Rē a‘häe se tē te‘is: Thomas tokana ‘e pa la‘ rak. Tē ‘i kamat ‘e huạl fol ne vȧh se, ‘e avat ne iris ‘e rako kamat fäeag‘ạkia rogrog sioksiok ‘e rēko iạ. Ma tä iris nā as tape‘ma se iạ. Av ‘on rereag le‘et la tuk Thomas ma puk ne iạ sapsapo vil ‘atakoa se pupui ta ma le‘ ta rē fak se iạ kat räe ‘e ra se Thomas, ne ta le‘et ‘e kạula‘ogat ne la‘la‘ ‘e ‘on fạ‘u la keu iạ, ma ‘e avat ne iạ la kar la ‘iokia, iạ kal ‘inea ra ne sei tä keu se iạ. Ka ‘e asa le‘et rar‘ia Thomas ‘e internet ta . . .

Kepoi ka ‘äe ta Thomas, tes tä ‘äe la rē?

‘Eake ‘on fūạga ne ‘äe kat ne‘ne‘ ra! Ka ‘äe la pō la pärea ‘äe ‘e iạ ne rar tē. ‘E sal tese?

•   SE FEKFEK MIJ. Puk Ha‘a ‘ea: “Le‘et ne koko puek‘ȧk atakoan ‘on roto. Ka le‘et ne poto mätmätea ma a‘faofäea.” (Fäeag ‘Es Fuạga 29:11) Kepoi ka ‘äe la huạg totoak—iạ ne rar tē kop ma täla roua ‘äe.

• SE HÖ‘ȦK FEK. Puk Ha‘a ‘ea: “ ‘Ạu se tög raksa‘ ‘e raksa‘ se ta le‘.” (Roma 12:17) Hö‘ȧk feke a‘ti‘ua kikia pefä‘ ta.

• A‘SOUSOUA ‘ÄE ‘E PEFÄ‘ TA. Puk Ha‘a ‘ea: “Le‘et ne huạg mafua räe sema se tē raksa‘at, ma mo‘oan.” (Fäeag ‘Es Fuạga 22:3) Hȧ‘ȧk ‘e famör ne la pō la hö‘ pefä‘, ma a‘sousou ‘e ut ne le‘et la pō e la rar ‘äe.

• ‘EA TA FÄEAG A‘FEREHITI. Puk Ha‘a ‘ea: “Ta fäeag marū pō la su‘ia feke.” (Fäeag ‘Es Fuạga 15:1) ‘Äe la pō la ‘ea ta fäeag mạlumut. Kel‘ạkiạg het, kepoi ka iạ ne uia ‘äe ‘ea ne ‘äe haharȧg sirien, ‘äe la pō la ‘ea, “Gou ȧr‘ȧk se ne gou kop la jī‘ȧk ta pulou he his!”

• LA‘ TŪOU. Nora le‘ hȧn fạu 19 ‘ea, “ ‘Ot kat ‘ea ra ta tēet kel‘ạkia ‘ot ma‘ata ma ne‘ne‘ se ‘äe ‘e iạ ne rar‘ia ‘äe, Iạ kel‘ạkia ‘ot puer a‘leleiag ne ‘ita,—tēet ne iạ ne rar tē kat ‘es ra.”—2 Timoti 2:24.

• TUA‘NȦK SE ‘ÄE. Iris ne rar tē ‘inea le‘et ne kat tua‘nȧk ra se iạ, ma le‘et ne kal pō ra la pärea iạ. Ka iris la fea kepoi ka iris räe ne ‘äe kat fakpar ra.

• FOAR SE TA LE‘ET. Le‘ rē rakot ‘e ‘on mumua ‘ea: “Gou far‘ȧk la iris ‘atakoa ne agtạu ma ag te‘is figalelei la iris la foar tē ‘atakoa ne rē se irisa. Ta‘ag tē nonojot la rē, ma iạ la hạiasoag la fū‘ạkia a‘sokoag ne ag te‘.”