Tingim samting wea happen long Thomas. Samfala long skul talem olketa samting abaotem hem wea no tru. Then olketa start for kolem hem long enikaen nogud nem. Olketa savve bangam hem mekem olketa buk bilong hem foldaon, or samwan savve pushim hem, then ranawe. Wanday samwan sendem text long hem for talem hem olketa bae killim hem nogud long skul long next day. Datwan mekem Thomas for no laek go long skul nao.

Sapos iu nao Thomas, wanem nao bae iu duim?

No tingse iu no wei nao. Iu savve duim samting for stopem diswan. Wanem nao iu savve duim?

•   KONTROLEM FEELING BILONG IU. Bible sei: “Man wea krangge no savve kontrolem kros bilong hem, bat man wea wise savve kontrolem hemseleva.” (Proverbs 29:11) Sapos iu kontrolem feeling bilong iu and no kros, maet olketa just lusim iu nomoa.

• NO CHANGEM BAK. Bible sei: “Sapos eniwan duim nogud samting long iufala, iufala no changem bak.” (Rome 12:17) Sapos iu pei bak, bae datwan just mekem hem worse moa.

• STAP KLIA LONG TRABOL. Bible sei: “Man wea luksavve long samting wea danger hem protectim hemseleva.” (Proverbs 22:3) Traem best for stap klia from olketa bully, and from olketa samting wea mekem hem isi for olketa spoelem iu.

• TALEM SAMTING WEA OLKETA NO EXPECTIM. Bible sei: “Wei for tok kaen savve daonem kros bilong man.” (Proverbs 15:1) Trae for talem samting wea bae mekem man laf. Olsem example, sapos samwan sei iu fat, maet iu savve laf nomoa and sei: “Ia, luk olsem!”

• GO FROM DATFALA PLES. Nora, wea hem 19 year sei: “Taem samwan tok spoelem iu and iu no talem eni samting datwan showimaot iu mature and iu savve kontrolem seleva. Olketa bully no savve kontrolem olketa seleva.”—2 Timothy 2:24.

• NO TING DAONEM IUSELEVA. Staka taem olketa bully bae luksavve sapos iu man for fraet or iu savve ting daonem iuseleva. Taem olketa luksavve long datwan, olketa bae markem iu nao. Bat olketa bully bae no duim datwan sapos olketa luksavve iu no fraetem olketa.

• TALEM SAMWAN. Wanfala skul teacher bifor hem sei: “Mi encouragem eni pikinini wea wanfala bully spoelem hem for talem datwan long samwan. Datwan hem stret samting for duim, and maet hem bae stopem olketa bully for no spoelem narawan.”