Lingililani cocitika ici: Thomas ofuna lini soti kuluta ku sukulu. Miyezi itatu yapita ayake eyamba kumunenela zinthu zawenye. Pavuli pake eyamba kum’pasa mazina omunena. Nthawi ziyakine ayake a Thomas omuponeshela mabuku noonesha monga kuti zacitika mwangozi, olo m’mozi wa ayake omukankha kuvuli, nipo Thomas ocunguluka koma oziŵa lini wamukankha. Mailo, ayake omuvutisha efwika mpaka na poipisha mbili yake pa Intaneti . . .

Kuti mwenze Thomas, ko mungacitenji?

Izi zuonesha lini kuti muliye mphamvu! Mungakwanishe kugonjesa munthu okuvutishani cosaniyatana naye. Motyani?

•   MUSAONESHE KUTI ZAKUKHUZANI. Baibolo yulaŵila kuti: “Wopusa oonesha ukali wake wonse, koma wanzelu onkhala wodekha mpaka posilizhyila.” (Miyambo 29:11) Keno mwangonkhala osaonesha kuti zakukhuzani, okuvutishani angaone kuti aliyepindule ciliconse nipo angakusiyeni.

• OSAWEZHYELA. Baibolo yulaŵila kuti: “Musawezhyele ciipa pa ciipa.” (Aroma 12:17) Kuwezhyela kuyavya lini ciliconse koma kuyangizhyila tyala mavuto.

• OSAPITILA LONA KU MALO KWAMENE ŴANTHU ANGAKUVUTISHENI. Baibolo yulaŵila kuti: “Wocenjela ni ula wamene ocita akaona soka ofisama.” (Miyambo 22:3) Mukoyesa-yesa kupewa malo alionse yamuziŵilatu kuti mungakumaneko na ŵanthu okuvutishani.

• YANKHANI MOFASA. Baibolo yulaŵila kuti: “Kuyankha modekha kuwezhya ukali.” (Miyambo 15:1) Mungayese soti kulaŵilako tumalizu tosekesha. Mwacisanzo, keno munthu okuvutishani okunenani kuti nimwe woina ngako, mungangovomelezhya moseka nolaŵila kuti: “Niyese-yese kuti niyondeko patontho!”

• FUMAMPONI. Msimbi muyakine wa vyaka 19 wa zina yakuti Nora elaŵila kuti: “Keno ŵanthu ayakine okuvutisha koma weo wafumapo osayankha ciliconse, zuonesha kuti niwe wanzelu koma soti wotang’a mtima kupambana ŵanthu okuvutisha. Zuonesha soti kuti niwe wozilesha, nkhalidwe yamene ŵanthu ovutisha ayao aliye.”—2 Timoteyo 2:24.

• OSACITA ZINTHU MOZIKAIKILA. Keno mucita zinthu mozikaikila olo mwawowa, ŵanthu okonda kuvutisha ayao angaziŵe nipo angayambe kukuvutishani. Mosiyana na izi, ŵanthu okonda kuvutisha ayao angaleke kukuvutishani keno oona kuti muŵapasa lini mpata wakuti akokuvutishani.

• MUKOUZHYAKO AYAKINE. Mphunzisi muyakine elaŵila kuti: “Nulimbikisha aliyense wamene ovutishiwa kuti akouzhyako ayakine. Kuuzhya ayakine n’koyavya nipo kungacitishe kuti ŵanthu ayakine asakavutishiwe soti.”