5 KAQ TAPUKUY
¿Imatam ruwayman escuelaypi asikuwaptinku?
¿IMATAM RUWAWAQ?
Huk kutipim Thomas sutiyuq mozocha escuelanman riyta manaña munarqachu. ¿Imanasqa? Yaqa kimsa killañam warmamasinkuna paymanta mana allinkunata rimarqaku hinaspa tukuywan sutichaspanku asikurqaku. Wakinpiqa llullankutaraqmi tanqakachaspanku imantapas pampakunaman chuqaparuqku. Wakinpiñataqmi qipanmanta tanqaykuqku, Thomas muyuriptinñataqmi upa tukuqku. Chaymantapas internetnintakamam maqanankupaq nirqaku...
¿Imatataq qamqa Thomas kaspaykiqa ruwawaq?
KAYPI YUYAYMANAY
Ama llumpaytaqa hukmanyaychu. Mana takawan kutirispallam allichawaq. ¿Imaynata?
-
AMA KAQPAQPAS HAPIYCHU. Bibliapim nin: ‘Mana yachayniyuq runaqa chayllam piñakun. Yachayniyuq runam ichaqa piñakuyninta tanichin’, nispa (Proverbios 29:11). Asikusuqniki runakunapa asikususqaykita mana kaqpaqpas hapiptikiqa amiruspankum manaña asikusunkiñachu.
-
AMA KUTIPAKUYCHU. Bibliapim nin: “Pipas mana allinta ruwasuptikichikqa amayá mana allinwanqa kutichiychikchu”, nispa (Romanos 12:17). Kutipakuptikiqa imapas aswan mana allinraqmi kanqa.
-
HUK LAWNINTA PURIKUY. Bibliapim nin: ‘Tanteoyuq runaqa desgracia kananta qawarispanmi asurikun’, nispa (Proverbios 22:3). Atispaqa asurikuy asikusuqniki runakunamanta hinaspa huk lawninta purikuy.
-
ALLIN SIMILLAWAN RIMAY. Bibliapim nin: “Allin simillawan contestaq runaqa runamasinpa piñakusqantam tanichin”, nispa (Proverbios 15:1). Ichapas asichiwaqraq imapas nisqaykiwan. Pipas puqusqa niraq kasqaykimanta asikuptinqa, ichapas niwaq: “Arí, allinmi kanman aslla llasayniyqa”, nispa.
-
UPALLALLA PASAKUY. 19 watanpi kaq Nora sutiyuq sipasmi nin: “Upallalla pasakuyqa yuyayniyuq kasqaykitam qawachin. Pimantañapas asikuq runakunam ichaqa mana chaynachu kanku”, nispa (2 Timoteo 2:24).
-
AMA MANCHAPAKUQQA KAYCHU. Asipayakuq runakunaqa musyakunkum manchapakuqllaña kaqkunamantaqa utaq upallalla kaqkunamantaqa. Chaymi mana manchapakuptikiqa manaña pipas asikusunkiñachu.
-
PI YUYAYNIYUQMANPAS WILLAKUY. Huk profesoram nin: “Pitapas chayna runakuna sasachaptinqa willakunanmi. Chay runakunamanta willakuptinchikqa manañam hukkunatawanqa sasachanqakuñachu”, nispa.
Mana manchapakuspaqa asipayakuq runamantapas aswan kallpayuq hinaraqmi kanki.
Kaykunatapas leeykuy
QAWANAPAQ DIBUJOKUNA
¿Imaynatam mana kutipakuspalla asikusuqnikimanta asurikuwaq?
Kaypim yachanki imanasqa asikuq runakuna hukkunamanta asikusqanta hinaspa imaynata mana kutipakuspalla asurikuymanta.
¡RIKCHARIY!
¿Imaynatam aguantawaq mana allinta ruwanaykipaq pipas hikutasuptiki?
Allin ruwaq runakunapas hikutasqa kaspaqa mana allinmanmi wichinku. Warmamasikikuna hikutasuptiki imata ruwaspa aguantanaykipaq yachay.
