Дӕ цӕститӕбӕл рауайун кӕнӕ: Томаси скъоламӕ цӕун нӕбал фӕндуй. Ӕртӕ мӕйи размӕ ин е ’мкъласонтӕ ӕгас скъолабӕл ӕ фудкой фӕккодтонцӕ, уой фӕсте ба ма ибӕл фӕсномуг дӕр исӕвардтонцӕ. Хатгай ӕй еске бакъуӕруй, цума ӕнӕбари адтӕй, уотӕ ӕма ӕ киунугутӕ ӕ къохтӕй ӕрхаунцӕ кенӕ ’й къласи еске фӕстити бакъуӕруй, ӕма Томас фӕстӕмӕ ку ракӕсуй, уӕд бӕрӕг нӕбал фӕууй, ка си адтӕй, е. Ӕзинӕ ба ма имӕ кадӕртӕ ӕ телефонмӕ финсун райдӕдтонцӕ ӕма ’й тӕрсун кодтонцӕ.

Ду ба Томаси бунати ци бакодтайсӕ?

Уотӕ зӕгъӕн нӕййес, ӕма дӕ бон ӕппундӕр неци ӕй. Дӕ бон ӕй ӕнӕ нӕмгӕй дӕр сӕ нихмӕ фӕллӕуун. Куд?

•   СӔ ГИРИЗТӔ СИН МАЦӔМӔ ДАРӔ. Библи зӕгъуй: «Ӕнӕзунд ӕ маст еугурӕйдӕр искалуй, зундгин ба ӕ маст кӕронмӕ уорамуй» (Ӕмбесӕндтӕ 29:11). Сӕ гиризтӕ дӕмӕ нимади дӕр ке нӕ ’нцӕ, уой ку уинонцӕ, уӕд дӕ ниууадздзӕнцӕ.

• ДӔ МАСТ МА ЕСӔ. Библи зӕгъуй: «Лӕгъуздзийнадӕ лӕгъуздзийнадӕй макӕмӕн федетӕ» (Ромӕгтӕмӕ 12:17). Дӕ маст ку есай, уӕд уавӕр фӕффуддӕр кӕндзӕнӕ, ӕндӕр неци.

• АРФУИНӔГ УО. Библи зӕгъуй: «Лӕдӕргӕ адӕймаг фидбилиз уинуй ӕма си ӕхе хезуй» (Ӕмбесӕндтӕ 22:3). Гӕнӕн уогӕй хилкъахгутӕй дӕхе еуварс дарӕ, удта хилтӕ кӕми фӕууй, уӕхӕн бунӕттӕй дӕр.

• ӔНГЪӔЛ КӔМӔЙ НӔ УА, УӔХӔН ДЗУАПП РАТТӔ. Библи зӕгъуй: «Фӕлмӕнӕй дзуапп раттӕ, ӕма адӕймагӕн ӕ маст иссӕудзӕй» (Ӕмбесӕндтӕ 15:1). Дӕ бон ӕй дзубанди гиризмӕ рахатун. Зӕгъӕн, туппур дӕ ку хононцӕ, уӕд дӕ бон ӕй гиризӕй зӕгъун: «Хицӕ мӕмӕ кӕнис?»

• УОРДИГИ РАНДӔ УО. 19-анздзуд Норӕ загъта: «Ку неци сӕмӕ исдзорай, уӕд бӕрӕг уодзӕй хилкъахгутӕй зундгиндӕр ке дӕ ӕма дин федар уодигъӕдӕ ке ес. Бӕрӕг уодзӕй дӕхебӕл хуӕцун ке зонис, хилкъахгутӕ ба уотӕ нӕ зонунцӕ» (2 Тимофеймӕ 2:24).

• НИФСГУНДӔР УО. Хилкъахгутӕ уайтагъддӕр ралӕдӕрунцӕ ӕнӕнифсхаст ка ӕй ӕма сӕмӕ ’сдзорун дӕр ка нӕ бандеудзӕй, уони. Фал ӕй ку уинонцӕ ке си нӕ тӕрсис ӕма дин сӕ бон ке неци исуодзӕй, уӕд дӕ ниууадздзӕнцӕ.

• ЕСКӔМӔН ӔЙ ЗӔГЪӔ. Раздӕр ахургӕнӕгӕй ка куста, е загъта: «Скъолай ке фефхуӕрунцӕ, етӕ уой туххӕй ескӕмӕн ку зӕгъонцӕ, уӕд уотемӕй иннетӕн дӕр банхус кӕндзӕнцӕ».