Ximana tiʼj techel lu: Nya tajbʼil Thomas tuʼn t-xiʼ toj tja xnaqʼtzbʼil toj qʼij jaʼlo nix nchiʼj. Ex nya tajbʼil tuʼn t-xi juntl maj. Ma bʼant oxe xjaw ttzajlen tzyet tkyaqil jlu, tej kyok ten tukʼil yolil nya bʼaʼn tiʼj. Yajxitl ok kyqʼoʼn t-apodo. At maj in nel kyiʼntoq qe tuʼj Thomas toj tqʼobʼ ex in che kubʼ kyxoʼntoq twitz txʼotxʼ ik tzeʼn kyjunalx in che kubʼ tzʼaq. Jun kyxol qeju tukʼil in xi kylamoʼntoq ex aj tmeltzʼaj tiʼjxi mintiʼ in nel tnikʼ alkye otoq txi lamonte. Mas nya bʼaʼn aju ikʼ ew tuʼnju xi kyqʼamaʼn te toj Internet qa oktoq kʼokel kybʼinchaʼn nya bʼaʼn tiʼj...

Noqwit a teya Thomas, ¿tiʼwtlo jaku txi ttzaqʼweʼna?

¡At junjun tiʼ jaku bʼant tuʼna! Ax tok jaku kubʼ tiʼj aju taj tuʼn tok bʼinchante nya bʼaʼn tiʼja ex mintiʼ tuʼn tok tbʼyoʼna. ¿Tzeʼn jaku bʼant?

•   MIʼN TZʼOK TQʼOʼN TWIʼYA KYIʼJ YOL. In tzaj tqʼamaʼn Tyol Dios jlu: «Aju xjal mintiʼ tnabʼl in xi ttzoqpin tibʼ tuʼn tqʼojin, atzunju xjal at tnabʼl in tjakʼunte tibʼ tuʼn miʼn tqʼojin» (Proverbios 29:11). Qa ma tzʼok tilil tuʼna tuʼn miʼn tjaw kyaqpaja—maske toj tanmiya in qʼojina—iktzun tten aqeju in nok kybʼinchaʼn nya bʼaʼn tiʼja qajlo nya kyajbʼil tuʼn tbʼant juntl maj kyuʼn.

• MIʼN TZʼAJ TQʼOʼNA T-XEL NYA BʼAʼN. In tzaj tqʼamaʼn Tyol Dios jlu: «Miʼn tzʼaj kyqʼoʼne t-xel mya bʼaʼn» (Romanos 12:17). Tuʼnju qa ma tzʼaj tqʼoʼna t-xel nya bʼaʼn, mas kxeʼl toj il tuʼna.

• XQʼUQINK TIBʼA. In tzaj tqʼamaʼn Tyol Dios jlu: «Aju xjal at tnabʼl, ok t-xi tkeʼyin qa kyjaʼ ttzaj xobʼajil tibʼaj, in jyon naj tumel tuʼn tex twitz» (Proverbios 22:3). Qa jaku bʼant, bʼaʼn tuʼn tel tpan tibʼa kyiʼj qeju in nok kybʼinchaʼn nya bʼaʼn kyiʼj txqantl ex kyajbʼil tuʼn tok kybʼinchaʼn nya bʼaʼn tiʼja, ex miʼn txiʼya jatumel jaku tzʼok kybʼinchaʼn nya bʼaʼn tiʼja.

• JAKU CHE JAW LABʼIN TIʼJJU TZAQʼWEBʼIL KXEL TQʼOʼNA. In tzaj tqʼamaʼn Tyol Dios jlu: «Aju tzaqʼwebʼl te yol tukʼil kʼujlalil, bʼiʼx in weʼ qʼoj tuʼn» (Proverbios 15:1). Axpe ikx jaku kubʼ tbʼinchaʼna jun tiʼ jaku jaw tzeʼn juntl tuʼn. Jun techel, qa at jun xjal in nok tbʼinchaʼn nya bʼaʼn kyiʼj txqantl in tzaj tqʼamaʼn teya qa ma jax talina, jaku txi tqʼamaʼna jlu te: «In kubʼ nximane qa jaku kutz junjun libr walile».

• JAKU TZIKʼ BʼETA. In tzaj tqʼamaʼn Nora, te 19 abʼqʼi jlu: «Qa ma tzikʼ bʼeta ex mintiʼ in xi tqʼamaʼna jun tiʼ kye, jaku kubʼ tyekʼuna qa at tnabʼila, tipumala ex in tjakʼuʼn tibʼa, a jlu mintiʼ in bʼant kyuʼn qeju in nok kybʼinchaʼn nya bʼaʼn kyiʼj txqantl» (2 Timoteo 2:24).

• QEʼK TKʼUʼJA TIʼJA. Aqeju in nok kybʼinchaʼn nya bʼaʼn kyiʼj txqantl, in nel kynikʼ kyiʼj qeju mintiʼ in nok qeʼ kykʼuʼj kyiʼj ex alkyeqe kuʼxin kyajbʼil tuʼn tok kybʼinchaʼn nya bʼaʼn kyiʼj. Noqtzun tuʼnj, nim kyxol qeju in nok kybʼinchaʼn nya bʼaʼn kyiʼj txqantl, qa ma tzʼel kynikʼ qa mlay bʼant tuʼn tok kybʼinchaʼn nya bʼaʼn tiʼja jaku kyaj tzaqpiʼna kyuʼn.

• QʼAMANXA TE JUNTL XJAL. Chi jun xjal aju ok te aj xnaqʼtzal jlu: «Aju in xi nqʼamaʼne kye kuʼxin aju tuʼn t-xi kyqʼamaʼn te juntl xjal aju nya bʼaʼn in nok bʼinchaʼn kyiʼj. A jlu, atzun mas bʼaʼnju ex atzun jun tumel tuʼn miʼn tok bʼinchaʼn nya bʼaʼn tiʼj juntl».