Ə́ kiliŋahiɛ mɛnii ŋɛi ɓa : Thomas ho bɔ ho li nakwəlitaa háákələi. Ə ma kɛ tinaa. Kpɔ kea tɔnɔ kpɛli. Mɛniɠaa kɔwɔ ə hiɛ tɔɔ aa kɛ a ŋalən ɉaaɓa. Məlaa di hiɛ mɛni ɲɔnwɔɔɠaa ɓo a naa. Yili pulu, di naa hee. A kɛ a lowai taɠaa, nuta ə ŋɔ hɛɓɛɠaai hutaɠa, ə lɛɛ, ə gɛ yɛ awala giliɓo. Awala kɛtii, nuta ə ɉon bulu pələ, kəlaa a tinɛn hwa maanu kɔlɔn. Dakpɛli ə wɛi too ɉu, nuta ə wɛi maaɲɔu Internet ɓa.

Akɛ yɛ́ ɓə tii kɛ a Thomas, ə́ li tuwɔ ləi mɛnii tii hu ?

Hó kɛ ma hwá pɛli kea mɛni lɔpee ta ɓa. A teɲa, ə́ yee a pɛli tɛɛi hwaa tee mun ma, hwá gɛlɛ a ə́ yee kpun. Ləi ?

•   HÓ HWAA DI PƆ. Biblə kaa kɛi ma : ‘ Kilikpɛɛɲəimun hwa ŋɔ liiholi hu hon. Kəlaa, kilimaamun a nwɛi hu hon ’ (Haŋɔn 29:11). Da hwaa tee yɛ́, pɛlimaa a kɛ laa ə́i mɛi haa, hwaateenua da naa kaa, da ə́ lɛɛ laa.

• HÓ Ə́ WƐI GWƏLƏ KULƆ. Biblə kaa kɛi ma : “ Ka ho mɛni ɲɔn gwələ kulɔ a mɛni ɲɔn ” (Rɔmu 12:17). Ya kɛ ma ə́ kaa ə́ wɛi gwələ kulɔi, mɛni tii hu a kɛ lɔ ma yɛ kɛnɛ.

• ƁƐI HWAATEENUA DA PƐLI KƐI LAA, HÓ LI LAA. Biblə kaa kɛi ma : ‘ Nui daa gilaa pɔnɔ, a mɛniɲɔn gaa yɛ pa, a maakilɛ ’ (Haŋɔn 22:3). Akɛ pɛlimaa kaa laa, ə́ maakwea hwaateenua diɛ, ə lɛɛ hó li ɓɛi da pɛli kɛi laa.

• DI WOO PULU PƏNƏ, DI KWƏI Ə PILI DIƐ. Biblə kaa kɛi ma ‘ Wooɲaapənə lɛlɛɛ a liiholi kpəla bələi ’ (Haŋɔn 15:1). Ya pɛli ə́ di laa yɛlɛ. Gu gɔɔmaa ta həɠə. Nuta a kɛ yɛ́ ə́ kɛnɛɛ kpɔ ɓɔti-ɓɔti, ya pɛli ə́i konon dɔɔ yɛ́, yɛ́ ma “ Ee kɛɛ, ŋa pɛli ŋi ŋɔ́ kɛnɛ ta lɔwɔtɔɔ yɛ́, ya kɛ bɔ . . . ”

• HƏƓƏ LAA, Ə́ LI. Nora kaa-kwəlan gaa 19. Gaa kɛi ma “ Ya wala hwaa di pɔ, ya nɛ yɛ́ ma ya túwɔ́ yɛ nu kɛnɛ, ə lɛɛ ə́ hwaŋa kɛnɛi diɛ. Yili a nɛ yɛ ya ə́ kpɔɔ hu hon, yii hwaateenua di hwa pɛli ma ” (Timɔtə veelɛnaa 2:24).

• KƐ A Ə́ LAA Ə́ KPƆƆ LA. Nuai di ho laa li di kpɔɔ la, di ɲɔuɔ, gɛ laa nɛɛi hwaateenua di di kɔlɔn. Kəlaa da gaa diɛ ma yaa tɔɔ di la, da ə́ lɛɛ laa.

• MO NUTA ƁA. Lakwəli kalamɔɔ pɔlɔ ta ə mo yɛ ma : “ Nuai kpɔ da kɛ hwaa teei diɛ, gáá di hwaŋalɔi ə gɛ di mo nuta ɓa. Hwaateɛ ɉali katii, ə lɛɛ yili a pɛli ə kpɔnmaa tɛɛ nu takpɛli pɔ di hwa hwaa tee ma. ”