Diladila konghalo ei: Tomas okwa li a tokola aha ye vali kofikola. Okwa li a diladila okuninga ngaho molwaashi eemwedi nhatu da pita ovanafikola vakwao ova kala tava tandavelifa oipupulu inyanyalifa kombinga yaye, nova li ve mu luka omadina. Omafimbo amwe vamwe ohava denge ko yo omambo aye momake ndele tave liningifa va fa inave shi ningila owina. Ile umwe womokati kavo e mu undule, eshi ta ka keuka ita mono kutya olyelye e mu undula. Efiku limwe vali ova ka ningila Tomas omatilifo okudilila kointaneta, naasho osha li she mu mbadapaleka unene.

Ngeno okwa li oove Tomas, ngeno oto ka ninga po shike?

Inashi hala kutya ku na eshi to dulu okuninga po. Paulelalela oto dulu okulwifa ovatondi voye nopehe na oku va denga. Ngahelipi mbela?

•   KALA WA NGUNGUMANA. Ombiibeli oya ti: “Omushima ta pupula mo onya yaye aishe ndelenee omunaendunge te i lotifa.” (Omayeletumbulo 29:11) Ngeenge owa kala wa ngungumana, ava tave ku shindi itava ka kala vali ve na ohokwe yoku ku shinda.

• INO ALULILA UMWE OWII. Ombiibeli oya ti: “Inamu alulila nande omunhu owii waye.” (Ovaroma 12:17) Okwaalulila vamwe owii ohaku naipike ashike onghalo.

• INO LITWALA MOUPYAKADI. Ombiibeli oya ti: “Omunaendunge ota tale oshiponga ndee ta hondama.” (Omayeletumbulo 22:3) Kendabala okuhenuka ovanhu ovo tava dulu oku ku etela oupyakadi nosho yo eenghalo omo hamu dulu okuholoka olushindo.

• KENDABALA OKUNYAMUKULA NOMBILI. Ombiibeli oya ti: “Enyamukulo litalala tali kandula po oupyuhandu.” (Omayeletumbulo 15:1) Oto dulu nokuli okuninga omashendjo. Pashihopaenenwa, ngeenge otava ti kutya ou na olutu linene, oto dulu okulinyengifa omapepe oye wa fa to lishiti, ndele to ti, “Ou li mondjila, naame ondi wete kutya onda pumbwa okuninipika oshivixa shange.”

• KALA WA MWENA. Nora womido 19 okwa ti: “Okukala wa mwena ohashi ulike kutya owa nyika onghulunhu nou na eendunge u dule omunhu oo te ku shindi. Ohashi ulike yo kutya omunhu oku na elipangelo, olo lihe niwe kwaavo tave ku shindi.” — 2 Timoteus 2:24.

• INO KALA WE LIDINA. Ovo hava shindi luhapu ohava konenene ovo ve na etaleko lii li na sha navo vene nosho yo ovo ihave va alulile owii. Mepingafano naasho, vahapu ovo hava shindi ohava sholola ngeenge ova mono kutya ito va ulikile kutya ou na eenghono.

• LOMBWELA UMWE. Umwe oo a li nale omuhongifikola okwa ti: “Ondi hole okulombwela keshe umwe oo ha shindwa e shi lopote. Oshi li pandunge okuninga ngaho, nohashi amene ovanhu vaha kale tava shindwa.”