Ximoiljui ni: Thomas ayokmo kineki yas momachtiti ni tonali. Kipia eyi metstli, iuampoyouaj kiistlakauijkej uan nochi kimatkej tlen kiijtojkej. Teipa pejki kitojtokaxtlaliaj. Kemantika, panoyaya se uan kikuatopeuayaya uan kitepeuiliyaya iamochuaj. Uan nojkia kemantika sekij kiikankuatopeuayayaj, uan kema Thomas kinekiyaya kiitas ajkia kikuatopejki, nochi tlachiuayayaj kej amo tleno kichijtoyaj. Yaloua nojua moueyili nopa kuesoli, pampa ipan Internet kiiljuijkej kichiuiliskiaj tlen amo kuali...

Tlaj mitspanoskia kej Thomas, ¿tlake tijchiuaskia?

Onka se keski tlamantli tlen uelis tijchiuas. Uelis timomanauis maske amo titemakilis. ¿Kenijkatsa uelis tijchiuas ni?

•   AMO XIKINTLAKAKILI. Biblia kiijtoua: “Se tlen uiuitik kuatsajtsi uan kinextia nochi ikualankayo, pero se tlen tlalnamiki moijiyouia uan moyoltlalia” (Prov. 29:11). Tlaj amo tikualanis o amo tijnextis tikualani, uelis ayokmo tleno mitschiuilisej yon mitstlaijiljuisej.

• AMO XIMOMAKUEPA. Biblia kiijtoua: “Amo kema xikinkuepilikaj tlen inmechchiuilijtokej tlen axkuali” (Rom. 12:17). Tlaj timomakuepas, nojua moueyilis nopa kuesoli.

• AMO XIKINNECHKAUI. Biblia kiijtoua: “Se tlakatl tlen tlalnamiki nimantsi momaka cuenta intla mauilili kampa yaui uan axpano” (Prov. 22:3). Tlaj tiuelis, amo xikinnechkauijtinemi katli san tlemach mitschiuiliaj uan amo ximotemoli kuesoli.

• KUALI XIKINNANKILI. Biblia kiijtoua: “Kema se akajya kinankilia ika yejyektsi seyok tlen kualantok, nimantsi kiseseltia” (Prov. 15:1). Kemantika uelis tikintlauetskiltis se kentsi. Tlaj se akajya mitsiljuis tlauel titomauak, ueliskia tikiljuis: “Kena, uelis ayokmo kinamiki tlauel nitlakuas”.

• XIKINTLALKAUI. Nora, katli kipia 19 xiuitl, kiijtoua: “Tlaj tikintlalkauis, tijnextis titlalnamiktok, amo timajmaui uan amo tijneki tikinkamaijixnamiktos. Katli san tlemach techiuiliaj amo kichiuaj nopa” (2 Tim. 2:24).

• AMO XIMAJMAUI. Katli san tlemach techiuiliaj nima kiitaj tlaj san timokaua uan timajmaui. Miakej amo tleno mitschiuilisej yon amo tleno mitsiljuisej tlaj kiitasej amo timajmaui uan amo san timokaua.

• XIKILJUI SE AKAJYA. Se siuatl katli tlamachtiyaya kiijtoua: “Na nikiniljuia kinamiki kiiljuisej se akajya kema san tlemach kinchiuiliaj. Ya nopa kinamiki kichiuasej, kiampa ayokmo tleno kinchiuilisej”.