Cai tucushcai iyari: Lucas cuna escuelama mana rina munan. Cayandi punzhas, mana ima huraspas. Tucui callarica quinsa quilla huashai, paihua cumpañajcuna tucuigunara cuintanuca llullasha paimanda. Chi huasha callarinuca shuj shutiunara churasha. Huaquimbi maicanguna yangamanda Lucasta tangasha pasaj anuca librogunara allpai shitaj anuca mana munashca cuinta. Shuj huraspi shu muntunmanda maicans huashamanda tangajpi chibi pai vultiasha ricujpi tucuiguna ali cuintalla ricunuca. Caina tucushca mas huajlirishca ricurica: Lucasta Internetpi llaquichina shimira cachamunuca...

Can Lucas asha, ¿imara ruranguima?

Mana tucui pirdishcachu an. Difindinara ushangui mana huactashalla. ¿Imasnara?

•   AMA UYAICHU. Biblia ninmi: “Upa uma charij runa ima sintirishcara ruranllami, randi sabiru runa mana turbarisha caita arcan” (Proverbios 29:11). Can mansu shunguyuj ajpi, maicambi canzhallai, can burlajcuna sambayanunga huasha cungailla angaj saquinunga.

• RANDIS AMA CUTIPANGUI. Biblia ninmi: “Pitas manalira manalihua ama pagaichichu” (Romanos 12:17). Randis cutipana mas llaquiuna apamunga.

• LLAQUIUNAMANDA ANZHURI. Biblia ninmi: “Iyaiyuj runa manalira ricusha miticun” (Proverbios 22:​3). Can ushashcai canda llaquichina munajcunamanda shinzhi turmindusgunamanda anzhurinami angui.

• CAN ALI CUTIPASHCAHUA RICUCHI. Biblia ninmi: “Mansu cutipashca shimi piñarinara anzhuchin” (Proverbios 15:​1). Maicambi asichina ushangui. Iyari, maican racu angui nisha rimajpi camba rigra mucura aisachisha rimana ushangui: “Ari, ali anga ansa racuyashcara irguchingahua”.

• RI. Nora 19 huatayuj nin: “Mana cutipasha rina ricuchin can ali runa, shinzhi, aicha munaira arcana ushashcara, caita shujcunara molestajcuna mana charinun” (2 Timoteo 2:24).

• CAMBAJLLAI QUIRINARA YAPACHINGUI. Turbachijcuna ricsinun maican mana paillai quirinara charijta, paillara mana difindijta. Shinajpi ashcauna ña mana molestanunga can mana turbachina saquishcara ricusha.

• MAICANDA CUINTAI. Ñaupa aj profesora nin: “Ñuca rimashcauna an cai turmindusta pasauj runa tucuira cuintachu. Chita rurana ali an, shujcunas ama turmindarichu chi tunuunai”.