa mɔ tuuntu ni tsi lɛ lɛ. Nyɛ lɛ, yiwaa ni Thomas kɛkpeɔ lɛ mli bawo wu; atsɔ Intanɛt lɛ nɔ akɛɛ lɛ akɛ abaafee lɛ nɔ ko waa . . .

Bo ji Thomas kulɛ, mɛni obaafee?

Kɛ́ aawa bo yi lɛ, no etsɔɔɔ akɛ onyɛŋ nɔ ko ofee! Anɔkwa, obaanyɛ oyi yiwalɔ lɛ ni omaaa lɛ atswɛrɛ. Yɛ mɛɛ gbɛ nɔ?

•   KAAFO EDAAŊ. Biblia lɛ kɛɔ akɛ: “Kwashia jieɔ emlifu fɛɛ kpo; shi nilelɔ kɛtoɔ sɛɛ ni ejɔɔ he.” (Abɛi 29:11) Kɛ́ mɛi miiwa bo yi loo amɛmiiye ohe fɛo, ni ofooo amɛdaaŋ lɛ, ebaahã amɛhiɛ agboi ni amɛbaakpa onaa gbamɔ.

• KAAFEE LƐ EKO OTSE. Biblia lɛ kɛɔ akɛ: “Nyɛkaŋɔa efɔŋ nyɛtoa mɔ ko mɔ ko efɔŋ najiaŋ.” (Romabii 12:17) Kɛ́ oka akɛ obaafee lɛ eko oto najiaŋ lɛ, no moŋ baafite sane lɛ kwraa.

• KAAYA HEI NI ABAANYƐ AWA BO YI YƐ. Biblia lɛ kɛɔ akɛ: “Hiɛtɛ̃lɔ naa efɔŋ ní baa, ni eteɔ ehe.” (Abɛi 22:3) Bɔɔ mɔdɛŋ fɛɛ ni ooonyɛ koni otsi ohe kɛje mɛi ni baasumɔ akɛ amɛwa bo yi lɛ ahe, ni okaya hei ni abaanyɛ awa bo yi yɛ.

• HÃ LƐ HETOO NI EKPAAA GBƐ. Biblia lɛ kɛɔ akɛ: “Naajɔlɛ hetoo kuɔ mlila naa.” (Abɛi 15:1) Obaanyɛ owo enaa ŋmɔlɔ po. Akɛ nɔkwɛmɔnɔ lɛ, kɛ́ eye ohe fɛo akɛ ofee obolo lɛ, obaanyɛ okɛfee fɛoyeli ni okɛɛ lɛ akɛ: “Efeɔ mi akɛ ehe baahia ni magbɔ mishwilɛ lɛ nɔ fioo!”

• SHI LƐ NI OYA. Oblayoo ko ni atsɛɔ lɛ Nora ni eye afii 19 lɛ wie akɛ: “Kɛ́ mɔ ko miitsɔ̃ onaa, ni ofooo edaaŋ ni oshi lɛ, no tsɔɔ akɛ ohiɛ kã shi, ni ohiɛ wa fe lɛ. Etsɔɔ hu akɛ oyɛ henɔyeli​—enɛ ji su ko ni yiwalɔ lɛ bɛ eko.”​—2 Timoteo 2:24.

• HÃ OHIƐ AWA, FEEMƆ EKÃA. Bei pii lɛ, yiwalɔi yɔseɔ mɛi ni bɛ hekɛnɔfɔɔ yɛ amɛmli ní kɛ́ aafee amɛ nɔ ko lɛ, amɛbaaŋmɛɛ amɛhiɛ he lɛ. Shi kɛ́ amɛyɔse akɛ ohiɛ wa ni oŋmɛɛɛ ohiɛ he lɛ, amɛbaakpa oyi waa.

• KƐƐMƆ MƆ KO. Yoo ko ni tsutsu ko lɛ eji skul tsɔɔlɔ lɛ wie akɛ: “Miiwo mɔ fɛɛ mɔ ni aawa lɛ yi lɛ hewalɛ koni ebɔ mɔ ko amaniɛ. No ji nɔ ni sa akɛ afee, ni ebaabu mɛi krokomɛi ahe koni akawa amɛ yi.”