Caipi yuyapai: Thomasca ñana colegioman ringapaj munanllu. Quimsa quillacuna huashamanmi colegiopi shuj jovengunaca, Thomasmanda llullacunata nishpa shujman shujman parlashca. Shinallata racialla apodocunata churashpami molestai callarishca. Huaquinbicarin chai jovengunaca yadrede tangashpami librocunatapash urmachishpa yalishca. Shuj punllacarin paicunapuramanda shuj jovenga huashamandami tangashca. Thomas tigrarishpa ricujpica tucuicunami imatapash na rurashcashnalla ricunajurca. Shinapash caina punllami ashtahuanbachaca llaqui carca. Internetpi shuj mensajeta cachashpami Thomastaca manllachirca....

Quiquin Thomas cashpaca ¿imatashi ruranguiman?

Ama yapata preocuparichu. Na macashpa difindirita ushanguimi. Chaipaca ¿imatata rurana cangui?

•   PAICUNATACA AMA CAZUICHU. Bibliapica ninmi: “Shinlli shungu runa fiñarishpaca, pai imata munashcata ruranllami. Ashtahuangarin alipacha yachajushca runaca jarcarinmi” nishpa (Proverbios 29:11). Quiquin tranquilo cajta ricushpaca burlarijcuna, molestajcunaca tal vez aburririshpa saquingami.

• AMA SHINALLATA TIGRACHICHU. Bibliapica ninmi: “Cangunata nalita rurajpipash, na chashnallata tigrachinachu canguichi” nishpa (Romanos 12:17). Paicunashna ruranaca ashtahuan nalimi canga.

• NALICUNAMANDA ANCHURINGUI. Bibliapica ninmi: “Ali yuyaita charij runaca, ima llaqui japinata ricushpaca pacajunmi” nishpa (Proverbios 22:3). Shinaca maipi ashtahuan molestajta yachashpaca, shuj ladotami rina cangui. Shinami pipash llaquichinamanda caruyangui.

• IMATA NINATA ALI PENSARINGUI. Bibliapica ninmi: “Aliguta parlashpa tigrachij shimica, ninanda fiñarishcatapash anchuchinmi” nishpa (Proverbios 15:1). Paicunahuan igualarijunapa randica asingapaj imatapash nishpa cushillami cana cangui. Shuj ejemplota ricupai, pipash quiquinda yapa racumi cangui nishpa molestajujpica, quiquinga cashna ninallami cangui: “Ari, ashata tsalayanami cani yarin” nishpa.

• UCHALLA ANCHURINGUI. 19 huatacunata charij Nora jovenga ninmi: “Uchalla anchurishpaca imatapash aliguta yuyashpa ruraj cashcata, na manllaj, na ñapash fiñarij cashcatami ricuchingui. Shinapash yapata molestajcuna, burlarijcunaca na shina caita ushanllu” nishpa (2 Timoteo 2:24).

• NA MANLLASHPA SEGUROMI CANA CANGUI. Yapata molestajcuna, burlarijcunaca picuna manllajta, na seguro sintirijtaca jaicatami cuenta japin. Shinami na difindiri ushangachu yan. Shinapash quiquin shinllillata imatapash nijpica ñana molestangachu.

• PIMANBASH VILLANAMI CANGUI. Punda profesora cashca huarmica ninmi: “Pipash yapata molestajpi, burlarijpica uchallami pimanbash villana can. Shina villajpimi shujcunataca ñana shina llaquichinga” nishpa.