Rangarirai ciitiko ici: Tomasi aadi kuenda kucikora nyamasi. Kana mangwana. Kana mbhera narini. Izvi zvakatanga pa mweji mutatu jakapera shamwari jake jo kucikora pajakatanga kufambisa marehwa-rehwa ngo pamusoro pake. Vomupa mazina o porovhoko. No kufamba ko nguva aripo acazobvukira Tomasi makadherno oita inga zvaitika acikazvidi, kana mundhu umwenivo hake wainga sure kwake ari pa cikwateco anozomukweva, zve nokufamba ko nguva Tomasi osika, asi aakwanisi kunanga kuti ndiani waitaro. Zuro, wokudheerera wia wakaitazve ngozi jimweni Tomasi paakaashira kuthyisijihwa ngo Interneti . . .

Kudari nowainga Tomasi, waizoitenyi?

Azvirevi kuti iwewe wakaremba maningi kamare! Zvokadi, ungatohwisa kudheerehwa ucikahwirijiri ngo zvakashata. Kuitisa kudini?

•   UCADOITA CIRI CESE. Bhaibheri rinoti: “Benji rinovonesa uxungu hwese hwo mwoyo waro; asi muzivi anojibata no kuhunyaraja.” (Mazwi Akangwara 29:11) Kudari ukaramba uri mundhu wakagajana mbhera pazvinokwanisika—vanonga vecizvivona—vanokudheereraya vangathuka vapera simba.

• UCADOHWIRIJIRA. Bhaibheri rinoti: “Mucadohwirijira ariwese ngo uxaixi hwake.” (VaRoma 12:17) Kuhwirijira cakashata ngo cakashata kunoengejera zvineso.

• UCADOFAMBA MU NDAU JINONGOZI. Bhaibheri rinoti: “Muzivi anovona bzakaxata, wofindara.” (Mazwi Akangwara 22:3) Pa kuengejera mbhera pazvinokwanisika, tizai vandhu vanoda zvokuhwisana zve tizai pa mugariro unoitika maningi zvokudheererana.

• EJA KUPA MUPINGURO UCIKAVETEHWI. Bhaibheri rinoti: “Mupinguro wakapfava unonyaraja uxungu.” (Mazwi Akangwara 15:1) Ungatodavira inga zvanangwaro zvinokudakajisa. Inga muezaniso, kudari nyakudheerera anokubvunja kuti iwewe wakapunda yei, ungatoita hako citatijo ngokumusa makhaja woti: “Yaa, zvinovonesa kuti ndinodikana kuruza kiru nganani.”

• PINDAI. Nora ano 19 o makore anoti: Kunyarara kunovonesa kuti iwewe wakaivha zve wakavanga kupinda mundhu ari kukuambiraro. “Kunyarara kunovonesa kujibata—kunovonesa kuti nyakudheerera wia aajibati.”—2 Timoti 2:24.

• ENDERERA MBERI NO KUJITHEMBA KWAKO. Vanodheerera vamweni vanokwanisa kuvona vandhu vacikazvithembi zve vacikafaneri kuti vanohwirijiravo. Mukusiana, vadheereri vazinji vanohwirira sure vakavona kuti autombovabhari hako.

• BVUNJA ARI WESE. Waimbonga mujijisi wakati: “Ndaizokohomeja mundhu anoita basa rokudheerera vamweni kuti averekete. Ngaicona ciro cakanaka cokuita, zve zvinojivirira umweni kuti acava mudheereri.”