Imaginisar tuche i situația cai avel: O Thomas ci camel te jial aghies ca școala. Tha nici tehara. Ci camel te mai jial niciechdata ca școala. Sea le buchia începosarde acana trin șiona cana lesche colegi catar i școala phende nasulimata anda leste. Pala codoia prasane-les hai șiute lesche anava jiungale. Iech anda lesche colegi cherel te peren tele lesche lila, hai phenel că sas iech accidento. Aver, de palal, spidel-les, hai ji cana risarel-pe, o Thomas ci del peschi sama con sas. O ghies cai nachlea, o prasamos naclea orisavi măsura, o Thomas primisardea iech amenințarea online. . .

Dacă aveias ande lesco than, so chereias?

Ci san bi zoraco! Daștis te așes contra codolesche cai prasal-tu, bi te mares-tu. Sar?

•   AV CALMO. I Biblia phenel: „Codoles cai ci siles goghi ci daștil te controlil-pe, tha o manuș înțelepto încărel pesco spirito calmo sea o timpo”. (Proverbe 29:11) Dacă dichiol pe tute că san calmo, codola cai prasan-tu ci va mai cherena cadai buchi.

• NA CHER VI TU SAR VON. I Biblia phenel: „Na risar parpale canicasche nasul anda nasul”. (Romani 12:17) Dacă cheres vi tu sar von, le buchia va avena mai nasul.

• NA ȘIU-TU ANDO NECAZO. I Biblia phenel: „Codo prevăzătorii dichel o nasulimos hai garavel-pe”. (Proverbe 22:3) Chichi daștis, jia dur le manușendar save daștin te anen tuche necazuri, hai catar le situații save anen prasamos pe tute.

• DE IECH RĂSPUNSO CA SAVO CI AJUCĂREL-PE. I Biblia phenel: „Iech răspunso blândo duriarel i holi”. (Proverbe 15:1) Daștis te phenes iech phiras. Sar exemplo, dacă codo cai prasal-tu phenel că san thulo, daștis te vazdes anda phiche hai te phenes: „Avelas mișto te dav tele chichiva kilogramea!”.

• TILIAR OTHAR. „Cana așes anda o mui sicaves că san maturo hai că san mai zuralo sar codo cai prasal-tu”, phenel i Nora, cai sila 19 bărș. „Sicaves că daștis te încăres-tu tela o controlo, buchi cai ci cherela codo cai prasal-tu”. (2 Timotei 2:24)

• ZURIAR CHIO PACHIAIMOS ANDE TUTE. Codola cai prasan averen dichen sigo codolen save gândin nasul anda lende hai cadea von jianen că tu ci cheres hai ci phenes chanci parpale. Tha but anda codola cai prasan-tu den parpale cana dichen că ci sile nici iech zuralimos pe tute.

• DE DUMA VARECAIA. Iech jiuvli cai sas profesoara phenel: „Phenav soavrenghe cai sile prasade te na daran te den duma. Si i mai lași buchi savi daștin te cheren-la, hai cadaia daștil te cherel codoles cai prasal averen te așel thaneste”.