Ripurira kongaro ndji: Tomas ke nokuvanga okuyenda koskole ndino, poo nandarire muhuka. Eye ke nokuvanga okuyenda koskole oparukaze. Otjiṋa hi tja uta omieze 3 mbya kapita indu ovanatje koskole tji va uta okuhandjaura oviṋa ovivi ohunga na ye. Okuzambo ave utu okumuisana omana omavi. Povikando tjiva, ovanatje aave tono omambo waTomas momake we kutja ye wire pehi okuzambo ave tjiti tjimuna kave tjitire owina. Otjikando tjarwe omuatje umwe wa undura Tomas kongotwe nu eye tja tanauka kaa tjiwa kutja ngwa tjiti nao eeuṋe. Erero, ondatumisire ndji ya ririre ko ombi indu Tomas tja tjitirwe ouhahu okupitira morungovi . . .

Andakuzu oove Tomas otjo tjita vi?

Ove kaove otjingundi oparukaze! Ouatjiri owombwi wokutja, ove mo yenene okurwisa omatatumisiro nga nokuhina otjirwa. Omomuano uṋe?

•   O PINDIKE. Ombeibela mai tja: “Eyova ri pitisa omazenge waro aehe, nungwari omunazondunge u kara nomuretima nu u ye tjaera.” (Omiano 29:11) Ove tji wa kondjo okuhina okupindika poo tji wa kondjo okuhina okuraisa kutja wa pindike, ovanatje mbwo mape ya ave ku esa.

• O YARURA OUVI MOUVI. Ombeibela mai tja: “Amu yarura ouvi mouvi.” (Ovaroma 12:17) Okuvanga okuyarura mo ongore kaku nokuvatera.

• KARA KOKURE NOUMBA. Ombeibela mai tja: “Omunazondunge u muna oumba tji mau ya na ṱara.” (Omiano 22:3) Kara kokure novandu mbe tjita ouhahu nu kara kokure notuveze pu pe kara imba mbe tjita ouhahu.

• RORA OKURAISA ONGARO NDJI I HINA OKUUNDJIRWA KO. Ombeibela mai tja: “Eziriro epore ri wisa omazenge pehi.” (Omiano 15:1) Mo yenene okutjita tjimuna mamu nyanda. Otjotjihorera, omukutatumise tji me ku tenge kutja wa ṋuna, mo yenene okuraisa kutja katji nokukukendeka, okuzambo o tja, “Imboukare me sokuisako orutu kaṱiṱi!”

• KAYENDE U ZE PO. Nora ngu nozombura 19 wa tja: “Okumwina ku raisa kutja we kura mozondunge nokutja u nomasa pomundu ngu me ku tjiti ouhahu. Ku raisa kutja u nomeritjaerero, nu ihi otjiṋa ovanatje mbe tatumisa ovakwao tji ve hina tjo.”—2 Timoteus 2:24.

• KONDJA OKUKARA NOUMUNE OUWA OHUNGA NA OVE OMUINI. Ovanatje mbe tatumisa ovakwao ve hakahana okumuna omundu ngu he rivara nonḓengu nu ngu hina okuverwisa. Posi yokutja ovengi mave ku esa indu tji mave munu kutja ko nokuveyandjera okukutjita ouhahu.

• RAERA OMUNDU OMUNENE. Omundu umwe ngwa ri omiṱiri wa tja: “Me rakiza omuatje auhe ngu tatumisiwa i ovanatje ovakwao kutja ma raere omundu omunene. Okutjita nao otjiṋa otjisemba nu mape ya atji vatere kutja ovanatje varwe ave ha tatumisiwa.”