Caipi yuyai: Lucasca cunanmantaca ña mana colegioman risha ninichu ninmi. ¿Imamantataj chashna nin? Quimsa quillacuna huashamanmi paipaj compañerocunaca paimanta llullacunata shujtajcunaman parlarca. Qꞌuipaca apodocunatami churai callarircacuna. Shinallataj tꞌangashpa, paipaj librocunatapish pambaman shitashpami chanzata rurajcuna carca. Huaquinpicarin huashamantami tꞌangajcuna carca. Lucas tigrai ricujpica pi mana tꞌangashca shinami carca. Cainacarin, colegioman shamujpica macashunmi nishpami internetpi quillcarcacuna.

¿Can Lucas cashpaca imatataj ruranguiman?

Cambaj compañerocuna chanzata rurajpica mana paicunahuan macanacunachu cangui. Shinaca ¿imataj rurai tucungui?

•   PAICUNA NISHCATA AMA CAZUICHU. Bibliapica: “Rumi shungu runa pꞌiñarishpaca, shungu yuyashcata ruranllami. Ashtahuanpish yachaisapa runaca, jarcashpa upallachinmi” ninmi (Proverbios 29:11). Mana pꞌiñarishpa paicunata imata mana nijpica mana ashtahuan burlaringacunachu.

• PAICUNA SHINALLATAJ AMA RURAICHU. Bibliapica: “Cancunata pi llaquichijpipish, ama chashnallataj llaquichinguichijchu” ninmi (Romanos 12:17). Paicuna shinallataj rurajpica ashtahuanmi chanzata rurangacuna.

• PAICUNAMANTA ANCHURI. Bibliapica: “Alli yuyaiyuj runaca, ima llaqui japina cajpica anchurinmi” ninmi (Proverbios 22:3). Cambaj compañerocuna chanzata rurashpa burlarisha nijpica paicunamanta anchuri.

• AMA PIÑARISHPA PARLAICHU. Bibliapica: “Sumajta cutichishca shimica, pꞌiñarishcatapish anchuchinmi” ninmi (Proverbios 15:1). Maijanpish imata nijpica ama utca pꞌiñarichu. Por ejemplo: Yallitaj gordomi cangui nijpica asishpami “ciertomi ña mana achcata micushachu” ni tucungui.

• IMATA MANA NISHPA CARUYAI. 19 huatacunata charij Nora shuti solteraca: “Mana imatapish nishpa caruyashpaca mana utca pꞌiñarij, alli yuyashpa imatapish ruraj cashcatami ricuchingui. Paicunaca mana chashna cashcamantami chanzata rurashpa burlarincuna” ninmi (2 Timoteo 2:24).

• CAN IMA SHINA CASHCAMANTA CUSHILLA SINTIRI. Manchaihuan pingaihuan upalla cajta ricushpami chanzata rurashpa burlarincuna. Shinapish compañerocuna canmanta burlarishpa chanzata rurachunca mana saquinachu cangui.

• HUILLANAMI CANGUI. Shuj escuelapi ñaupa trabajaj profesoraca: “Pi chanzata rurashpa burlarijcunataca piman huillanami cangui. Chashnami shujtacunata ama chashnallataj rurachun ayudangui” ninmi.