សំណួរទី៥

តើខ្ញុំគួរធ្វើអ្វីបើគេសម្លុតធ្វើបាបនៅសាលា?

លេង

មូលហេតុត្រូវដឹង

ប្រតិកម្មរបស់ប្អូនអាចធ្វើឲ្យស្ថានភាពនោះទៅជាល្អជាង ឬអាក្រក់ជាង។

តើប្អូននឹងធ្វើយ៉ាងណា?

សូមស្រមៃគិតអំពីរឿងនេះ: ថ្ងៃនេះបូរ៉ា មិនចង់ទៅសាលាទេ ហើយថ្ងៃស្អែកក៏មិនចង់ទៅដែរ។ តាមពិត គាត់លែងចង់ទៅសាលារហូត។ ហេតុអ្វី? ពីព្រោះបីខែមុន សិស្សរួមថ្នាក់បាននិយាយរឿងមិនពិតអំពីគាត់។ រួចមក ពួកគេបានដាក់ងារឲ្យគាត់។ ជួនកាល មានសិស្សម្នាក់ដើរបុកបូរ៉ាឲ្យជ្រុះសៀវភៅពីដៃគាត់ ហើយធ្វើដូចជាបុកគាត់ដោយអចេតនា ឬមួយក៏មានសិស្សម្នាក់ក្នុងចំណោមសិស្សមួយក្រុមដែលដើរពីក្រោយគាត់បានរុញគាត់ តែពេលគាត់ងាកទៅ គាត់មិនដឹងថាអ្នកណាជាអ្នករុញគាត់ទេ។ កាលពីម្សិលមិញ បូរ៉ាទទួលរងការធ្វើបាបកាន់តែសាហាវជាងមុន ពេលគាត់បានទទួលសារគំរាមមួយតាមអ៊ីនធឺណិត . . .

បើប្អូនជាបូរ៉ា តើប្អូននឹងធ្វើយ៉ាងណា?

គិតមុនគូរ!

តាមពិត ប្អូនអាចយកឈ្នះបាន! ប្អូនអាចតបតនឹងពួកអ្នកដែលសម្លុតធ្វើបាបប្អូន ដោយមិនចាំបាច់ប្រើកណ្ដាប់ដៃ។ តើតាមរបៀបណា?

កុំមានប្រតិកម្ម។ គម្ពីរចែងថា៖ «ពួកល្ងីល្ងើ សំដែងចេញអស់ទាំងកំហឹងរបស់ខ្លួន តែមនុស្សមានប្រាជ្ញាគេទប់ចិត្ត ហើយរំងាប់ចេញវិញ»។ (សុភាសិត ២៩:១១) ពួកអ្នកដែលសម្លុតប្អូនប្រហែលជាលែងចាប់អារម្មណ៍ធ្វើបាបប្អូនទៀត បើពួកគេមើលទៅឃើញថាប្អូនចេះទប់ចិត្ត។
កុំសងសឹក។ គម្ពីរចែងថា៖ «កុំតបស្នងការអាក្រក់ដល់អ្នកណាដែលធ្វើអាក្រក់ចំពោះអ្នកឲ្យសោះ»។ (រ៉ូម ១២:១៧) ការសងសឹកនឹងនាំឲ្យមានបញ្ហាកាន់តែធំឡើង។
ចូរគេចចេញពីបញ្ហា។ គម្ពីរចែងថា៖ «មនុស្សដែលមានគំនិតឆ្លៀវឆ្លាត គេឃើញសេចក្ដីអាក្រក់មក ក៏ពួនខ្លួនទៅ»។ (សុភាសិត ២២:៣) ពេលណាដែលប្អូនអាចធ្វើបាន សូមជៀសចេញពីស្ថានភាពនិងមនុស្សដែលអាចសម្លុតគំរាមប្អូន។
ចូរឆ្លើយដោយធ្វើឲ្យគេហួសចិត្ត។ គម្ពីរចែងថា៖ «ពាក្យតបឆ្លើយដោយស្រទន់ នោះរមែងរំងាប់សេចក្ដីក្រោធទៅ»។ (សុភាសិត ១៥:១) ប្អូនអាចសាកល្បងឆ្លើយរបៀបកំប្លែង។ ជាឧទាហរណ៍ បើអ្នកដែលសម្លុតប្អូនប្រាប់ថាប្អូនធាត់ពេក ប្អូនប្រហែលជាញាក់ស្មា រួចនិយាយថា៖ «អូមែន ខ្ញុំត្រូវស្រកពីរបីគីឡូសិន!»។
ចូរដើរចេញ។ ប្អូនស្រីម្នាក់ឈ្មោះណូរ៉ា អាយុ១៩ឆ្នាំ បាននិយាយថា៖ «ការនៅស្ងៀមបង្ហាញថាអ្នកមានគំនិតចាស់ទុំនិងចេះទប់ចិត្ត។ តែមនុស្សដែលចំអកឲ្យអ្នកនិងមនុស្សដែលសម្លុតអ្នក គ្មានគុណសម្បត្ដិដូចនេះទេ»។—ធីម៉ូថេទី២ ២:២៤
ចូរមានទំនុកចិត្តលើខ្លួនឯង។ ជាញឹកញយ ពួកអ្នកដែលសម្លុតធ្វើបាបគេ ពួកគេឆាប់សម្គាល់ឃើញអ្នកដែលទំនងជាខ្វះទំនុកចិត្ត និងអ្នកដែលមិនឲ្យតម្លៃលើខ្លួនឯង។ ផ្ទុយទៅវិញ អ្នកដែលសម្លុតធ្វើបាបប្អូននឹងលែងធ្វើដូច្នោះទៀត បើពួកគេឃើញថាពួកគេមិនអាចបំភ័យប្អូនបាន។
ចូរប្រាប់អ្នកណាម្នាក់។ អតីតគ្រូបង្រៀនម្នាក់បាននិយាយថា៖ «ខ្ញុំសូមលើកទឹកចិត្តអ្នកដែលត្រូវគេសម្លុតធ្វើបាប ឲ្យហ៊ានប្រាប់អ្នកឯទៀត។ នេះជាអ្វីត្រឹមត្រូវដែលពួកគេគួរធ្វើ ហើយនេះអាចជួយការពារមនុស្សផ្សេងទៀតពីការសម្លុតធ្វើបាប»។

ការមានទំនុកចិត្តលើខ្លួនឯងនឹងជួយប្អូនឲ្យមានកម្លាំងពិតប្រាកដ តែអ្នកដែលសម្លុតធ្វើបាបប្អូនខ្លាំងតែសម្បកក្រៅប៉ុណ្ណោះ

តើប្អូនដឹងឬទេ?

អ្នកដែលសម្លុតធ្វើបាបគេ មិនគ្រាន់តែធ្វើបាបខាងរូបកាយប៉ុណ្ណោះទេ តែក៏ធ្វើបាបដោយ:

ពាក្យសម្ដី។ យុវនារីម្នាក់ឈ្មោះសាលីន អាយុ២០ឆ្នាំ និយាយថា៖ «ខ្ញុំមិនភ្លេចទាល់តែសោះនូវងារដែលពួកគេបានដាក់ឲ្យខ្ញុំឬអ្វីដែលពួកគេនិយាយ។ ពួកគេធ្វើឲ្យខ្ញុំមានអារម្មណ៍ថាខ្លួនគ្មានតម្លៃ គ្មានគេរាប់អាន និងគ្មានបានការ។ ខ្ញុំសុខចិត្តឲ្យគេវាយខ្ញុំខៀវភ្នែកជាជាងវាយដោយពាក្យសម្ដី»។
ឈប់រាប់អាន។ ប្អូនស្រីម្នាក់ឈ្មោះហេលី អាយុ១៨ឆ្នាំ ប្រាប់ថា៖ «មិត្តរួមថ្នាក់ចាប់ផ្ដើមគេចពីខ្ញុំ។ ពេលបរិភោគអាហារថ្ងៃត្រង់ ពួកគេមិនឲ្យខ្ញុំអង្គុយជិតពួកគេទេ។ អស់មួយឆ្នាំពេញ ខ្ញុំយំហើយញ៉ាំអាហារតែម្នាក់ឯង»។
ចំអកមើលងាយតាមអ៊ីនធឺណិត។ ប្អូនប្រុសម្នាក់ឈ្មោះដានីយ៉ែល អាយុ១៤ឆ្នាំ និយាយថា៖ «អ្នកអាចបំផ្លាញកេរ្ដិ៍ឈ្មោះរបស់អ្នកណាម្នាក់ ឬជីវិតរបស់គាត់តែម្ដង ដោយគ្រាន់តែវាយប៉ុន្មានពាក្យប៉ុណ្ណោះក្នុងបណ្ដាញសង្គមអ៊ីនធឺណិត។ ស្ដាប់ទៅហាក់ដូចជាពន្លើសពេក តែនេះអាចកើតឡើងបាន!»។

**សូមសាកល្បងឆ្លើយ**
ត្រូវឬខុស	ចម្លើយ
១ ការសម្លុតធ្វើបាបមានអស់រាប់ពាន់ឆ្នាំមកហើយ។	១ ត្រូវ។ ឧទាហរណ៍ គម្ពីរប្រាប់ថានៅសម័យបុរាណមានមនុស្សរូបធំសម្បើមឬពួកនីហ្វីលីម នេះជាឈ្មោះមនុស្សមួយក្រុមដែលមានន័យថា«អ្នកដែលធ្វើឲ្យអ្នកឯទៀតដួលចុះទៅ»។—លោកុប្បត្តិ ៦:៤, ព.ថ.
២ ការសម្លុតធ្វើបាបគ្រាន់តែជាការលលេងប៉ុណ្ណោះ មិនមែនជារឿងធ្ងន់ធ្ងរទេ។	២ ខុស។ ការសម្លុតធ្វើបាបជាកត្ដាមួយដែលជំរុញឲ្យយុវវ័យមួយចំនួនធំសម្លាប់ខ្លួន។
៣ ដើម្បីកុំឲ្យមានការសម្លុតធ្វើបាបទៀត វិធីល្អបំផុតគឺវាយតបវិញ។	៣ ខុស។ ជាញឹកញយ ពួកអ្នកសម្លុតធ្វើបាបគេមានកម្លាំងខ្លាំងជាងជនរងគ្រោះ ដូច្នេះការវាយតបវិញគឺគ្មានប្រយោជន៍ទេ។
៤ បើប្អូនឃើញគេកំពុងសម្លុតធ្វើបាបអ្នកឯទៀត ជាការល្អធ្វើមិនឃើញ។	៤ ខុស។ ក្នុងករណីនេះ ប្អូនមិនអាចនិយាយថារឿងនេះមិនទាក់ទងនឹងប្អូនទេ ពីព្រោះបើប្អូនឃើញគេសម្លុតធ្វើបាបអ្នកឯទៀត ហើយប្អូនមិនចាត់វិធានការ នោះហាក់ដូចជាប្អូនកំពុងរួមដៃជាមួយនឹងអ្នកដែលសម្លុតធ្វើបាបគេ។
៥ អ្នកដែលសម្លុតធ្វើបាបគេចូលចិត្តនិយាយអួត តាមពិតពួកគេច្រើនតែគ្មានទំនុកចិត្តលើខ្លួនឯង។	៥ ត្រូវ។ ពិតមែនថាអ្នកខ្លះដែលសម្លុតធ្វើបាបគេចូលចិត្តអួតក្អេងក្អាង តែពួកគេជាច្រើនគ្មានទំនុកចិត្តលើខ្លួនឯងទេ ហើយពួកគេធ្វើបាបអ្នកឯទៀតដើម្បីពួកគេមានអារម្មណ៍ល្អជាង។
៦ ពួកអ្នកដែលសម្លុតធ្វើបាបគេអាចកែប្រែបាន។	៦ ត្រូវ។ បើមានជំនួយពីអ្នកឯទៀត អ្នកដែលសម្លុតធ្វើបាបគេអាចកែប្រែគំនិតនិងការប្រព្រឹត្តរបស់ខ្លួនបាន។

លោកអ្នកក៏ប្រហែលជាចូលចិត្តដែរ

គំនូរជីវចលលើក្ដារខៀន

ចូរយកឈ្នះការសម្លុតធ្វើបាបដោយមិនប្រើកណ្ដាប់ដៃ

អញ្ជើញស្វែងយល់អំពីមូលហេតុដែលមានគេសម្លុតធ្វើបាប ហើយអ្វីដែលប្អូនអាចធ្វើនិងនិយាយពេលបញ្ហានោះកើតឡើង។

ចម្លើយចំពោះ១០សំណួរពីពួកយុវវ័យ