Hanni tenne ikkito hedi: Toomaasi techo rosu minira haˈra dibaxino. Isinni layinkita rosu minira dihaˈreemmo yaate geeshsha nafa iillino. Sasu agani albaanni, rosu mine ooso Toomaasi daafira nookkire coyidhe suˈmasi huntu. Hakkiinni isira busha suˈma fushshitusi. Mito wote affinokkiha labbe Toomaasi anganni daftarrasi gante billaallissanno; woy badheenni higge dagge alba qolte tuggeennasi caaqqi yaanno wote, ‘Ayi tugihero dianfoommo’ yitanno. Bero isinni Toomaasi dagoomittete webisayite widoonni sokka sokke baasa waajjishiishshino . . .

Ati Toomaasi ikkoottoro ma assatto?

Tennera assa dandaattori dino yaa diˈˈikkino! Isinni ganamittokki qeela dandaatto. Hiittoonni?

•   GIIRANTOOTI. Qullaawu Maxaafi togo yaanno: “Gowwu manchi hanqosi gudise leellishanno; egennaamu kayinni aarasi [woy, hanqosi] cincatenni sayisanno.” (Lawishsha 29:11) Hanqoho muddama hoogittoro woy hanqoottota leellishiˈra hoogittoro, qarrissannohe ooso ceeˈmite agurtara dandiitanno.

• BADO QOˈLITOOTI. Qullaawu Maxaafi togo yaanno: “Busha assinohehura busha assite qoltooti.” (Roomu Sokka 12:17) Bado qoˈla coyi roore bushanno gede assitanno ikkinnina kaaˈlitannori dino.

• QARRU GIDDORA EESSANNOHE COYIWIINNI XEERTIˈRI. Qullaawu Maxaafi togo yaanno: “Egennaamu manchi bushare afiro maaxamanno.” (Lawishsha 22:3) Dandaamihe deerrinni, manna hasiissanno ooso ledo xaaddooti woy hattoo ooso qarrissannohe gede assanno coye hooˈli.

• HEDDINOKKI GARINNI QOLI. Qullaawu Maxaafi togo yaanno: “Shaqqadu arrawi hanqo qiissanno.” (Lawishsha 15:1) Insa haariinte nafa saˈˈa dandaatto. Lawishshaho, ooso duˈmillekki laˈe haariintuhero, muushshi yite ‘Hattee wote garaho; shiima geeshsha shaaloommoro danchaho!’ yaa dandaatto.

• INSAWIINNI AGURTE HAˈRI. Noora yinanniti 19 diri beetto togo yitino: “Sammi yite agurte haˈrakki, hasiisanni qarrisannohe manchinni roore gikki yoottohanna worba ikkoottota leellishshanno. Hatto assakki ateneeto qeeˈla dandaattota leellishshanno; qarrisannohe beetti kayinni tenne assa didandaanno.”—2 Ximootewoosi 2:24.

• HUXUXXI YITOOTI. Hasiissanni qarrissanno ooso huxuxxi yitannorenna umo heeshshi yitannore badde affanno. Kayinni sammi yite wodhatto gedeeha ikkoottokkita laˈuro ate seyata waajjitanno.

• MANNAHO KUˈLI. Alba rosiisaancho ikkite loossinoti mitte mancho togo yitino: “Mannu waajjishiishanni qarrisannori baalu woleho kuˈla hasiissannonsa yee hedeemma. Hatto assansa garaho; qoleno, waajjishiishshannori wolootano qarrissannokki gede assate kaaˈlitanno.”