Paatsɨ́ ʼikɨtsíe neutiʼeri: Thomas ʼetsikwera rí pɨkayeimɨkɨ. Tawaarié pɨkahanuani rí paine. Haika metseri pɨreutewi kayeimɨtɨ, kepaitsɨ́ hiipatɨ ʼiwamama heetsiena mepɨteheʼiita metá meyunaitɨ mepɨtehetimá. Tsiere yɨɨkɨ meteʼiterɨwatɨ mepakɨ́. Hiipatɨ ʼauriena memukukɨkakaitsíe mepeitaimaakai yuxapate mɨtatuanikɨ meʼutiyuatɨ kenaame mekaʼimá. Xɨka xewitɨ heitaimá manakunieretsíe kaiwatɨ mepɨtekuʼuwekai. Takai matsi yeme ʼaixɨ pɨkaranuyetɨ́a: ʼInternettsíe pɨraʼutɨiyarie kenaame haxa ranuyeyaní...

Xɨka ʼekɨ Thomas pehɨɨkɨtɨnike, ¿kepetiuyuriwekai?

Tsipekaraʼeriwani yɨɨkɨ pepɨtiuyuriwe. Pepuʼakuhɨawé wahepaɨ pekatiyurienetɨ. ¿Kehepaɨ?

•   PEUKAWAʼENIEKA. Yuútsi Niukíeya paine: «Keane muʼerie xeikɨ́a yapɨtiyuriene kemɨtiyukuhɨawe, keane tá mɨreutamaiwé mɨpaɨ pɨkaʼane metá pɨwakeká» (Proverbios 29:11). Tseepá ʼataɨtá kepemereuʼerie xɨka petinewieka, memɨʼatsinanaima meputiʼuxiwe metá mepɨʼatsiʼuhayewawe.

• PEUKATIWARUKUHƗWIRIWANI. Yuútsi Niukíeya paine: «Hiipame haxa tiʼanenemekɨ xepɨkatewarukuhɨwiriwani» (Romanos 12:17). Xɨka petiwarukuhɨwirieni haxa pepɨranuyeyeiwé.

• PEUKAYUKWERIWAYURIEKA. Yuútsi Niukíeya paine: «Mɨreutamaiwé pɨtitimaamate kweriwa mɨʼitɨariekatsíe ʼayumié puyutiʼawiwieta» (Proverbios 22:3). Xɨka peyɨweni keneuyutaʼuna haxa pemɨkaranuyeyeikanikɨ peyukweriwayurietɨ.

• KETINIWARUMARITƗA PEMƗWARUTAʼEIYANITSÍE. Yuútsi Niukíeya paine: «Xɨka ʼaixɨ yari peutaʼewani pepɨtiukahaxɨapitɨawe» (Proverbios 15:1). Nanaiyakamekɨ keniwarutaʼeiya. Paatsɨ́, xɨka petikuhɨawarɨwani tsipekwahukayewa petananeme keneutayɨkí: «Hɨ waʼatɨ, nepɨnehakieni rí».

• KENEUYUTAʼUNA. Nora, 19 wiitaari hexeiyatɨ paine: «Xɨka peheyaní pekawaraʼeiyatɨ pepɨtihekɨatá kenaame rí petseɨye, petiukanewie metá kenaame pewakeká, mɨpaɨ mepɨkateʼuyuriwe keane memɨteʼuyukananaima» (2 Timoteo 2:24).

• KETINEKUʼERIWANI KENAAME ʼEKƗ PEYƗWE. Memɨteʼuyukananaima mepɨwamaate keane memɨkayuhɨawawe. Xɨka tá pekaʼutimamaweni mepɨʼatsiʼuhayewawe.

• XEIME MƗPAƗ KETINEUTAHƗAWI. Xewitɨ tiʼɨɨkitame ʼayaka pɨtikuʼɨxatsita: «Ne nepaine memɨnanaimarie mepɨwaxanetani keane memɨteʼuyukananaima. Xɨka mɨpaɨ tetekuyuruwani hiipatɨ rí meukatekwinitɨarieni».