Fwanyikizha bino: Thomas kechi ukeba kuya ku sukulu jibiji ne. Mambo ka? Mambo bañondo basatu bapitapo, bakwabo ku sukulu batendekele kwamba bya bubela pe aye. Bamutumbile ne mazhina a bisela. Mukwabo umo wamushinjikile ne mabuku anji akapona byobya, bino waamba’mba kechi waji kumumona ne. Kabiji bakwabo bamulondejile munyuma ne kumushinjika. Thomas byo aalulukile ne kutalako, wakankelwe kuyuka waji kumushinjika. Kesha bamutumijile ne byambo pa foni bya kumuchinya . . .

Umvwe yobe wajinga Thomas, inge waubile byepi?

Kechi kyalumbulula’mba ufwabo bulume ne. Wakonsha kushinda muntu ukukatazha kwa kubula kulwa nanji. Mu ñanyi jishinda?

•   KUMUKUMBULA NE. Baibolo waamba’mba: “Muntu wakosama usolola bukaji bwanji bonse, bino muntu wa maana wikanya.” (Byambo bya Maana 29:11) Inge wabula kukumbula, aba bakukatazha bakekileka mambo bakamona’mba kechi wibata maana ne.

• KUSHINKANYA NE. Baibolo waamba’mba: “Kange mushinkanyenga kibi na kibi ku muntu nangwa umo ne.” (Loma 12:17) Kushinkanya kukalengelatu bintu kutaminako.

• INGE MUNTU UKUKATAZHA WAIYA, FUMAPO. Baibolo waamba’mba: “Muntu wajimuka umona bileta malwa kabiji ufyama.” (Byambo bya Maana 22:3) Eseka papelela bulume bobe kubula kutaanwa paji muntu ukukatazha ne kubula kuba bintu byakonsha kulengela’mba akukatazhe.

• MUKUMBULE MU JISHINDA JO ABULA KUKETEKELA. Baibolo waamba’mba: “Kukumbula na jiwi jakooka kufwomona bukaji.” (Byambo bya Maana 15:1) Wakonsha ne kukumbula saka ubena kuseka. Kya kumwenako, inge muntu ukukatazha wakwambila’mba wabaya bingi, wakonsha kuseka ne kukumbula’mba, “Ibyo, nsakukepeshako twa kujajaja.”

• FUMAPO. Nora, uji na myaka 19 waamba’mba: “Kwikala nzoo kumwesha’mba wakoma mu maana kabiji kechi uchina muntu ukukatazha ne. Kimwesha’mba wayuka kwikanya. Pakuba awa ukukatazha kechi wayuka kwikanya ne.”—2 Timoti 2:24.

• KANGE UBENGA MOYO NE. Bantu bakatazha bakwabo bayuka muntu uji na moyo ne wakonsha kuchina kwibakumbula. Kabiji javula inge bamona’mba kechi ubena kwibachina ne, baleka kukukatazha.

• BUULAKO BAKONSHA KUKUKWASHA. Muntu wajinga mufunjishi kala waambile’mba: “Mbena kukambizha muntu yense amba wafwainwa kwamba inge paji babena kumukatazha. Kyo kyawama kuba pa kuba’mba awo muntu aleke kukatazha bantu.”