Vondoag well John nich no de School gonen. Un morjen uk nich. Hee well verheipts goanich mea. Daut funk aula doamet aun, aus doa dree Moonat trigj von am Läajes romjerät wort. Von dan aun jäwen se am schlajchte Nomes opp, heiwen dän de Schoolbieekja ut de Henj un doonen sikj noch soo, aus wudd daut nich met Fliet sennen, ooda see schupsen am von hinjen, un wan hee sikj omdreit, doonen se sikj oschuldich – kjeena haft daut jedonen. Jistren wort daut noch oaja, aus se am eene Norecht opp sien Fon schekjten, daut se am wudden waut aundoonen . . .

Wan du John wieescht, waut wurscht du dan doonen?

Du best nich aune Enj! Du kaust dee uk jewennen, waut domm to die sent, onen dee waut auntodoonen. Woo?

•   TEKJ DOA NICH NO. De Schreft sajcht: “Een Noa [ooda Dommkopp] jeft sikj sienen Oaja gaunz han, oba een weisa Maun helt sikj trigj” (Spricha 29:11). Wan se dwautsch sent un du ruich blifst – die weens soo deist – dan wellen dee veleicht goanich mea.

• DOO DIE NICH RAJCHNEN. De Schreft sajcht: “Woat junt schlajchtet aunjedonen? Tolt daut nich met schlajchtet trigj” (Reema 12:17). Sikj rajchnen wellen, moakt aules bloos noch schlemma.

• GO TRUBBELS UTEM STICH. De Schreft sajcht: “De kluake seenen daut Ojjlekj komen un brinjen sikj utem Stich” (Spricha 22:3). Wan et jeit, dan bliew von dee wajch, waut no Trubbel sieekjen, un von soone Städen, wua se kjennen dwautsch to die sennen.

• SAJ WAUT, WUA DEE NICH MET RÄAKJNEN. De Schreft sajcht: “Eene jelinde [ooda natieedelje] Auntwuat stelt dän Oaja” (Spricha 15:1). Proow mettomoaken. Wan se die nerkjen, wäajen du dikj best, kaust de Schulren mowen un sajen: “Een bät denna wudd nich schoden!”

• GO DOA FUAT. Nora (19 Joa) sajcht: “Stell bliewen es een Bewies, daut eena sikj aul kaun groot oppstalen un stoakja es aus dee, waut dwautsch es: Eena kaun waut, waut dee nich kaun – sikj beoabeiden” (2. Timotäus 2:24).

• SCHAUF DOARAUN, NICH SOO LÄACH VON DIE TO DENKJEN. Dwautsche Menschen moakjen daut foaken, wan eena von sikj selfst schlajcht denkjt un sikj nich leicht wäat. Wan dee seenen, daut eena sikj nich foaren lat, dan loten dee eenem ea toch.

• SAJ DAUT TO WÄM. Eene Fru, waut mol Lierarin wia, sajcht: “Wan se domm to wäm wieren, dan rod ekj dänjanjen emma too, daut to malden. Daut’s daut baste, waut eena doonen kaun, un daut halpt uk, daut dee nich uk noch to aundre domm sent.”