Yindula e diambu edi: Tomás kazolele kwenda ku sikola ko o unu, ngatu mbazi. Yovo kazolele diaka kota sikola ko. Ngonde tatu ziviokele kala, akwandi kuna sikola bamwanganensa nsangu zaluvunu mu kuma kiandi. I bosi bayantika kumvana ulolo wa nkumbu. Ezak’e ntangwa, akaka basotolanga nkanda mia Tomás yo vova vo ke bavangidi wo mu lukanu ko. Yovo mosi muna buka wanunguna Tomás, kansi vava kaviluka kazaya ko ndiona wavanga wo. Mazono, e ntonta zasakidi diaka. Muntu wavumisi Tomás muna Internete . . .

Kele vo ngeye i Tomás, adieyi wadi vanga?

Kuna wakangama ko. Olenda zizidila e ntonta lembi nwana. Mu nkia mpila?

•   KUVOVI DIAMBU KO. Nkand’a Nzambi uvovanga vo: “O zowa olasumuna makasi mandi mawonso: O nkwa ngangu odingika mo, okulula mo.” (Ngana 29:11) Avo osidi ngolo za kala wabutama, kuna kulanda awana bekutontanga balenda yambula kutonta.

• KUVUTULA MBI MUNA MBI KO. Nkand’a Nzambi uvovanga vo: “Ke nuvutula muntu mbi muna mbi ko.” (Roma 12:17) O vutula mbi muna mbi, mambu kaka disakisanga.

• VENGA E VONZA. Nkand’a Nzambi uvovanga vo: “O nlungaladi omwene mbi, oswekamene.” (Ngana 22:3) Venganga wantu ana balenda kutwasila vonza ye mambu malenda fila wantu mu kutonta.

• VANANGA MVUTU ZAMBOTE. Nkand’a Nzambi uvovanga vo: “E mvutwilu a malembe ivilula nsita.” (Ngana 15:1) Olenda vova diambu disevesa o muntu. Kasikil’owu, avo muntu uvovese vo nitu aku ina nze nkondo, olenda seva yo kumvovesa vo: “Nanga mfwete sia kikilu ngolo za nana e nitu kimana yatanda fiakete.”

• KATUKA VO KWAKU. Dumbelele kimosi una ye nkumbu Nora ye kimbuta kia mvu 19 wavova vo: “O kala wabutama disonga vo una ye ngangu ye ngolo lutila ona okuvezanga. Disonga mpe vo una ye volo.”—2 Timoteo 2:24.

• UYIBUNDANGA E VUVU. Awana bezolanga tonta wantu balenda zaya ndiona okalanga wonga-wonga yovo ndiona oyambulwilanga mawonso. Kansi, avo bamwene vo kukubavananga nzila ko ya kuveza, nanga ke bevanga wo diaka ko.

• ZAYISA DIO KWA MUNTU. Nlongi mosi a sikola wavova vo: “Awana bevezwanga bafwete dio zayisanga kwa wantu ankaka. Diadi i diambu diangangu bafwete vanga ye dilenda tanina akaka mu lembi vezwa.”